2 Samuel 20 - Wuj Pa K'ubultzij

Uyakik rib' ma Seba chu'anik ch'oj xaq i ukamik

¹ Jun utz ti laj winaq kikwenta utzob'ajil ma Benjamín, chi ma Seba ub'i, uk'ojol ma Bicri, o chila Gilgal. I achi le xuxut'ij i trompeta xaq ko xsik'in chub'ixkil i tziji: “¡Qonojel yoj lik nti ub'itaq qe kya'ik xaq nti ukuxtab'al ma David qu' chi uk'ojol ma Isaí! ¡Rumali iwonojel yix ix aj Israel, jix chi taq iwachoch!”

² Are uri konojel i achiyab' aj Israel xko'taj kan ma David, man xeterej b'i chrij ma Seba, chi uk'ojol ma Bicri. Xwiri i achiyab' aj Judá, chi je jeqel chila pa Jordán k'a che i tinimit Jerusalén, lik xko'taj ti kan i ajawinel.

³ I ma David are xtzalij li pa nim laj rachoch pa Jerusalén, xeuk'am i lajuj qas ti mer rixoqil chi je uya'om kan chuchajixik i nim laj ja re i ajawinel, xeutz'apij chupam jun ja xaq lik xukoj chajal chke, chila xeril wi xaq xeutzuq wi, xwiri xumin ti chik rib' ku'. Are uri i ixoqib' le xekanaj kan chila che i ja le pacha taq je malkan, k'a are xekamik.

⁴ Te'uri i ajawinel xub'ij che ma Amasa: —Cheasik'ij i achiyab' aj Judá, puxib' ij panoq kixk'un waral.

⁵ I ma Amasa le x-e chumolik kichi' konojel i winaq, xwiri xb'aytajik, rumali xupon ti che i ij chi b'ital che rumal i ajawinel.

⁶ Are uri ma David xub'ij che ma Abisai: —I ma Seba le lik nim ni k'ax ku'an chqe chwach xu'an ma Absalón chqe. Rumali chawok'aj utzam chke inwinaq chi je yij che i ch'oj, su' chatterej b'i chrij, man qeta'am taj moqxa i ma Seba le kumin rib' chupam jun tinimit chi sutim rij ru' tapial nim uwach, lik kojtiki ti chik uri che.

⁷ I achiyab' chi je yij che i ch'oj re ma Joab junam ku' aj Creta, aj Peleteo chi je uchajal i ajawinel, xaqjunam ku' i achiyab' chi je yij che i ch'oj chi lik ko kiwach, xe'el pa Jerusalén junam ru' ma Abisai, man xe'e chroqtaxik ma Seba chi uk'ojol ma Bicri.

⁸ Are naqaj chik je o che jun nim laj ab'aj chi o chila pa Gabaón, i ma Amasa xel li chkik'ulaxik. I ma Joab ukojom b'i u'u' re i ch'oj, ukojom b'i yut'b'al upam xaq o jun ch'ich' prachoch chi o uware k'ulala uya'om b'i puk'alk'ax. Xwiri are kuxulk'atij i rachoch kel li ch'ich' le.

⁹ Tz'aqat ma Joab ru' u'ab' wiqab'im xuchap che rismachi' ma Amasa re tz'ub'b'al uchi', xutz'onoj che: —¿Utz awach wachalal?

¹⁰ Xwiri ma Amasa xukoj ti retalil i ch'ich' chi rok'am ma Joab pu'ab'. Are uri ma Joab lik juntir xumin b'i i ch'ich' le che upam, ni'pa i rixkol ma Amasa le xet'ub'krij b'i pulew. I ma Joab xuk'is ti chik ukamsaxik ma Amasa le man su' xkamik. Te'uri ma Joab junam ru' ucha', chi ma Abisai, xe'e chik chuterb'exik ma Seba, chi uk'ojol ma Bicri.

¹¹ Are uri jun chke i achiyab' chi je yij che i ch'oj re ma Joab, xtak'i chutzal uch'akul ma Amasa xaq xub'ij: —Pachin uya'om uwach ru' ma Joab xaq ru' ma David, ch-oj uri ru' ma Joab.

¹² Xwiri ma Amasa le lik ub'alb'am rib' chupam ukik'el pulew, are uri i winaq ketak'i chrilik are keik'awik, rumali i achi chi yij che i ch'oj xuya ma Amasa le chuxukut b'e xaq xuch'uq uwi ru' jun k'ul pim, man keje ile konojel ni'pa i keik'awik kekanaj ti kan chutaqexik.

