2 Reyes 9 - Wuj Pa K'ubultzij

Uya'ik i ma Jehú pa ajawinel puwi i tinimit Israel

¹ I ma Eliseo, chi profeta, xusik'ij jun chke i kak'al i je profeta, xub'ij che: —Chayijb'a awib' man o kat-e wi; chak'ama b'i b'axo ri chi o aceite chupam, jat chila pa tinimit Ramot chi ukwenta ulew Galaad.

² Are katupon chila, chatzukuj ma Jehú, chi uk'ojol ma Josafat, xaq ri umam ma Nimsi. Chatok b'i chila ipa o wi ire, chawesaj b'i chkixol i rachi'il, chak'ama b'i che chik jun ja.

³ Chak'ama i aceite chi o chupam i b'axo chi xak'am b'ik, chajama che ujolom, xaq kab'ij che: “Keje iri kub'ij i Ajwal: Yin kinsaqij ajawinel puwi i tinimit Israel.” Te'uri chajaqa uchija, jat pa'anem, mattak'ik.

⁴ I ala, chi profeta, x-e pa tinimit Ramot chi ukwenta ulew Galaad.

⁵ Are xupon chila, xeuriqa i aj-atzil ke achiyab' chi je yij che i ch'oj kimolom kib'. Are uri ire xub'ij chke: O jun b'iroxik chi rajwaxik kinb'ij che waj-atzil. Ma Jehú xub'ij: —¿Pachin chqe yoj qonojel? Are uri i profeta xub'ij: —Chawe yet, waj-atzil.

⁶ Are uri ma Jehú juntir xel chila, xok che jun chik ja. Are uri i profeta xujam i aceite puja', xub'ij che: —I Ajwal chi ki-Dios aj Israel, kub'ij: “Yin katinsaqij ajawinel puwi i tinimit Israel, chi intinimit.

⁷ Yet kakamsaj ni i ralk'uwal ma Acab, chi awajaw, man keje ni utojik ile kki'ano rumal kikik'el i profeta chi je we yin xaq i je wajchak chi xtix rumal ati Jezabel.

⁸ Konojel i ralk'uwal ma Acab kekam na, xaq kinchup ni kiwach konojel alab'om aj Israel, lik mijun chik kk'asi kanoq.

⁹ Kin-an ni chke i rak'al ma Acab pacha xin-an chke i rak'al ma Jeroboam, chi uk'ojol ma Nabat, xaq pacha xin-an chke i rak'al ma Baasa, chi uk'ojol ma Ahías.

¹⁰ I ati Jezabel ktijaw ni kumal i tz'i chila pa taq es che i ulew Jezreel, lik mijun kmuquw na.” —Xcha. Are xutzin i profeta chub'ixkil ile, xujaq uchija are uri juntir x-ek.

¹¹ Are xtzalij li ma Jehú, xumol rib' ku' i rachi'il chi aj-atzil ke achiyab' chi je yij che i ch'oj re i rajaw, are uri ike xkitz'onoj che: —¿Wach xuk'ulmaj? ¿B'uchak xk'un i ch'uj le chawilik? Ire xub'ij chke: —Yix iweta'am uwach xaq iweta'am chik wach taq ch'awik ku'an ire.

¹² Xwiri ike xkib'ij: —Chata pe', mojat'oro, ¡Utz we kab'ij chqe ronojel wach taq xub'ij ire chawe! I ma Jehú xub'ij chke: —Ire xub'ij iri chwe: “Keje iri kub'ij i Ajwal: Yin kinsaqij, chi at ajawinel pa tinimit Israel.”

¹³ Keje uri ile chi chkijujunal, juntir xkesaj ki'u' jurjik, xkilik' chwach ire puwi i cholchol. Chrijil chik ile xkixut'ij i rok'a' i chij ma xaq xesik'in konojel: “¡Ma Jehú are i ajawinel!”

