2 Samuel 9 - Wuj Pa K'ubultzij

Rutzil uk'ux ma David che ma Mefi-boset

¹ Xuk'ulmaj jun ij chi ma David xu'an i tz'onb'eniki: “¿K'as nawi kan jun chke i ralk'uwal ma Saúl, man kin-an jun utzil che, kuxtab'al re ma Jonatán?”

² I ralk'uwal ma Saúl o jun kajchak chi ma Siba ub'i, ire le xtaq usik'ixik rumal ma David, are xupon chwach ma David chi ajawinel, xtz'onox che: —¿Yet at ma Siba? —Yin, nim laj winaq —xcha.

³ Are uri i ajawinel xutz'onoj che: —¿O nawi jun chke i ralk'uwal ma Saúl chi k'as kanoq man kin-an jun utzil che pub'i i Ajwal Dios? Are uri ma Siba xub'ij che: —Olik, nim laj winaq, o kan jun uk'ojol ma Jonatán chi klis i raqan chkeb'.

⁴ Are uri i ajawinel xutz'onoj che: —¿Ipa o wi? I ma Siba xub'ij: —Chila pa tinimit Lodebar, chi rachoch ma Maquir chi uk'ojol ma Amiel —xcha.

⁵ Are uri i ajawinel ma David xutaq uk'amik a Mefi-boset k'a chila ipa o wi;

⁶ are xupon a Mefi-boset le, chi uk'ojol ma Jonatán, chi ri umam ma Saúl, chwach i ajawinel, xulukb'a ujolom chwach yab'al u'ij. Are uri i ajawinel xub'ij: —¡A Mefi-boset! Are uri ire xub'ij: —In o chi chawach chu'anik chrij pacha kawaj yet, nim laj winaq —xcha.

⁷ Are uri ma David xub'ij che: —Maxij awib', man yin lik utz awilik kin-ano kuxtab'al re aqajaw, chi ma Jonatán. Kin-an na chi kya' chik ronojel ulew chawe chi re kan etz amam ma Saúl, xaq arewi katij ni awa wu' chwi mexa.

⁸ Xwiri a Mefi-boset xulukb'a chik ujolom chwach, xaq xub'ij: —Nim laj winaq ¿B'uchak chi lik katk'achir taq chwe, chi yin in keje pacha jun kamnaq tz'i?

⁹ Xwiri i ajawinel xutaq usik'ixik ma Siba chi ax rajchak wi etz ma Saúl, xub'ij che: —Yin xinjach ronojel ni'pa ub'itaq re kan etz awajaw xaq ub'itaq ke i je ralk'uwal che a Mefi-boset chi ri umam.

¹⁰ Rumali yet, junam ku' awak'al xaq konojel amokom, kixtikan ni chwach rulew a Mefi-boset xaq kak'ol ni ronojel ni'pa uwach i tikon, man keje ile o ni kkitij uri i ralk'uwal awajaw, tupu ire arewi kutij uwa wu' yin chwi inmexa. I ma Siba le chi o jo'lajuj rak'al xaq juwinaq umokom,

¹¹ xub'ij che i ajawinel: —Nim laj winaq ronojel ni'pa xab'ij che awajchaki, k-antaj na —xcha. I a Mefi-boset, arewi kutij uwa chwi mexa ru' i ajawinel pacha jun chke rak'al ire.

¹² I ma Mefi-boset le o jun rak'al ch'utin chi a Micaía ub'i, konojel ni'pa je jeqel chi rachoch ma Siba, lik je ajchak chrij ma Mefi-boset.

¹³ I ma Mefi-boset le chi klis i raqan chkeb', chila Jerusalén jeqel wi, man arewi kutij uwa chwi mexa ru' i ajawinel.