2 Samuel 19 - Wuj Pa K'ubultzij

^1-2 I winaq are xketamaj chi ma David ko'ik xaq lik kb'ison che uk'ojol chi ma Absalón man xkamik, xe'e chub'ixkil che ma Joab. Keje uri ile chi che i ij le puk'exel i kikotemal rumal i ch'akanik, xpe jun nim laj b'is.

³ Xaq i achiyab' chi je yij che i ch'oj, lik ani'al xe'ok pa tinimit: Lik kek'ix che are xe'ok b'ik, pacha taq je anmajnaq li che jun ch'oj.

⁴ Tz'aqat i ajawinel uch'uqum upalaj ru' jun k'ul, ksik'in chub'ixkil: “¡Ink'ojol a Absalón! ¡Ink'ojol a Absalón!”

⁵ Are uri ma Joab x-e pa nim laj rachoch i ajawinel xaq xub'ij che: —Nim laj Winaq, wo'or konojel awinaq chi je yij che i ch'oj xeaya pa k'ix, chi xatkesaj yet junam ku' ami'al, ak'ojol, je awixoqil xaq i je qas ti mer awixoqil pki'ab' i je ajch'oj chawij.

⁶ Nim laj Winaq, wo'or ak'utum chi xeaxutuj kan i je aj-atzil re i ch'oj xaq i awajpatanib' man k'ax keana i winaq chi tzel katkilo, i ni'pa i k'ax katkina'o tzel keawilo. Wo'or xinta ub'e chi chawe yet are mas utz wetene k'a k'as ma Absalón tupu xojkam yoj.

⁷ Rumali, wo'or jat ku' awajchak le xaq chaya ukowil kik'ux man we ka'an ti ile, lik pub'i i Ajwal kinb'ij chawe, chi che a'ab'i, mijun chik winaq uri kuya uwach awu'; i k'ax chi katijo le lik nim na chwach ni'pa i xatij nab'e.

⁸ Are uri i ajawinel xwalij b'ik xaq x-e pa kulem chila pa okb'al che i tinimit. Are xya' utzijol chke i winaq chi o i ajawinel chila pa okb'al, konojel xeupon ru'. Xwiri i winaq aj Israel chi kiya'om kiwach ru' ma Absalón xe'e chruwaxik kib' chi kachoch.

Utzalijik ma David pa Jerusalén

⁹ Konojel i winaq aj Israel chi aj pa jalajuj taq tzob'ajil kech'oqow chub'ixkil i tziji: “I ajawinel ma David oj resam pki'ab' i ajch'oj chqij xaq oj resam pki'ab' aj Filistea, xwiri wo'or xa rumal ma Absalón x-anmaj b'i chupam utinimit.

¹⁰ I ma Absalón chi xqakoj yoj pqajawinel, xkam pa ch'oj, wo'or ¿Wach qoy-em ut? Chqab'ij che i ajawinel ma David chi ktzalij chaloq;” xecha.

¹¹ Ni'pa i tzij chi kkilap i winaq aj Israel le xretamaj ma David chi ajawinel. Are uri i ma David le xutaq ub'ixkil i tziji che ma Sadoc xaq che ma Abiatar, chi je ajsujul sipon: “Chixlapan yix ku' i je rijab' re jutzob'aj ke aj Judá xaq chitz'onoj chke chi b'uchak je b'aytajnaq chub'ixkil chwe chi kintzalij chub'i chupam i nim laj wachoch;

¹² xaq chib'ij chke chi i ajawinel xub'ij iri: Ix, wachalal, yix ix inb'aqil xaq ix inti'lal, ¿B'uchak yix k'isb'al re kib'ij chwe we kintzalij b'i chi wachoch?

¹³ Xaq xutaq ub'ixkil i tziji che ma Amasa: Yet junam qakik'el awu', rumali chi lik che iji xaq ronojel ij at aj-atzil na chke konojel achiyab' chi je yij che i ch'oj puk'exel ma Joab. We kin-an taj chrij pacha xinb'ij chawe, chuya ni uri utojb'alil i Ajwal chwe.” Xcha ma David.