Ma Jehú kukamsaj ma Joram chi ajawinel pa Israel

¹⁴ Ma Jehú, chi uk'ojol ma Josafat, chi ri umam ma Nimsi, xuch'ob' u'anik ch'oj chrij ma Joram. I ma Joram le ktijin chuchajixik i tinimit Ramot chi ukwenta ulew Galaad, man ketijin chu'anik ch'oj chrij ma Hazael, chi ajawinel pa tinimit Siria.

¹⁵ Xwiri ma Joram xtzalij li pa Jezreel chukunaxik rib' che i k'ax chi xki'an aj Siria che, are xu'an ch'oj chrij ma Hazael. Are uri ma Jehú xub'ij chke i rachi'il: We lik qatzij kiwaj chi yin in ajawinel, miya uri chke i winaq chi ke'el b'i waral pa tinimit, chuya'ik utzijol chila pa Jezreel.

¹⁶ Are uri ma Jehú x-an b'i chupam uch'ich' re anb'al ch'oj, x-e chila pa Jezreel ipa o wi ma Joram chwi uch'at. Xaq ma Ocozías chi ajawinel pa tinimit Judá o chila chusolixik ma Joram.

¹⁷ I chajinel chi o li puwi i ja tak'tik, are xrilo chi xupon pan ma Jehú ru' jun tzob'aj winaq chi je ajch'oj, are uri xsik'in chub'ixkil: —¡Xek'un jub'an winaq! Are uri ma Joram xub'ij: —Chitaqa b'i jun achi ajch'oj chi ajrij taq kaway, chutz'onoxik chke we ch'oj ti kiwach xek'unik.

¹⁸ Are uri i achi chi x-e rij kaway, x-e chuk'ulaxik ma Jehú xaq xub'ij che: —I ajawinel xinutaq li chutz'onoxik chawe, we ch'oj ti iwach xixk'unik. Are uri ma Jehú xub'ij che: —Ile nti awe yet che: ¡Chatterej chwij! Are uri i chajinel, xub'ij: —I ajb'il tzij xupon ku', xwiri nti ktzalij loq.

¹⁹ Are uri i ajawinel lik juntir, xutaq la chub'i jun chik achi ajrij kaway, are xupon ku' ike xaq xub'ij: —I ajawinel xinutaq li chutz'onoxik chawe we ch'oj ti iwach xixk'unik. Are uri ma Jehú xub'ij che: —Ile nti awe yet che: ¡Chatterej chwij!

²⁰ Are uri i chajinel, xub'ij: —I jun chik ajb'il tzij le xupon ku', xwiri tzalijnaq ta loq. I k'amawnaq li ch'ich' pent are ma Jehú, chi ri umam ma, Nimsi man lik ch'uj kok'aw ch'ich' ire le.

²¹ Are uri ma Joram xub'ij: —Chiyijb'a inch'ich' re anb'al ch'oj; are uri xyijb'ax i ch'ich' re anb'al ch'oj. Te'uri ma Joram, chi ajawinel ke aj Israel, xaq ma Ocozías, chi ajawinel ke aj Judá, chkijujunal ike le xe'an b'i chupam kich'ich', xe'e chuk'ulaxik ma Jehú. Xkik'ulaj kib' chupam rulew ma Nabot chi aj chila pa tinimit Jezreel.

²² I ma Joram are xril ma Jehú xub'ij che: —¿Ch'oj ti awach xatk'unik ma Jehú? Are uri ma Jehú xub'ij che: —B'uchak ch'oj ti inwach kab'ij yet, chi achuch, chi ati Jezabel, k'a ktijin chuch'akik umer chwach uch'akul xaq chwach k'iyal taq itzinik.

²³ Chrijil chik ile i ma Joram xusutij b'i rib' xtzalijik, man lik x-anmajik xaq xsik'in kan chub'ixkil che ma Ocozías: —¡Ma Ocozías xa keb' kipalaj!

²⁴ Xwiri ma Jehú xuk'am i k'aqb'al uch'ab', xuch'ap b'i jun ch'ab' chel rij, xe'el k'a chwach uk'ux ma Joram, are uri i ma Joram le xkam chupam uch'ich'.

