2 Samuel 11 - Wuj Pa K'ubultzij

Ma David xaq ati Betsabé

¹ Xuk'ulmaj jun ij chi are xjeqan i sa'ij, chi are ij ile chi konojel i ajawinelab', arewi ke'e chu'anik ch'oj, i ma David xutaq b'i ma Joab junam ku' i rajpatanib' xaq konojel i achiyab' aj Israel chi je yij che i ch'oj, xekikamsaj aj Amón xaq xkisutij rij i tinimit Rabá. Xwiri ma David o kan chila pa tinimit Jerusalén.

^2-4 Che jun uqajb'al ij, i ma David xwalij b'i chwi uch'at, x-e pa malkatik puwi i nim laj rachoch ire. Are uri xril jun chom laj ixoq chi ktijin chatinem. I ma David xutaq utz'onoxik pachin taq ixoq le, are uri xb'ix che chi are ati Betsabé, chi umi'al ma Eliam, chi xaq rixoqil ma Urías chi aj Het. Ati Betsabé k'a te kujos-ij rib' man xk'is rik'il; are uri ma David xeutaq b'i jub'an achiyab' chuk'amik ati Betsabé, are xuponik, xumin rib' ru', chrijil chik ile, te'uri ixoq le x-e chi rachoch.

⁵ Are xunab'ej ati Betsabé chi rax winaq chik, are uri xutaq ub'ixkil che ma David.

⁶ Are uri ma David xutaq ub'ixkil che ma Joab chi chutaqa li ma Urías chi aj Het, i ma Joab keje ile xu'ano.

⁷ Are xupon ma Urías chwach ma David, are uri xtz'onox che wach u'anom ma Joab xaq wach ki'anom achiyab' chi je yij che i ch'oj xaq wach kik'ulmam ru' i ch'oj.

⁸ Are uri ma David xuya jun taqanik che ma Urías: —Chi k-e chi rachoch xaq xutaq chuch'ajik raqan. Lik k'ate xel tan b'i ma Urías chila ipa o wi i nim laj rachoch i ajawinel, i ma David chi ajawinel, xutaq b'i uwa chi lik jel pacha jun usipon che.

⁹ Xwiri ma Urías x-e ti chi rachoch, xwar kan chila pa okb'al che i nim laj ja re i ajawinel, ku' achiyab' chi je yij che i ch'oj chi je chajal re i nim laj rachoch i ajawinel.

¹⁰ Are xlap che ma David chi ma Urías x-e ti chi rachoch, are uri ma David xutz'onoj che: —¿B'uchak chi xat-e ti chi awachoch man lik k'a naj ne xatpe wi?

¹¹ Are uri ma Urías xub'ij che: —I lo'laj kaxa, i achiyab' aj Israel chi je yij che i ch'oj xaq i je aj Judá kewar chuxe' taq mujb'al re es, xaq keje i ma Joab, chi waj-atzil, xaq konojel ni'pa je o chuqul chi keutaqo, lik kewar pulew pa taq es; xatab'a kmajaw taq uri ile chi yin kintzuq wib', kintu' inya', kinmin wib' ru' wixoqil, tz'aqat ike je o puyej. ¡Nim laj winaq, yin lik kin-an ti ile!

¹² Are uri ma David xub'ij che: —Chatkanaj ni kani wo'or, chweq te'uri kat-ek. Keje uri ile chi ma Urías xkanaj kan chila Jerusalén k'a chukab' ij.

¹³ I ma David xusik'ij chwa'im ru' xaq chutu'ik i uwa'al uva muqb'am, chrijil chik ile xu'ab'arsaj. Are cha'ab' chik, i ma Urías x-e pa waram ku' achiyab' chi je yij che i ch'oj chi kechajiw i nim laj rachoch i ajawinel le, xwiri x-e ti chi rachoch.

¹⁴ Chukab' ij, ma David xutz'ib'aj jun wuj che ma Joab, xutaq b'i ru' ma Urías.

