2 Samuel 8 - Wuj Pa K'ubultzij

I ch'oj kumal i achiyab' chi je yij che i ch'oj re ma David

¹ Chrijil chik ronojel ile, te'uri ma David xeuch'ak aj Filistea, xuqajsaj ki'ij xaq xumaj i tinimit chke chi Meteg-ama ub'i.

² Xaq xeuch'ak aj Moab, xu'an chke chi xejupi konojel pulew xaq xeupaj ru' jun k'am, ni'pa kekanaj kan chupam i keb' pajb'al, keukamsaj, i ni'pa kekanaj kan chupam jun pajb'al kek'asi kanoq. Keje uri ile chi aj Moab xekanaj pu'ab' ma David xaq xkitoj alkawal che.

³ I ma David le xaq xuch'ak ma Hadad-ezer chi uk'ojol ma Rehob chi ajawinel pa tinimit Soba, kraj te'eq ire chi krajawin chik puwi i k'ijib'al ipa o wi i raqana Éufrates.

⁴ I ma David xeuchap b'i jo'winaq kajmo' (1,700) achiyab' chi je yij che i ch'oj ajrij taq kaway, xaq xuchap b'i lajujmo' kachiy (20,000) achiyab' chi je yij che i ch'oj chi keb'in chaqan. Xwi ta la ile, xaq xu'oqij kaqan konojel i kaway chi kejek'aw i ch'ich' re ch'oj, xwi xeuya kan i kaway chi kejek'aw i jo'winaq (100) ch'ich'.

⁵ Chrijil chik ile, xeupon aj Siria chi ukwenta i tinimit Damasco, chuto'ik ma Hadad-ezer chi ajawinel pa tinimit Soba, xwiri ma David xeukamsaj jo'lajujmo' kachiy (22,000) achiyab' aj Siria.

⁶ Te'uri ma David xukoj chajal pa tinimit Siria chi ukwenta i Damasco, are uri aj Siria xekanaj kan pu'ab' ma David xaq xe'ok chutojik alkawal che. Keje uri ile chi Ajwal kuya i ch'akanik che ma David xaipa k-e wi.

⁷ Te'uri ma David xuk'am i tob'al kib' i rajpatan ma Hadad-ezer chi an-o'oj ronojel, xuk'am b'i chila pa tinimit Jerusalén.

⁸ Xaq xu'an re che i k'iyal anch'ich' chi o chila pa tinimit Beta xaq i Berotai, i keb' tinimit le ukwenta i tinimit Hadad-ezer.

⁹ Are xretamaj ma Toi, chi ajawinel re i tinimit Hamat, chi ma David xeuch'ak konojel i achiyab' chi je yij che i ch'oj re ma Hadad-ezer,

¹⁰ are uri xutaq b'i uk'ojol chi a Joram xaq xub'ij che: Chak'ama b'i k'iyal taq b'iroxik saq-o'oj, an-o'oj xaq i anch'ich' yab'al rutzil uwach ma David xaq yab'al ukowil uk'ux re kkikot rumal i ch'akanik, man xu'an ch'oj xaq xtiki chuch'akik ma Hadad-ezer, xub'ij i ma Toi ile man ire u'anom ch'oj ru' ma Hadad-ezer.

¹¹ Ma David xujach ronojel ni'pa i b'iroxik le pu'ab' i Ajwal, junam ru' i an-o'oj xaq i saq-o'oj chi usujum che i Ajwal, ronojel ile petnaq chila pa jalajuj taq tinimit chi xuya rib' pkiwi,

¹² ile ke aj Edom, ke aj Moab, ke aj Amón, ke aj Filistea xaq ke aj Amalec, xaq ni'pa xkimaj pa ch'oj che ma Hadad-ezer, chi uk'ojol ma Rehob, chi ajawinel re i tinimit Soba.

¹³ Ma David lik xnimar u'ij. Are xtzalij li chkich'akik aj Edom, je jo'mo' kachiy (18,000) xtiki chke chila chwa “Ta'aj chi Atz'am” ub'i.

¹⁴ Chrijil chik ile, te'uri xukoj chajal pa ronojel ulew Edom, are uri konojel i winaq chi aj Edom le xekanaj kan pu'ab' ma David. I Ajwal arewi kuya i ch'akanik che ma David xa'ipa k-e wi.

I rajpatanib' ma David

¹⁵ Ma David xrajawin puwi ronojel i tinimit Israel, lik suk'ul u'anik i atb'al tzij xu'an pkiwi konojel uwinaq.

¹⁶ I aj-atzil chke achiyab' chi je yij che i ch'oj are ma Joab, chi ralab' ati Sarvia, i ma Josafat, chi uk'ojol ma Ahilud, are rajtz'ib' i ajawinel.

¹⁷ Ma Sadoc, chi uk'ojol ma Ahitob, xaq ma Ahimelec, chi uk'ojol ma Abiatar, ike le je are i ajsujul sipon; ma Seraías ire le are kutz'ib'aj ronojel ni'pa i kk'ulmaxik.

¹⁸ Ma Benaía, chi uk'ojol ma Joiada, ire le are aj-atzil chke achiyab' chi je yij che i ch'oj aj Creta xaq aj Peleteo. I je uk'ojol ma David je ajsujul sipon.