2 Samuel 24 - Wuj Pa K'ubultzij

I ma David kerajlaj konojel i winaq re i tinimit

¹ I Ajwal xmi' chik roywal chke aj Israel, rumali xu'an che ma David chi kch'ojin chkij; are u'ankil uri chi xutaq ma David chkajlaxik konojel aj Israel xaq aj Judá.

² Are uri i ajawinel xub'ij che ma Joab, chi aj-atzil chke i achiyab' chi je yij che i ch'oj, chi je rachnimam: —Jat ku' konojel i jalajuj taq tzob'ajil aj Israel chi kjeqan b'i Dan k'a pa Beerseba, cheawajlaj konojel i winaq, man keje ile kwetamaj ni'pa i winaq je olik —xcha.

³ Xwiri ma Joab xub'ij che i ajawinel: —I Ajwal chi a-Dios yet, Nim laj Winaq, chuk'iyarsaj ni jo'winaq (100) mul awinaq chwach ni'pa je o wo'or, xaq yet chatk'asi ni naj man keje ile k'a kawil nu b'i kiwach; xwiri ¿Wach uchak chawe yet, Nim laj Winaq, chi kawaj keawajlaj i winaq?

⁴ Xwiri i ajawinel xukoj ti pajil utzij i ma Joab che xaq kitzij i je rajpatanib', rumali chi ma Joab xaq konojel i je rajpatan xe'el li chila ipa o wi i ajawinel, xe'e chkajlaxik i winaq aj Israel.

⁵ Are xki'axuj i raqana Jordán, xkijeq b'i kajlaxik chila pa tinimit Aroer xaq pa wiqab'im chila pa tinimit chi o pa nik'aj che i ta'aj re i tinimit Gad xaq putzal i tinimit Jazer.

⁶ Chrijil chik ile xe'e chwi taq jyub' Galaad xaq xe'e pa Cades chi o chila pkulew aj Het, te'uri xe'e pa tinimit Dan, juntir xeupon chila, chila pa Dan le xkikotij wi chaloq xepe pa Sidón.

⁷ Te'uri xe'e chila che i tinimit Tiro, chi sutim rij ru' i tapial nim uwach, kelik chila, xe'e che i jalajuj taq kitinimit aj Jiw xaq pkitinimit aj Canaán, xe'el k'a pa wiqab' che i tinimit Judá chila pa tinimit Beerseba.

⁸ B'elejeb' ik' ru' juwinaq ij xki'an chkajlaxik konojel i winaq re ronojel i nimaq taq tinimit, te'uri xeupon pa Jerusalén.

⁹ Are uri ma Joab xujach jun wuj che i ajawinel ipa tz'ib'tal wi kik'iyal i winaq, are uri xe'eloq chi pa tinimit Israel je o jo't'ub' (800,000) achiyab' chi je utz re i ch'oj, xaq je o lajujmo' kachiy oxt'ub' (500,000) achiyab' chi je utz re i ch'oj aj Judá.

¹⁰ Xwiri ma David xuna ub'e chi xmakunik rumal xutaq kajlaxik i winaq, rumali xub'ij che i Ajwal: —In-anom jun nim laj inmak ru' ni'pa xin-ano le, rumali kintz'onoj k'iyal mul utzil chawe Wajwal chi chakuyu inmak, man xin-an jun b'uy laj winaq che wib'.

¹¹ We' tan chukab' ij are xwalij ma David, i Ajwal xub'ij che ma Gad, chi profeta, chi xaq ajya'ol uno'oj ma David:

¹² “Jat chrilik ma David, xaq chab'ij che pink'exel Yin chi kinb'ij ni oxib' b'iroxik che, ire chu'ulu jun che chi kraj kin-ano.”

¹³ Rumali chi ma Gad x-e chrilik ma David, xaq xutz'onoj che: —¿Pachike kawaj: Are wuqub' junab' numik pa tinimit, are oxib' ik' chi kat-anmaj chkiwach i ajch'oj chawij, o are oxib' ij chi kpe nimaq taq yob'il pa tinimit? Chach'ob'o xaq lik su' wo'or chab'ij chwe, man kinb'ija yin che i xintaqaw loq.

