2 Samuel 5 - Wuj Pa K'ubultzij

Ma David, ajawinel pa tinimit Israel xaq pa tinimit Judá

¹ X-on panoq, xeupon konojel i jalajuj taq tzob'aj aj Israel chila Hebrón pa lapanik ru' ma David, xkib'ij che: “Yoj lik oj alal awu',

² lik saq laj tzij neri chi are te'eq ma Saúl qajawinel, xwiri yet xatok'aw utzam chke aj Israel ni'pa i xki'ano. Xwi ta la ile, i Ajwal xub'ij chawe chi yet kawok'aj utzam i atb'al tzij pkiwi aj Israel xaq at kajawinel na.”

³ Keje uri ile chi konojel i rijab' re i jutzob'aj aj Israel, xe'e pa lapanik ru' ma David chila Hebrón, are uri ma David le xu'an jun trat ku' konojel, lik chwach i Ajwal. Are uri i rijab' re i jutzob'aj aj Israel xkijach ma David pu'ab' i Dios re kkanaj pa ajawinel puwi i tinimit Israel.

⁴ Ma David o lajuj juwinaq (30) junab' che are xujeq ajawinik puwi i tinimit Israel, kawinaq (40) junab' xrajawin puwi i tinimit le.

⁵ Wuqub' junab' ru' nik'aj xrajawin puwi i tinimit Judá chila Hebrón. Xaq oxlajuj juwinaq (33) junab' xrajawin puwi ronojel i tinimit Israel xaq i Judá are o chila Jerusalén.

Ma David xuk'am i tinimit Jerusalén

⁶ I ajawinel chi ma David xaq i uwinaq xe'e pa Jerusalén chu'anik ch'oj chkij aj Jebús chi je o chila che i ulew le. Xwiri i aj Jebús, xkich'ob' ike chi ma David ktiki ti che i okik pa tinimit le, xkib'ij che: “Yet kattiki ti che i okik pa tinimiti, xa ne i je mawach xaq i je klis katkich'ak pa ch'oj, rumali chi katok ta loq.”

⁷ Xwiri ma David xuk'am i tinimit Sion chi sutim rij ru' i tapial nim uwach, wo'or etamam uwach ru' i b'iyaji: nim laj Tinimit re ma David.

⁸ Ma David xub'ij jela kanoq: “Konojel ni'pa kki'an ch'oj ku' aj Jebús rajwaxik chi ke'ok b'i chila pa rik'awb'al i ya, xaq chekikamsaj ni konojel i je mawach xaq konojel i je klis, man ike lik tzel kwil kipalaj.” Chila kpe wi ub'ixkil i tziji: “Mitene i je mawach xaq mitene i je klis ke'ok b'i prachoch i Ajwal.”

⁹ Chrijil chik ile ma David x-ejeqi chila pa tinimit chi sutim rij ru' tapial, xuya pub'i: nim laj Tinimit re ma David. Are uri ma David le xukoj chik ukowil i tinimit le ru' jun nim laj tapial chi sutinnaq chrij, xjeqan b'i chila pa Milo xk'is k'a chila ipa o wi i nim laj ja re i ajawinel.

Ma Hiram xeutaq b'i jub'an ajb'il tzij ru' ma David

¹⁰ U'ij ma David ij ij ktijin unimarik, xaq i Ajwal Dios chi ronojel ktiki che, lik o ru' ire.

¹¹ Rumali ma Hiram, chi ajawinel re i tinimit Tiro, xeutaq b'i jub'an ajb'il tzij ru' ma David, xaq xeutaq b'i i aj-anol tz'alam xaq ajyakol ja, ike le xkik'am b'i chomiq laj taq che' chi chakalte', xkiyijb'a i nim laj ja re i ajawinel chi ma David.

¹² Are uri ma David xuk'am usuk' chi Ajwal xuk'ut che chi are ire uluwnaq che i patan chi ajawinel puwi i tinimit Israel, xaq u'anom che chi lik utz kel ru' rajawinik rumal uk'axnab'al che i tinimit Israel.

Jub'an chik rak'al ma David

¹³ Chrijil chik relik ma David pa tinimit Hebrón, are xupon pa Jerusalén, xeutzukuj chik jub'an rixoqil xaq jub'an chik qas ti mer je rixoqil chi xkalaj kak'al, alab'om xaq altom.

¹⁴ I rak'al chi xealax chila pa Jerusalén, are kib'i iri: A Samúa, a Sobab, a Natán, a Salomón,

¹⁵ a Ibhar, a Elisúa, a Nefeg, a Jafía,

¹⁶ a Elisama, a Eliada, xaq i a Elifelet.

Kich'akik aj Filistea rumal ma David

¹⁷ Are xketamaj aj Filistea chi ma David jachtal chik pu'ab' i Dios, pacha ajawinel re i tinimit Israel, are uri konojel aj Filistea xe'ok chutzukuxik ma David; xwiri ma David xretamaj ile, i xpe chupam i ja re tob'al ib'.

¹⁸ Are uri aj Filistea xkikichersaj b'i kib' chila chwa ta'aj Refaim.

¹⁹ Rumali, ma David xutz'onoj che i Ajwal: —¿Utz nawi we kin-an ch'oj ku' aj Filistea? ¿Kaya nawi chwe chi keinch'ak ike le? I Ajwal xub'ij che: —Utz, cha'ana ch'oj ku', man kinya chawe chi keach'ak ni ike le. Keje ile xub'ij i Ajwal che ma David.

²⁰ Ma David xupon chila pa Baal-perazim, chila xeuch'ak wi. Rumali xub'ij: “Pacha k-on i ya chi kujaq b'i ub'e, keje x-on i Ajwal ile chwe yin xujaq b'i i b'e chinwach chkixol i ajch'oj chwij.” Rumali xuya pub'i i k'ijib'al le Baal-perazim.

²¹ Xwi ta la ile, i aj Filistea xko'taj kan kitiox, i ma David junam ku' uwinaq xkik'am b'ik.

²² Xwiri i aj Filistea xeupon chik xaq xkikichersaj b'i kib' chwa ta'aj Refaim,

²³ rumali chi ma David xutz'onoj che i Ajwal; i Ajwal xub'ij che: —Mat-e chu'anik ch'oj chkiwach, are cha'ana, chasutij kij, xaq chkij katok wi chu'anik ch'oj are katupon ni chila ipa o wi i k'iyal taq che' bálsamo.

²⁴ Are kata chi pacha taq kinb'in puwi i che', su' jat uri chu'anik ch'oj, man ile ke'eloq chi Yin in nab'e chawach chkikamsaxik achiyab' chi je yij che i ch'oj ke aj Filistea.

²⁵ Ma David xu'ano pacha xb'ix che rumal i Ajwal, xujeq b'i kich'akik aj Filistea chila Gabaón, xuk'isa k'a che i tinimit Gezer.