2 Samuel 4 - Wuj Pa K'ubultzij

Ukamsaxik ma Is-boset

¹ I ma Is-boset chi uk'ojol ma Saúl, are xretamaj chi ma Abner xkam chila pa tinimit Hebrón, lik xqaj uk'ux xaq konojel aj Israel lik xkixij kib'.

² Je o keb' achiyab' chi kki'an kipatan chrij ma Is-boset, ike le je aj-atzil chke jutzob'aj ili'omab'. I jun are ma Baana xaq i jun chik are ma Recab; chekeb' je uk'ojol ma Rimón aj Beerot chi xaq umuq uxikin ma Benjamín. Man i winaq chi aj pa tinimit Beerot kb'ix chke chi je ukwenta utzob'ajil ma Benjamín.

³ Tupu i winaq aj Beerot xe'anmaj b'ik i xe'e pa Gitaim, chi pacha je aj naj xejeqi chila, k'a are o wi wo'or.

⁴ I ma Jonatán, chi uk'ojol ma Saúl, o jun uk'ojol chi a Mefi-boset ub'i, i ala le klis i raqan chekeb'. Are o chik jo'ob' junab' che a Mefi-boset, xupon utzijol pa tinimit Jezreel chi ma Saúl xaq ma Jonatán xekamik, are uri i ixoq chi xk'itsaw i ala le xuk'am b'ik, x-anmajik, xwiri rumal uk'achirik che i anmajik, xutzaqsaj i ala le pulew, are uri i ala le xkanaj kan klis i raqan.

⁵ I ma Recab xaq i ma Baana chi je uk'ojol ma Rimón chi aj Beerot, xe'e chi rachoch ma Is-boset; are xeuponik lik tij i ij, rumali i ma Is-boset uxlannaq tan jub'i' puwarb'al xaq oknaq li jub'i' uwaram.

⁶ I ixoq chi kchajiw uchib'e ktijin te'eq chujos-ixik i trigo, xwiri xkos chichak rumali xwarik, are uri xe'ok b'i ma Recab xaq ma Baana ru' ja, mijun xeilawik.

⁷ Are xe'ok b'ik, xekiriqa ma Is-boset kotz'ol puwi i ch'at chila puwarb'al, xkesaj b'i ujolom xkik'am b'ik, xe'e che ronojel i b'e chi k-e che i chaqij jyub' Arabá, jun a'ab' xeb'inik.

⁸ Are xeupon pa Hebrón, xkik'am b'i che ma David, xkib'ij che: —Nim laj winaq, riy ujolom ma Is-boset, chi uk'ojol ma Saúl, chi ajch'oj te'eq chawij yet chi xaq lik kraj te'eq akamsaxik. Xwiri wo'or, i Ajwal xuya chawe yet, nim laj winaq, chi kaya utojb'alil che ma Saúl xaq chke i ralk'uwal.

⁹ I ma David xub'ij chke ma Recab i che ma Baana, chi je rak'al ma Rimón aj Beerot: —Lik pub'i i Ajwal kinb'ij chiwe chi resam wanima chupam ronojel i b'is,

¹⁰ i jun are xuya utzijol chwe chi kamnaq chik ma Saúl, kuch'ob' taq ire chi xuk'am li jun utz laj tzij chwe, xwiri yin xinchapo xink'am b'i prexil, chila xinkamsaj wi pa Siclag, are uk'exel ile xinya che chi xolub'ij i tzij chwe.

¹¹ Lik xaq keje ile kin-an chiwe yix wo'or ix itzel laj taq winaq, man xikamsaj jun achi chi lik nti umak chi uxlannaq tan chi rachoch chila ipa kwar wi. Rumali kitoj ni ukamik i achi le, man kinchup ni iwach chwach i jyub' ta'aji.

¹² Chrijil chik ile, i ma David xuya jun taqanik chke aj-atzil ke alab'om chi je yij che i ch'oj chi chekikamsaj; are uri ike xkik'atzij b'i ki'ab' xaq i kaqan, te'uri xekitzayb'a chila naqaj che i k'olb'al ya chila Hebrón. Te'uri xkik'am b'i ujolom ma Is-boset xkimuqu chila pa Hebrón pa jul re etz ma Abner.