¹⁵ I wuj le keje iri kub'ij: “Chinab'saj b'i ma Urías chwach i ch'oj; te'uri chiya kan utukel chila man keje ile kkamsaxik.”

¹⁶ I ma Joab are xusutij rij i tinimit man ku'an ch'oj ku', xuya b'i ma Urías chwach, chi reta'am ire ipa je o wi i achiyab' chi lik ko kiwach chu'anik ch'oj.

¹⁷ Are uri i kechajiw i tinimit, xe'el li chu'anik ch'oj ru' ma Joab, che i ch'oj le xekam jujun rajpatan ma David, chkixol ike le xkam ma Urías chi aj Het.

¹⁸ Are uri ma Joab xutaq ub'ixkil ronojel che ma David ni'pa xkik'ulmaj pa ch'oj.

¹⁹ I ma Joab xub'ij che i ajb'il tzij: Are katutzin chub'ixkil che i ajawinel ronojel ni'pa xqak'ulmaj che i ch'oj,

²⁰ moqxa kpe roywal xaq we kutz'onoj chawe: “¿B'uchak chi laj xixtejeb' pan chu'anik ch'oj pa tinimit? ¿Iweta'am tab'a ri chi i winaq le kkik'aq jalajuj taq b'iroxik puwi i tapial chi nim uwach?

²¹ Keje pacha xu'an jun ixoq chila pa tinimit Tebes chi xukamsaj ma Abimelec, chi uk'ojol ma Jerobaal, chi are xuk'aq li jun ka' re jok'b'al trigo puwi. ¿B'uchak ut laj ximin pan iwib' chuxe' i tapial chi nim uwach?” Are uri yet kab'ij ni che: “Xwi ta la ile, nim laj winaq, xaq xkam ma Urías chi aj Het chi xaq kaj-atzil achiyab' chi je yij che i ch'oj.”

²² Are uri i ajb'il tzij xumaj b'i ub'e, x-e chila ipa o wi ma David, xub'ij che ronojel ni'pa xb'ix b'i che rumal ma Joab. Ma David lik xpe roywal che ma Joab, i xub'ij che i ajb'il tzij: “¿B'uchak chi laj xixtejeb' pan chu'anik ch'oj pa tinimit? ¿Iweta'am ta b'ari chi i winaq le kkik'aq jalajuj taq b'iroxik puwi i tapial chi nim uwach, Keje pacha xu'an jun ixoq chila pa tinimit Tebes chi xukamsaj ma Abimelec, chi uk'ojol ma Jerobaal, chi are xuk'aq li jun ka' re jok'b'al trigo puwi? ¿B'uchak ut laj ximin pan iwib' chuxe' i tapial chi nim uwach?”

²³ Are uri i ajb'il tzij xula' uwach che: —I achiyab' chi je yij che i ch'oj, xe'el li pa taq es chu'anik ch'oj chqij, lik kisutim te'eq chik qij, xwiri yoj xojtiki b'i chkitzalijsaxik k'a pa okb'al che i tinimit.

²⁴ Chila puwi i tapial chi nim uwach, i je ajk'aqol ch'ab' xojkik'aq ru' kich'ab', are uri xekam keb' oxib' awajpatanib' yet, nim laj winaq, chkixol ike le xkam ma Urías chi aj Het.

²⁵ Are uri ma David xub'ij che ajb'il tzij: —Chab'ij che ma Joab chi mk'achir rumal ile, man lik rewi ile chi o kekam pa ch'oj. Xwiri chab'ij che chi chu'ana ukoch' chu'anik ch'oj chuchupik uwach i tinimit le, yet lik chaya ukowil uk'ux.

²⁶ Are xretamaj i rixoqil ma Urías chi xkam i rachijil, lik xb'ison che xaq xukoj u'u' re b'is.

²⁷ Are xik'aw ub'is, xtaq uk'amik rumal ma David, xuya chupam i nim laj rachoch, xu'an rixoqil che, chrijil chik ile, ati Betsabé xalax rak'al. Xwiri i Ajwal, xumaj ti uwach ile chi xu'an ma David.