2 Samuel 3 - Wuj Pa K'ubultzij

¹ I ch'oj chkixol i ralk'uwal ma David xaq i ralk'uwal ma Saúl lik naj xuch'ijo. Xwiri i ralk'uwal ma David mas xpe kicho'ab' man ktijin kik'iyarik, xwiri i ralk'uwal ma Saúl xa ktijin kk'isik.

I ralk'uwal ma David

² I rak'al ma David chi xealaxik are je o chila pa tinimit Hebrón, je are iri: I atz chke are a Amnón chi rak'al ati Ahinoam chi aj Jezreel.

³ I ukab' a Quileab, chi ralab' ati Abigail, chi rixoqil kan etz ma Nabal aj Carmel; urox a Absalón chi ralab' ati Maaca, chi umi'al ma Talmai chi ajawinel re i tinimit Gesur;

⁴ ukaj a Adonías, chi ralab' ati Haguit; ujo' a Sefatías, chi ralab' ati Abital;

⁵ uwaq a Itream, chi ralab' ati Egla, chi jun chik rixoqil ma David. Je are ike le xealaxik are o ma David chila Hebrón.

Ma Abner xuya uwach ru' ma David

⁶ Tz'aqat ktijin i ch'oj chkixol i ralk'uwal ma Saúl xaq i ralk'uwal ma David, are uri ma Abner ktijin unimarik u'ij pkiwi i ralk'uwal ma Saúl.

⁷ I ma Saúl le o te'eq qas ti mer rixoqil chi ati Rizpa ub'i chi umi'al ma Aja chi xumin rib' ma Abner ru'. Rumali ma Is-boset xuch'ojij che ma Abner: —¿B'uchak xamin awib' ru' i qas ti mer rixoqil inqajaw le?

⁸ Are uri ma Abner lik xpe roywal wach xb'ix che rumal ma Is-boset, rumali xub'ij che ma Is-boset: —¿Xatab'a pacha in tz'i chuchajixik i tinimit Judá? Yin lik in suk'ul laj winaq ku' i ralk'uwal ma Saúl chi aqajaw, ku' konojel i rachalal xaq ku' i ramiy, xwi ta la ile xaq at injachom ti pu'ab' ma David. Yet wo'or xatk'un chuch'ojixik chwe chi xinmakun ru' jun ixoq.

⁹ ¡Lik chuya ni utojb'alil i Ajwal chwe we kin-an ti che ma David chrij pacha xb'ix che rumal i Ajwal:

¹⁰ Kwesaj ni u'ij ucho'ab' u'atb'al tzij i ralk'uwal ma Saúl, xwiri kinya ni u'ij u'atb'al tzij ma David puwi i tinimit Israel xaq puwi i tinimit Judá, kjeqan li k'a pa Dan kupon k'a pa Beerseba!

¹¹ Are uri ma Is-boset lik xtiki ti chula'ik uwach che ma Abner man lik xuxij rib' che.

¹² Are uri ma Abner xeutaq b'i jub'an ajb'il tzij chub'ixkil che ma David: “¿Pachin rajaw ulew? Chqa'ana jun trat, yin kinkoch'ij wib' chu'anik chke aj Israel chi konojel kkiya kiwach awu'.”

¹³ Ma David xub'ij che: “Utz kin-an trat awu', xwiri kak'am li ati Mical, chi umi'al ma Saúl, are katpe chwilik, we kak'am ta loq, mab'ij taqi we kawil inwach.”

¹⁴ Xwi ta la ile, i ma David xeutaq b'i jub'an ajb'il tzij ru' ma Is-boset, man kkib'ij che: “Chajacha li ati Mical chwe, chi wixoqil chi xink'uli ru' puk'exel jo'winaq (100) utz'umalil utzam kichulb'al achiyab' aj Filistea.”

¹⁵ Are uri ma Is-boset xutaq umajik ati Mical che ma Paltiel chi rachijil, chi uk'ojol ma Lais.

¹⁶ Xwiri ma Paltiel ko'ik xterej b'i chrij ati Mical, xterej b'i chrij k'a pa Bahurim. Chila ma Abner xutzalijsaj kanoq. Are uri ma Paltiel xtzalij b'ik.

¹⁷ Chrijil chik ile ma Abner xlapan ku' unimaqil ke aj Israel, xub'ij chke: “Yix lik ax kiwaj wi chi ma David kkanaj pa ajawinel iwe yix.

¹⁸ Lik xuriq i or uri chi k-anik chrij pacha i rajwaxik, man i Ajwal lik ub'im che ma David, chi rajchak, chi rumal ire ketotaj ni aj Israel pki'ab' aj Filistea xaq pki'ab' konojel ajch'oj chkij.”

¹⁹ Ma Abner xaq xlapan ku' uwinaq ma Benjamín, chrijil chik ile x-e pa tinimit Hebrón chub'ixkil che ma David wach kkich'ob' i winaq aj Israel xaq wach taq kkich'ob' konojel utzob'ajil ma Benjamín.

²⁰ Ma Abner xupon pa Hebrón ru' ma David junam ku' juwinaq achiyab' chi kachnimam b'ik. Are uri ma David xuyijb'a jun nim laj wa'im re ma Abner xaq ke i achiyab' chi je enaq ru'.