¹⁴ Are uri ma David xub'ij che ma Gad: —In o chwach i jun nim laj k'ax, wo'or lik utz we kojtzaq pu'ab' i Ajwal, man ire lik nim rutzil uk'ux, chwach we kojtzaq taq pki'ab' i winaq.

¹⁵ Are uri i Ajwal xutaq li jun nim laj yob'il pkiwi i aj Israel, xuch'ij oxib' ij chrij pacha xb'ixik. Xjeqan b'i kamik che i tinimit Dan, xk'is k'a che i tinimit Beerseba, je jo'lajujmo' wajxaqchiy (70,000) winaq xekamik.

¹⁶ I ángel re i Ajwal are ya kujeq usachik uwach i tinimit Jerusalén, i Ajwal lik k'ax xuna uk'ux, rumali xub'ij che i ángel chi ktijin chukamsaxik: ¡Chamayij kamsanik! Che i ij le i ángel re i Ajwal o chila che i k'ijib'al ipa ku'osij wi i trigo ma Arauna chi aj Jebús.

¹⁷ I ma David are xril i ángel re i Ajwal chi ktijin chkikamsaxik i winaq, xub'ij che i Ajwal: —¡Yin xinmakunik! ¡Lik inmak yin ile! Xwiri ¿Wach wa xki'an i winaq le ike, lik nti kimak? ¡Yin kintz'onoj k'iyal mul utzil chawe chi utojb'alil ronojel ile chtzaq ni pinwi yin xaq pkiwi i walk'uwal!

I ma David ku'an jun sujb'al sipon

¹⁸ Lik che i ij le, ma Gad x-e chrilik ma David, xub'ij che chi ku'an jun sujb'al sipon re i Ajwal chila ipa ktijin wi ma Arauna, chi aj Jebús, chu'osixik i trigo.

¹⁹ Are uri ma David x-e chu'anik ronojel chrij pacha xub'ij ma Gad, man ile lik utaqanik i Ajwal.

²⁰ Ma Arauna ktijin chi taqenik chinaj, are uri xrilo chi i ajawinel xaq i je rajpatanib' ktijin kuponik ipa o wi ire. Are uri ma Arauna x-e chuk'ulaxik i ajawinel xaq xu'aj rib' chwach.

²¹ Are uri ma Arauna xub'ij che: —¿Nim laj Winaq, wach usuk' ak'unik waral ru' awajchaki? I ma David xub'ij che: —Kwaj kinlo' i k'ijib'al chawe ipa ka'osij wi i trigo, man kwaj kin-an jun sujb'al sipon re i Ajwal chila, man kk'is i kamik re i tinimit.

²² I ma Arauna xub'ij che: —Chak'ama kan ulew chi kumaj awach yet, Nim laj Winaq, xaq chasujuj i porom sipon chila; waral o torib' re i porom sipon, o i tz'alam re jich'anik xaq o i yuku chi kuriq uchak re si'.

²³ ¡Ronojel ile kinya chawe, Nim laj Winaq! Are uri ma Arauna xub'ij chik: —¡Lik utz wetene i Ajwal chi a-Dios, kuk'am ile chawe, Nim laj winaq!

²⁴ Xwiri i ajawinel xub'ij che: —Kintioxij chawe, xwiri yin lik kinlo' ni ronojel chawe xaq lik kintoj ni rajil chi kmajawik; man nti kinya pinsipon che Wajwal Dios we lik inlo'om taj. Keje uri ile chi ma David xulo' i k'ijib'al le xaq xeulo' i torib' ru' lajuj kawinaq (50) saqpwaq,

²⁵ lik chila xu'an wi i sujb'al sipon che i Ajwal xaq xusujuj i porom sipon xaq i sipon re chomb'al ib' chwach i Ajwal. Are uri i Ajwal xuta utz'onb'enik ma David pkiwi utinimit, keje uri ile, chi i nim laj yob'il, xtani pkiwi konojel aj Israel.