¹⁴ Keje uch'akik kik'ux achiyab' aj Judá ile xu'an i ajawinel; are uri konojel i achiyab' le xki'an xa jun kiwach che kib', xekib'ij che ma David chi ktzalij chub'i ku' ike junam ku' konojel i rajpatanib'.

¹⁵ Are uri i ajawinel le xumaj b'i ub'e xtzalij chub'ik. Xupon che i raqana Jordán. I winaq aj Judá xe'e chuk'ulaxik pa Gilgal man kkito che i axik che i raqana Jordán.

¹⁶ Xaq ma Simei, chi uk'ojol ma Gera, re utzob'ajil ma Benjamín, chi alaxnaq chila pa tinimit Bahurim, xub'isoj li qajik ku' i achiyab' aj Judá chuya'ik i utz laj k'unik che i ajawinel.

¹⁷ I ma Simei le achnimam kumal lajujwinaq kamo' (1,000) achiyab' aj Benjamín. Xaq ma Siba, chi kajchak i ralk'uwal ma Saúl, achnimam kumal jo'lajuj rak'al xaq juwinaq winaq chi je o pa k'ax rumal ire; ike le nab'e xeupon chila chi raqana Jordán chwach i ajawinel,

¹⁸ xu'axuj i raqana ipa xax wi uwach man keuto i ralk'uwal i ajawinel che i axik che i ya xaq keje ile kuriq ni rutzil uk'ux i ajawinel. I ajawinel are xuyijb'a rib' che i axik che i raqana, i ma Simei xu'aj rib' chwach yab'al u'ij.

¹⁹ Are uri ma Simei xub'ij che: —Kintz'onoj k'iyal mul utzil chawe, Nim laj Winaq, chi makoj pajil ni'pa inramtajik xaq inmak chawach chi xin-ano are xatel li chila pa tinimit Jerusalén. Mak'ol awoywal le chwe, Nim laj Winaq.

²⁰ Yin kinya wib' chupam inmak, wo'or xwi yin chke konojel i ralk'uwal ma José, xink'un nab'e chak'ulaxik, Nim laj Winaq.

²¹ Are uri ma Abisai, chi ralab' ati Sarvia, xub'ij: —¿Xatab'a kmajaw ti che ma Simei chi kkamsaxik man xuk'oqoj i ajawinel chi ultal rumal i Ajwal?

²² Xwiri ma David xub'ij che: —¡Pi'ab' ti yix o wi u'anik ile, ix ralab' ati Sarvia! ¿B'uchak kixch'ojin chwij? Wo'or yin lik weta'am chi in ajawinel pa tinimit Israel, rumali chi che i iji, lik mijun winaq kkamik.

²³ Chrijil chik ile, i ajawinel lik xub'ij che ma Simei chi kkam taj.

²⁴ Xaq ma Mefi-boset, chi ri umam ma Saúl, xel li chuk'ulaxik i ajawinel. Che i ij chi x-e i ajawinel, k'a che i ij chi xtzalij chaloq chi lik utz uwach, i ma Mefi-boset uch'ajom ti raqan, uch'ajom ti u'u' xaq resam ti rismachi'.

²⁵ Are xupon chuk'ulaxik i ajawinel pa tinimit Jerusalén, i ajawinel le xub'ij che: —Yet, ma Mefi-boset, ¿B'uchak chi xat-e ti wu' are xin-e yin?

²⁶ Are uri ma Mefi-boset xub'ij che: —Nim laj Winaq, i wajchak xinut'oro. Yin rumal klis waqan, xinb'ij che chi chukojo aparej chrij jun axna man kin-an b'i chrij, enam we awu',

²⁷ xwiri i wajchak le xunuk' tzij chwij chawach yet, Nim laj Winaq. Xwiri, yet at keje pacha jun ángel re i Dios, rumali ka'an na pacha kumaj awach yet.

²⁸ Tupu konojel i ralk'uwal inqajaw lik are ike xkitzukuj kikamik chawach yet, Nim laj Winaq, xwiri i awajchaki xb'ix che chi kutija uwa chwi amexa yet, ¿Wach chik wa kintz'onoj chik chawe, Nim laj Winaq?

²⁹ I ajawinel xub'ij che: —Ile oj lapannaq chik chrij, yin inb'im chik chi ma Siba xaq yet kijach ulew le chiwach.

