2 Samuel 2 - Wuj Pa K'ubultzij

Uya'ik ma David pa ajawinel pa tinimit Judá

¹ Chrijil chik ile ma David xutz'onoj che i Ajwal: —¿Rajwaxik nawi kin-e che jun tinimit re i Judá? Are uri i Ajwal xub'ij che: —Utz we kat-ek. Are uri ma David xutz'onoj —¿Ipa uri kin-e wi? I Ajwal xub'ij che: —Pa tinimit Hebrón.

² Are uri ma David x-e chila pa tinimit Hebrón junam ku' i keb' rixoqil chi ati Ahinoam chi aj pa tinimit Jezreel xaq ati Abigail chi rixoqil kan etz ma Nabal chi aj pa tinimit Carmel.

³ Xaq xeuk'am b'i rachi'il junam ku' konojel ni'pa i kalk'uwal, chkijujunal xek'iji chila pa jalajuj taq tinimit Hebrón.

⁴ Chrijil chik ile xeupon achiyab' aj Judá, te'uri xki'ul ma David re kkanaj pa ajawinel re i tinimit Judá. Are xkilap che chi are i winaq aj Jabes re i Galaad xemuquw ma Saúl,

⁵ are uri ma David xutaq b'i jub'an ajb'il tzij ku', xkib'ij chke: “I Ajwal chuya ni utzil chomal piwi rumal i rutzil ik'ux che ma Saúl chi ajawinel te'eq piwi, man ximuqu are xkamik.

⁶ I Ajwal chuya ni rutzil uk'ux chiwe xaq kuya ni chiwe ronojel ni'pa kusujuj chiwe, xaq keje yin lik utz ni iwilik kin-an na rumal i utz chi xi'ano le.

⁷ Wo'or iwonojel yix chikowij ik'ux xaq mixij iwib', tupu xkam ma Saúl chi ajawinel te'eq piwi, xwiri i utzob'ajil ma Judá xinki'ul yin re kinkanaj kan pa ajawinel piwi.”

I aj Israel xaq aj Judá kki'an ch'oj

⁸ Ma Abner, chi uk'ojol ma Ner, chi aj-atzil chke achiyab' chi je yij che i ch'oj re ma Saúl, xuk'am b'i a Is-boset chi uk'ojol ma Saúl pa tinimit Mahanaim,

⁹ chila xu'an kan ajawinel che pkiwi aj Galaad, aj Gesuri, aj Jezreel aj Efraín, aj Benjamín xaq pkiwi konojel aj Israel.

¹⁰ Are xujeq u'atik tzij ma Is-boset pa tinimit Israel, o kawinaq (40) junab' che, keb' junab' xu'at tzij puwi i tinimit. Xwiri utzob'ajil ma Judá keta'am chi are ma David ajawinel,

¹¹ keje uri ile chi ma David wuqub' junab' ru' nik'aj xu'at tzij puwi i tinimit Judá. I tinimit ipa mer xk'iji wi are i tinimit Hebrón.

¹² Ma Abner, chi uk'ojol ma Ner, xel chila pa tinimit Mahanaim, x-e pa tinimit Gabaón, nab'e b'i chkiwach i achiyab' chi je yij che i ch'oj re ma Is-boset uk'ojol ma Saúl.

¹³ Xaq ma Joab chi ralab' ati Sarvia xaq i achiyab' re ma David chi je yij che i ch'oj, xe'el chila pa tinimit Hebrón, xkiriqa kib' chila ipa o wi i yab'al ya Gabaón, chekeb' tzob'aj achiyab' chi je yij che i ch'oj xkiyijb'a kib', jutzob'aj xek'iji chutzal i yab'al ya jewa xaq jutzob'aj chik xek'iji jela.

¹⁴ Are uri ma Abner xub'ij che ma Joab: —Che'el li alab'om chu'anik ch'oj chqawach yoj qonojel. —Utzi' —xub'ij ma Joab.

¹⁵ Keje uri ile chi xe'el li alab'om chu'anik ch'oj chkiwach. I alab'om chi xe'el li puk'exel ma Benjamín xaq ma Is-boset chi uk'ojol ma Saúl je kab'lajuj alab'om chi je yij che i ch'oj, xaq i kab'lajuj chik alab'om xe'el li puk'exel ma David chi je uwinaq ire.

