2 Reyes 6 - Wuj Pa K'ubultzij

I nim laj il chi x-iltaj che ikaj

¹ Xuk'ulmaj jun ij, i profeta xkib'ij che ma Eliseo: —Chata pe', i k'ijib'al ipa oj wi awu', lik xa pich'.

² Utz we koj-e chila chi raqana Jordán, man chila kqatzukuj wi qache', man kqa'an qachoch. Are uri ma Eliseo xub'ij: Utzi', jix.

³ Jun chke ike xub'ij: —Cha'ana jun utzil, chojawachnimaj. Are uri ma Eliseo xub'ij: —Utzi', kin-e iwu'.

⁴ Are uri ma Eliseo x-e ku' chuk'atzixik che' chila chi raqana Jordán.

⁵ Xuk'ulmaj chi jun chke i profeta, are ktijin chuk'atzixik i che', xtzaq b'i rikaj chupam i raqana. Are uri xsik'in chub'ixkil: —¡Tijonel, i ikaj le xa inchi'mam!

⁶ Are uri ma Eliseo chi profeta xutz'onoj: —¿Ipa xtzaq wi? —I achi xuk'ut che ipa xtzaq wi. Are uri ma Eliseo xuk'atzij jun che', xuk'aq b'i chila ipa xtzaq wi i ikaj, are uri xel li ikaj puwi i ya.

⁷ I ma Eliseo xub'ij: —Chachapa. Are uri i achi le xuji pan u'ab' chuk'amik i ikaj.

Ma Eliseo xaq i je aj Siria

⁸ I ajawinel re i tinimit Siria ktijin chu'anik ch'oj chkij aj Israel; are xki'an jun moloj ib' ku' konojel i je rajpatanib', xkib'ij ipa taq kkimol wi kib' chu'anik ch'oj.

⁹ Are uri ma Eliseo xutaq ub'ixkil che i ajawinel ke aj Israel chi meik'aw chila che i k'ijib'al ipa kkimol wi kib' aj Siria.

¹⁰ Keje uri ile chi i ajawinel ke aj Israel, xeutaq b'i achiyab' chi je yij che i ch'oj chila ipa xub'ij wi ma Eliseo chi profeta, rumali chi i ajawinel lik k'iyalmul xtotajik.

¹¹ I ajawinel re i tinimit Siria lik sachnaq unojb'al, rumali chi xeusik'ij konojel ni'pa i je rajpatanib', xub'ij chke: —¿Chib'ija chwe pachin chiwe yix uya'om uwach ru' i ajawinel ke aj Israel?

¹² Jun chke ike xub'ij che i ajawinel: —Mijun, ajawinel. Xwiri ile are ma Eliseo, chi profeta, chila pa tinimit Israel, are ire kb'iw che i ajawinel ke aj Israel, k'a kub'ij ne ronojel ni'pa kab'ij yet chupam i tasaj re i ja ipa katwar wi, chi lik mijun ktawik.

¹³ Are uri i ajawinel re i tinimit Siria xuya i taqaniki: —Chich'ob'o raqan ipa mer o wi ma Eliseo, man keintaq b'i jub'an achiyab' chuchapik xaq chuk'amik loq. Are uri xkib'ij che chi o chila pa tinimit Dotán.

¹⁴ Are uri i ajawinel xeutaq b'i jutzob'aj achiyab' chi je yij che i ch'oj je ajrij taq kaway, je aj pa ch'ich' re anb'al ch'oj xaq k'iyal achiyab' chi je yij che i ch'oj chi je ajchaqan; lik cha'ab' xeupon chila Dotán, xkisutij rij i tinimit le.

¹⁵ Are xsaqirik, xwalij i rajtaqon ma Eliseo xaq xel b'i chisaq; are uri xeril konojel i achiyab' chi je yij che i ch'oj chi kisutim rij i tinimit Dotán, je o ajrij taq kaway, je o aj pa ch'ich' re anb'al ch'oj xaq je o ajchaqan. Are uri x-e la pa'anem ru' ma Eliseo, xub'ij che: —Tijonel, tijonel, ¿Wach kqa'an wo'or?

¹⁶ Are uri ma Eliseo xub'ij: —Matok il xaq maxij awib', man lik je k'i i winaq chi je o qu' yoj chwach je o ku' ike.