²¹ Chrijil chik ile ma Abner xub'ij che ma David: —Wo'or kin-ek man kinmol kichi' konojel i winaq aj Israel, man kki'an jun trat awu' xaq keje ile yet ka'at ni tzij uri pacha arayijb'al. Are uri ma David xu'ijla b'i ma Abner, rumali chi xkub'i uk'ux i x-ek.

Ma Joab xukamsaj ma Abner

²² Ma Joab xaq i winaq chi kiya'om kiwach ru' ma David, xaqte'et xeupon ru' ma David, kok'am b'i jalajuj taq b'iroxik chi kimajom chke i ajch'oj chkij. Ma Abner nti chik ru' ma David chila Hebrón, man ire xkub'i uk'ux i x-ek chrijil chik are ma David xu'ijla b'ik.

²³ Are xupon ma Joab junam ku' konojel achiyab' chi je enaq ru', xkib'ij che chi ma Abner, chi uk'ojol ma Ner, xupon ru' i ajawinel, xwiri enaq chik are xeuponik.

²⁴ Are uri ma Joab x-e chrilik i ajawinel xaq xub'ij che: —¿Wach xa'an yet, Nim laj winaq? I ma Abner xk'un chawilik, xwiri yet xaya chik che chi x-ek.

²⁵ ¿Xatab'a aweta'am ti yet nim laj winaq, chi ma Abner, chi uk'ojol ma Ner le, xa xk'un chat'orik, chutaqexik are katel loq xaq are katok b'ik xaq chretamaxik ronojel ni'pa i ka'ano?

²⁶ Are xel li ma Joab che i lapanik ru' ma David, su' xeutaq la b'i jub'an winaq chutzukuxik ma Abner, xkitzalijsaj li chila che i k'otom Sira. I ma David xretamaj ti ile.

²⁷ I ma Abner are xupon pa tinimit Hebrón, xk'am b'i rumal ma Joab putzal pan uchija, man kelapan kitukel. Are je o chik kitukel, i ma Joab le xujil b'i ch'ich' che upam ma Abner, are uri xkamik, elsab'al roywal che rumal ukamsaxik ucha' chi etz ma Asael.

²⁸ Chrijil chik ile are xretamaj ma David, xub'ij i tziji: “Chwach i Ajwal, yin xaq i wajawinik lik nti pich' qe che ukamik ma Abner, chi uk'ojol ma Ner.

²⁹ ¡Chtzaq ni utojb'alil puwi ma Joab xaq pkiwi konojel i ralk'uwal, arewi chk'iji ni itzel laj yob'il che tz'umalil chi kachoch, chejetz'pin na, to' arewi ktixix ni kik' che i kich'akul, chpet ni wa'jal re i numik ku' i ralk'uwal xaq chekamsax ni ru' ch'ich'!”

³⁰ Ma Joab xaq ma Abisai xkikamsaj ma Abner man are x-ani i ch'oj chila pa Gabaón, are ma Abner le xkamsaw kicha' chke chi ma Asael.

³¹ Chrijil chik ile ma David xuya jun taqanik che ma Joab xaq chke konojel ni'pa je teren chrij ma Joab le: “Chiraqch'ij i u'u xaq chikojo jun chik i'u' chi lik as xaq chixb'ison rumal ukamik ma Abner.” I Ajawinel ma David xterej b'i chkij i je ok'awnaq b'i kamnaq.

³² Xkimuq ma Abner chila pa tinimit Hebrón, i ajawinel ma David lik xsik'in che o'ej chila chuchi' i jul ipa xkimuq wi ma Abner, xaq keje ile xki'an konojel i winaq.

³³ Are uri i ajawinel xub'ixaj jun b'ix chi re b'is rumal ma Abner: “¿B'uchak chi lik keje kamik ile xa'ano ma Abner, chi lik are jun kamik chi ch'am taj?

³⁴ ¿Ximtal wa a'ab' xaq awaqan ru' karena? ¡Man i akamik keje pacha ukamik jun pki'ab' itzel laj taq winaq!” Xcha. Xaq i winaq lik kkimayij ti o'ej che ma Abner.

³⁵ Are uri k'iyal mul xkitz'onoj utzil che ma David chi rajwaxik kutij uwa re trigo chuxe'el uqajb'al ij, xwiri ma David lik xub'ij pub'i i Ajwal: —¡Chuya ni i nim laj utojb'alil i Dios pinwi, we kintij jun wa re trigo xaq pachike jun chik b'iroxik are k'amaja ktzaq b'i ij!

³⁶ Konojel i winaq xkita ub'e ile xaq lik utz xkilo, man ronojel ni'pa ku'an i ajawinel lik utz kkil i winaq.

³⁷ Che taq i ij le, konojel i winaq re i tinimit Israel xkita ub'e chi ma David, lik are ti xkamsaw ma Abner chi uk'ojol ma Ner.

³⁸ I ajawinel xub'ij chke i rajpatanib': —Yix iweta'am chi wo'or xkam jun nim laj ajpatan pa tinimit Israel, ire le are jun winaq chi lik o u'ij.

³⁹ Rumali, tupu yin in ajawinel chi in ultal rumal i Dios, xwiri lik kinxij wib' chkiwach i je kamsanel laj taq winaq chi je ralab' ati Sarvia. ¡I Ajwal chuya ni utojb'alil che i ajkamsanel chrij pacha i mak atzalal chi xu'ano!