²⁵ Are uri ma Jehú xub'ij che ma Bidcar, chi ajtol re: —Chawesaj li chila, kaya chila prulew ma Nabot chi aj Jezreel, man kk'un chink'ux are yet xaq yin kojok'aw te'eq i ch'ich' re anb'al ch'oj chi re ma Acab, chi uqajaw, i Ajwal ub'im chi lik keje ni ile kuk'ulmaj.

²⁶ “Keje pacha ukik'el ma Nabot xaq i kikik'el i rak'al chi xwil ujer, wo'or xaq lik keje ni utojb'alil ile kinya chawe yet chila che i ulew le. Yin chi in Ajwal kinb'ij ile.” Rumali chi chaya'a chila prulew ma Nabot, man keje ile ub'im i Ajwal.

Ukamsaxik ma Ocozías rumal ma Jehú

²⁷ I ma Ocozías, chi ajawinel aj Judá, are xril ronojel ni'pa ktijin uk'ulmaxik, are uri x-anmajik, x-e pusuk' i k'ijib'al Bet-hagan. Xwiri ma Jehú lik xuterejb'ej xaq xub'ij: —¡Xaq chikamsaj ire le! Xki'an k'ax che, chupam uch'ich' are umajom b'i jyub' Gur chi o naqaj che Ibleam. Xwiri ma Ocozías xuch'ij uponik k'a pa tinimit Meguido, are xuponik, xkamik.

²⁸ Chrijil chik ile, i je rajtaqon, xkik'am b'i chupam jun ch'ich' chila pa tinimit Jerusalén; chila xkimuq wi chupam i jul ipa je muqtal wi i uqajaw uchuch, chila putinimit ma David.

²⁹ Ma Ocozías xujeq ajawinik puwi i tinimit Judá are o chik julajuj junab' che rajawinik ma Joram, chi uk'ojol ma Acab.

Ukamik ati Jezabel

³⁰ Ma Jehú x-e pa tinimit Jezreel. Are xretamaj ati Jezabel, xutz'aj la chi taq uwach, xaq xuyijb'a uwi, te'uri xtaqen pan wantana.

³¹ Are xupon ma Jehú pa okb'al che i tinimit, are uri ati Jezabel xub'ij che: —¿Wach a'anom ma Zimri, chi ajkamsanel re i ajawinel?

³² Ma Jehú xtaqen pan pa wantana, xub'ij: —¿Pachin kuya uwach wu' yin? Are uri keb' oxib' i aj-atzil ke achiyab' chi je o pa nim laj rachoch i ajawinel, xkitaqej panoq.

³³ Are uri ma Jehú xub'ij chke: —¡Chik'aqa li chwe waral! Are uri xkik'aq b'ik, i ukik'el xkitzkan jub'i' chwach taq xan xaq chkij i kaway, are uri i kaway le, xkiya'ya kan ati Jezabel che aqan.

³⁴ Are uri ma Jehú, x-e chutijawik uwa xaq chutu'ik uya'. Chrijil chik ile, i ma Jehú xub'ij: Chitzukuj uch'akul itzel laj ixoq le, chimuqu, man umi'al jun ajawinel.

³⁵ Xwiri are xe'e chutzukuxik, man kkimuqu, xwi xkiriq ub'aqil ujolom, u'ab' xaq raqan.

³⁶ Rumali xetzalij chali chub'ixkil che ma Jehú, are uri ire xub'ij: —I Ajwal ub'im chik che ma Elías, aj Tisbe, chi ajb'il utzij i Dios; chi uch'akul ati Jezabel le kkitij nu b'i i tz'i chila pa taq es Jezreel.

³⁷ I jub'an chik uch'akul kkanaj ni kan pacha kis ch'etch'et pa taq es chila pa Jezreel, chi xaq lik mijun ketamawik we are uch'akul ati Jezabel.