2 Reyes 7 - Wuj Pa K'ubultzij

¹ I ma Eliseo xub'ij: Chata utzij i Ajwal Dios chi keje iri kub'ij: “Chweq keje taq or iri: Che i okb'al re i tinimit Samaria klo' ni jun juwinaq (21) ral taq k'ox jok'om trigo ru' jun saqpwaq, xaq ru' jun saqpwaq klo' ni jo'ob' kawinaq (45) ral taq k'ox cebada.”

² Are uri i rajpatan i ajawinel le xub'ij che i profeta: —Chata pe', tupu i Ajwal kujaq i wantana chikaj lik kuk'ulmaj ti ile chi kab'ij le. Xwiri ma Eliseo xub'ij che: —Chata pe', lik ru' ab'a'wach kawil ni i xinb'ij le, xwiri yet, katij ti ile.

³ Lik che i ij le, je o kajib' achiyab' chi o yob'il che i kitz'umalil, je o pa okb'al che i tinimit, kelapan chkiwach: —¿Wach taq kqakub'a b'i waral chi to' qoy-em qakamik?

⁴ We kojok b'i pa nim laj tinimit lik kojkam na, man chila lik o i wa'jal; we kojkub'i kan waral xaq kojkamik. Utzi we koj-e chila ipa je o wi i achiyab' chi je yij che i ch'oj aj Siria, we kkikuy qak'aslemal kojk'asi uri, xaq we kojkikamsaj nti k-ono man yoj lik o chik chqakamik.

⁵ Keje uri ile chi xewalij b'i cha'ab', xe'e chila ku' aj Siria ipa je o wi achiyab' chi je yij che i ch'oj. Xwiri are ya naqaj chik je o wi, are uri xkinab'ej chi nti winaq chila.

⁶ Xuk'ulmaj chi Ajwal xu'an chke konojel achiyab' chi je yij che i ch'oj aj Siria, xkita uch'awb'al i ch'ich' chi re anb'al ch'oj, winaq je ajrij taq kaway xaq xkita uk'iyal winaq; rumali aj Siria xkich'ob'o chi i ajawinel aj Israel utz'onom utob'al che i ajawinel aj Het xaq che i ajawinel aj Egipto anb'al ch'oj chkij.

⁷ Rumali chi are xok a'ab' konojel xe'anmajik, xko'taj kan i kimujb'al kikaway, ki'axna xaq xeko'taj kan i achiyab' chi je yij che i ch'oj.

⁸ Are xeupon i kajib' achiyab' le chrij chwach i kimujb'al aj Siria, xe'ok chupam jun chke i wu'waq ja, xe'ok chutijawik kiwa xaq chutu'ik kiya'; xaq xkik'am b'i i saq-o'oj, an-o'oj xaq i k'ul chi o chila. Te'uri xkuwaj ronojel ni'pa ile. Chrijil chik ile, xe'e chupam jun chik wu'wik ja; xaq xkik'am chik i jalajuj taq b'iroxik chi o chila xaq xkuwaj chik.

⁹ Are uri xkib'ij chkiwach: —Utz ti kojtijin chu'anik, man wo'or are u'ijlal i utz laj tzij, xwiri yoj quwam uwach. We kqoy-ej k'a chweq o ni k-ab'ax uri chqij, utz we koj-e chub'ixkil che i ajawinel chila pa nim laj rachoch.

¹⁰ Are uri xe'ek, are xeuponik, xkisik'ij i chajal re i tinimit, xkib'ij chke: —Yoj xojupon chila ipa je o wi aj Siria, xwiri lik mijun winaq o chila, mitene ktataj uch'awb'al jun winaq. Xwi i kaway xaq axna je yuqul kan chila chwach che' xaq i ja chi wu'waq k'ul, lik k'a keje u'anom chrij pacha uyijb'axik ki'anom kan che; xecha.

¹¹ I chajinelab' chi je o pa okb'al re i nim laj tinimit, xesik'in chuya'ik utzijol pa nim laj rachoch i ajawinel wach taq xk'ulmaxik.

¹² Are uri xwalij i ajawinel, tupu cha'ab' chik xub'ij chke i je nimaq kipatan: Yin kinsaqij chiwe wach taq ketijin aj Siria chuch'ob'ik chqij yoj. Ike keta'am chi oj o chupam jun nim laj wa'jal, rumali chi xe'anmaj b'i chupam kimujb'al, xe'e chruwaxik kib' pa taq es. Man are kkaj ike chi are koj-el b'i pa tinimit kojkichapo, te'uri ke'ok li pqatinimit.

¹³ Jun chke i nimaq kipatan xub'ij: Chetaq nu b'i jo'ob' achiyab' man jo'ob' kaway k'a je olik, te'uri kqilo wach taq kkik'ulmaj we kek'asi'ik o kekamik, man ike chi ke'ek le xaq yoj chi kojkanaj kan waral, lik xaqjun ni k'ax kqak'ulmaj.

¹⁴ Are uri xkik'am b'i keb' ch'ich' re anb'al ch'oj chi jek'tal b'i kumal kaway, i ajawinel xeutaq b'i chila pa kimujb'al aj Siria, chutaqexik we je o chila xaq we je ntaj.

¹⁵ Are uri ike xeterej b'i chrij kaqanb'al aj Siria, k'a chila che i raqana Jordán. Are uri xkilo chi ronojel pa taq b'e k'aqtal kan k'ul xaq jalajuj taq b'iroxik chi kik'aqom kan aj Siria are xe'anmaj b'i pa'anem. Chrijil chik ile te'uri xetzalij li achiyab' le xekib'ij che i ajawinel ronojel ni'pa xkilo.

¹⁶ Te'uri konojel i winaq xe'el li pkitinimit, xe'e chuk'amik ronojel ni'pa xkiya kan aj Siria chupam kimujb'al. Lik keje ile xuk'ulmaj, chrij pacha xub'ij i Ajwal, chi xk'ayix jun juwinaq (21) ral taq k'ox jok'om trigo ru' jun saqpwaq, xaq ru' jun saqpwaq xk'ayix ni jo'ob' kawinaq (45) ral taq k'ox cebada.

¹⁷ Are uri i ajawinel xutaq i rajpatan chuchajixik i okb'al re i tinimit, xwiri i winaq xeik'aw puwi, xkiya'ya kan che aqan chila pa okb'al, keje uri ile chi xkamik chrij pacha xub'ij ma Eliseo, chi profeta, are xupon i ajawinel chrilik.

¹⁸ Lik keje ile xuk'ulmaj, chrij pacha xub'ij i profeta che i ajawinel: Chweq keje taq or iri: Che i okb'al re i tinimit Samaria klo' ni jun juwinaq (21) ral taq k'ox jok'om trigo ru' jun saqpwaq, xaq ru' jun saqpwaq xk'ayix ni jo'ob' kawinaq (45) ral taq k'ox cebada.

¹⁹ I rajpatan i ajawinel le xub'ij che i profeta: Chata pe', tupu i Ajwal kujaq i wantana chikaj, lik kuk'ulmaj ti ile chi kab'ij le. Xwiri ma Eliseo xub'ij che: Chata pe', lik ru' ab'a'wach kawil ni i xinb'ij le, xwiri yet, katij ti ile.

²⁰ Lik qatzij keje ile xuk'ulmaj, man i winaq xkiya'ya che aqan pa okb'al re i tinimit, rumali xkamik.