¹⁶ Chkijujunal xkichap i kajch'oj che i kijolom xaq xkich'ap b'i kich'ich' pa kik'alk'ax, rumali chi xetzaq pulew konojel xaq xekamik. Rumali i k'ijib'al chi o chila pa Gabaón xkiya pub'i Helcat-hazurim.

¹⁷ I ch'oj chi xki'an chila che taq i ij le, lik b'isb'al, man ma Abner xaq konojel uwinaq chi aj Israel xech'ak kumal uwinaq ma David chi je yij che i ch'oj.

¹⁸ Chila je o wi oxib' ralab' ati Sarvia chi: Ma Joab, ma Abisai xaq ma Asael. I ma Asael lik kuch'ij b'e pacha kej aj pa taq es,

¹⁹ lik xterej b'i pa'anem chrij ma Abner, xuya ti che chi k-anmajik.

²⁰ I ma Abner are xtaqen chrij, xub'ij: —At yet b'ari, ma Asael. Are uri ma Asael xub'ij: —Pachin wa kab'ij yet we yin taj.

²¹ Ma Abner xub'ij chik: —Chamayij woqtaxik yin, chachapa jun chke i mokom le xaq chak'ama ronojel ni'pa ub'itaq re. Xwiri ma Asael xumayij ti roqtaxik.

²² Are uri ma Abner xub'ij chik che: —We katuxlan ti chwoqtaxik, wo'or katink'aq kan pulew, te'uri ¿Wach taq kinb'ij tan chik yin che awatz ma Joab?

²³ I ma Asael xumayij ti roqtaxik, rumali ma Abner xuch'ap b'i uche' chi o ch'ich' chutzam, xuch'ap b'i che upam xe'el k'a chel rij, chila xjab'i kan uch'akul pulew. Konojel i winaq ni'pa keik'aw chila ipa jab'al wi ma Asael, to' ketak'i chutaqexik.

²⁴ Xwiri ma Joab xaq ma Abisai xeterej chub'i chroqtaxik ma Abner. Are xqaj i ij xeupon puwi i jyub' Amma chi o pan chwach ulew Gía, chila che i b'e chi k-e che i tz'inilik jyub' chaqij Gabaón.

²⁵ Che i k'ijib'al le, i winaq aj Benjamín xkimol kib' ru' ma Abner, xki'an xa jun tzob'aj che kib', xek'iji puwi jun jyub'.

²⁶ Are uri ma Abner xsik'in chub'ixkil che ma Joab: —¿Kamayij ti b'ari i kamsanik? ¿Kawil ti b'a ub'e, chi ronojel ni'pa ile xa b'is kuya chqe? ¿Junpa nawi kab'ij chke awinaq chi ke'uxlan chkoqtaxik i katz kicha'?

²⁷ Are uri ma Joab xub'ij: —Lik pub'i i Dios kinb'ij chawe, matiji xab'ij ile chwe, inwinaq lik k'a keterej te chub'i chkoqtaxik i katz kicha' k'a ksaqirik.

²⁸ Chrijil chik ile ma Joab xutaq uxut'ixik i trompeta, are uri konojel i winaq xkimayij koqtaxik xaq xkimayij u'anik ch'oj ku' i kach aj Israel.

²⁹ Ma Abner xaq konojel uwinaq xeb'in jun a'ab' chwa ta'aj re i Arabá, su' xki'at b'i kib'e chi raqana Jordán xaq pa Bitrón, xeupon k'a chila pa Mahanaim.

³⁰ Are uri ma Joab xuterb'ej ti chik ma Abner xaq xumol kichi' konojel uwinaq chi je yij che i ch'oj; are xrik'awsaj kib'i xunab'ej chi xekam b'elejlajuj uwinaq ma David nti pajil uri ma Asael ku'.

³¹ Xwiri uwinaq ma David xkikamsaj wajxaqlajujwinaq (360) achiyab' uwinaq ma Benjamín xaq uwinaq ma Abner.

³² Chrijil chik ile xkik'am b'i uch'akul ma Asael chila pa Belén xaq chila xmuq wi chupam i jul re uqajaw. Ma Joab xaq konojel uwinaq xeb'in jun a'ab', are xsaqirik xeupon pa Hebrón.