³⁰ Xwiri ma Mefi-boset xub'ij che: —Chkanaj kan ronojel ulew le pu'ab' ma Siba, man chwe yin, mas utz ile chi yet utz awach xatk'un chik pa nim laj awachoch.

³¹ I ma Barzilai, chi aj Galaad, qajnaq li Rogelim chrachnimaxik i ajawinel are xu'axuj i raqana Jordán xaq chila xu'ijla wi kanoq.

³² Ma Barzilai le lik rij chik, o chik kajwinaq (80) junab' che, xaq ni'pa i junab' chi xk'iji i ajawinel chila pa Mahanaim, i ma Barzilai le xuya ronojel ni'pa rajwaxik che i ajawinel, man ire lik b'eyom.

³³ Are uri i ajawinel xub'ij che ma Barzilai: —Jo wu' pa Jerusalén man yin katwil ni chila.

³⁴ Xwiri ma Barzilai xub'ij che: Kin-e ti awu' pa Jerusalén man xa keb' oxib' junab' chik ink'aslik,

³⁵ man o chik kajwinaq (80) junab' chwe, kinna ti chik ujelal ni'pa i kintijo xaq ni'pa i kintu'u; kinb'ij ti chik we jel xaq we jel taj; xaq kinta ti chik kiqul i achiyab' xaq ixoqib' chi keb'ixanik. ¿B'uchak uri kinkanaj chaqul pacha jun eqan, Nim laj winaq?

³⁶ Yin xwi xink'un jub'i' chwachnimaxik che i axik che i raqana Jordán, ¿B'uchak uri kasujuj pacha rajil chwe, Nim laj Winaq?

³⁷ Puk'exel ile, chaya ni chwe, Nim laj Winaq, chi kintzalij chub'i pintinimit, man chila na kinkam wi xaq kinmuq ni chupam i jul ipa je muqtal wi inqajaw inchuch. Xwiri waral o jun chik awajchak chi are ink'ojol ma Quimam. Oj ni ire awu', Nim laj Winaq, xaq cha'ana che ire chrij pacha kumaj awach yet.

³⁸ Are uri i ajawinel xub'ij che: —Chpeti ma Quimam wu' man kin-an ni che ire chrij pacha kach'ob' yet chi kmajawik. Xaq ronojel ni'pa katz'onoj yet chwe, yin kinya ni chawe.

³⁹ Konojel i winaq xki'axuj i raqana Jordán. I ajawinel are xu'axuj i raqana, xutz'ub'aj kan ma Barzilai ijlab'al kan re xaq xutz'onoj utzil chomal puwi. Are uri ma Barzilai xtzalij b'i che i k'ijib'al ipa jeqel wi.

⁴⁰ I ajawinel xumaj b'i ub'e enam re pa Gilgal, achnimam b'i rumal ma Quimam, kumal konojel i winaq aj Judá xaq kumal nik'aj chke aj Israel.

⁴¹ Konojel aj Israel xe'e chrilik i ajawinel xaq xkib'ij che: —¿B'uchak chi xwi i qatz qacha' aj Judá xatkichap yet, awalk'uwal xaq konojel awinaq chi je yij che i ch'oj are xi'axuj i raqana Jordán?

⁴² Are uri konojel aj Judá xkib'ij chke aj Israel: —Yoj oj alal ru' i ajawinel. Xwiri nti usuk' we kmi' taq iwoywal yix che ile, ¿Xatab'a are i ajawinel kojtzuquw yoj xaq xatab'a o jun b'iroxik qak'amom che?

⁴³ I aj Israel xkila' uwach chke: —We kiwaj kita, yoj mas ne o qe che i ajawinel chiwach yix, lajujmul neri mas o qe che. Xwi ta la ile, che ronojel qatzob'ajil, yoj oj atz chiwach yix. Rumali, ¿B'uchak uri chi kik'aq b'i qa'ij? ¿Xatab'a are ti yoj nab'e xqab'ij chi ktzalij chali i ajawinel le pqatinimit? Xwiri, i winaq aj Judá lik xesik'in chuch'ojixik chkiwach aj Israel.