¹³ Chrijil chik relsaxik i kamnaq le pa b'e, xe'ik'aw konojel ni'pa i kiya'om kiwach ru' ma Joab chuterb'exik ma Seba.

¹⁴ I ma Seba xik'aw chila ku' konojel i jalajuj taq tzob'ajil aj Israel k'a xupon chila che i tinimit Abel-bet-maaca; che i k'ijib'al le konojel i je umuq uxikin ma Bicri xkimol kib' ru' ma Seba xaq xeterej b'i chrij are xok b'i pa tinimit.

¹⁵ I achiyab' chi je yij che i ch'oj re ma Joab are xeupon pa tinimit Abel-bet-maaca, xki'an jun anb'al puwi i tapial nim uwach re kokb'al pa tinimit, xaq xkitij uwulijsaxik i tapial le.

¹⁶ Are uri jun saqlej laj ixoq chi aj chila pa tinimit le, lik ko uwach xsik'in li puwi i tapial nim uwach: —¡Chita pe'! ¡Chita pe', chi'ana jun utzil chwe! ¡Jix chub'ixkil che ma Joab chi chpetoq man kwaj kin-ijla!

¹⁷ I ma Joab are xtejeb' panoq, i ixoq xutz'onoj che: —¿Yet at ma Joab? —Yin —xub'ij ma Joab. I ixoq le xub'ij che: —Chata ni utzij i awajchaki. —Chatch'awoq —xcha ma Joab.

¹⁸ Are uri ixoq le xujeq ub'ixkil i tziji: —Ujer keje iri kb'ixik: “Pachin kraj retamaxik jun b'iroxik, oj uri chutz'onoxik chila pa tinimit Abel.” Keje ile kretamaj uri.

¹⁹ I qatinimit are jun tinimit chi lik mas utz kik'ux i winaq xaq lik kijikb'am kik'ux chke aj Israel. Xaq are jun tinimit chi lik mas o u'ij. Xwiri yet kawaj uchupik uwach ile. ¿B'uchak kawaj uchupik uwach ile chi re i Ajwal? —Xcha i ixoq.

²⁰ Are uri ma Joab xub'ij che: —Yin are ti inch'ob'om u'anik ile chi kinchup taq uwach i tinimiti, xaq we kin-an taq i utz taj che.

²¹ Are ti inch'ob'om u'anik yin ile, man yin in k'unnaq chutzukuxik jun achi aj chwa taq jyub' re ma Efraín, chi ma Seba ub'i, chi uk'ojol ma Bicri, ire xwalij chu'anik ch'oj chrij i ajawinel ma David, rumali chi xwi chijacha li ire chwe man keje ile kinel b'i chi pa tinimit. Are uri i ixoq xub'ij che: —Lik chi puwi i tapial nim uwach kk'aq b'i ujolom chawe —xcha.

²² Are uri lik juntir x-e la ixoq le ru' usaqlejal chuyu'uxik kixikin konojel i winaq re i tinimit, rumali xkik'atzij li ujolom ma Seba, te'uri xkik'aq li che ma Joab puwi i tapial chi nim uwach. Are uri i ma Joab xutaq uxut'ixik i trompeta, rumali xkiya kan i tinimit, i chkijujunal xe'e chi kachoch. Tz'aqat i ma Joab le, xtzalij b'i ru' i ajawinel chila pa Jerusalén.

I je rajpatanib' ma David

²³ I ma Joab xkanaj pa aj-atzil pkiwi konojel i achiyab' chi je yij che i ch'oj aj Israel, xaq ma Benaía, chi uk'ojol ma Joiada, xkanaj pa aj-atzil pkiwi aj Creta xaq pkiwi aj Peleteo.

²⁴ I ma Adoram xkanaj puwi i chak chi lik o uchak k-anik. Xaq i ma Josafat, chi uk'ojol ma Ahilud, xkanaj pa ajtz'ib' re i ajawinel.

²⁵ I ma Seva are kutz'ib'aj ronojel ni'pa kk'ulmax ij ij; i ma Sadoc xaq i ma Abiatar je are i ajsujul sipon.

²⁶ I ma Ira chi aj Jair are i ajsujul sipon re ma David.