¹⁷ Are uri ma Eliseo xlapan ru' i Dios, xub'ij: “Kintz'onoj utzil chawe, Wajwal, chi chajaqa ub'a'wach i wajtaqon, man keje ile ktzunik.” I Ajwal xujaq ub'a'wach i rajtaqon ma Eliseo che, are uri xril uwa taq jyub' chi lik je o k'iyal taq achiyab' chi je yij che i ch'oj je ajrij taq kaway, xaq je aj pa taq ch'ich' re a' chi kisutim rij ma Eliseo.

¹⁸ I achiyab' chi je yij che i ch'oj aj Siria, are ya kkijeq u'anik ch'oj chrij ma Eliseo; are uri ma Eliseo xutz'onoj chik che i Ajwal: “Kintz'onoj chawe, Wajwal, chi cha'ana mawach chke konojel i winaqi.” Are uri i Ajwal x-on mawach chke konojel i winaq, chrij pacha xutz'onoj ma Eliseo che.

¹⁹ Are uri ma Eliseo xub'ij chke: —Are ti i b'e iri chi kitzukuj xaq are ti i nim laj tinimit. Chixterej b'i chwij man kixink'am b'i k'a chila ipa o wi achi chi kitzukuj. Are uri xeuk'am b'i pa tinimit Samaria.

²⁰ Are xeupon chila, ma Eliseo xlapan chik ru' i Dios, xub'ij: “Wajwal, chajaqa kib'a'wach konojel i winaqi, man keje ile ketzunik.” Are uri ike xkilo chi je o pa tinimit Samaria.

²¹ I ajawinel ke aj Israel are xeril konojel i winaq le, are uri xutz'onoj che ma Eliseo: —Inqajaw, ¿Keinkamsaj nawi?

²² Xwiri ma Eliseo xub'ij: —Keakamsaj taj, ¿Xatab'a keakamsaj konojel i winaq ni'pa je aya'om prexil ru' ach'ich' xaq ru' ach'ab'? Are cha'ana cheatzuqu xaq chaya kiya', te'uri chetzalij chub'i ru' kajawinel.

²³ Are uri xyijb'ax jun nim laj nima'ij chke konojel ike. Xkitij kiwa xaq xkitu' kiya'; chrijil chik ile i ajawinel xeu'ijla b'ik, man ketzalij chub'i ru' kajawinel. Are uri aj Siria xe'ok ti chik pkulew aj Israel.

Ma Eliseo xaq i usutixik rij i tinimit Samaria

²⁴ Chrijil chik ronojel ile, ma Ben-adad, chi ajawinel re i tinimit Siria, xumol kichi' konojel i achiyab' chi je yij che i ch'oj, x-e chusutixik rij i tinimit Samaria chu'anik ch'oj chrij.

²⁵ Rumali chi xpe jun nim laj wa'jal pa tinimit Samaria, rumal xsutix rij ru' koral rumali chi ujolom jun axna lik xupon che i kajwinaq (80) saqpwaq, xaq nik'aj pexu ukis palomax, xupon che i jo'ob' saqpwaq.

²⁶ Xuk'ulmaj jun ij chi i ajawinel re i tinimit Israel, kb'in puwi i tapial chi nim uwach, are uri jun ixoq xsik'in chub'ixkil che: —¡Ajawinel, chinato!

²⁷ I ajawinel xub'ij che: —We katuto ti Ajwal ¿Wach taq ato'ik uri kin-an yin? ¿Kintiki taq uri yin chuya'ik a-trigo xaq i uwa'al uva muqb'am?

²⁸ Xwiri xutz'onoj che: —¿Wach xak'ulmaj? Are uri i ixoq le, xub'ij che: —I ixoq chi o waral xub'ij chwe chi kinya i wak'al che re kqatij wo'or; chweq te'uri kqatij chik i re ire.

²⁹ Keje uri ile chi xqayijb'a jun ti'b'alil che uch'akul i wak'al, te'uri xqatij b'ik. Xwiri chukab' ij, yin xinb'ij che chi kqatij i rak'al ire, xwiri ire xruwaj i rak'al.

³⁰ I ajawinel le are xuta wach taq xuk'ulmaj i ixoq, are uri xuraqch'ij u'u' rumal i roywal. Konojel i winaq xkinab'ej chi ajawinel le xukoj u'u' as, man tak'al li puwi i tapial chi nim uwach.

³¹ Are uri i ajawinel xub'ij: “Chuya ni utojb'alil i Ajwal chwe we wo'or kwesaj ti ujolom ma Eliseo, chi uk'ojol ma Safat.”

³² Ma Eliseo kul chila chi rachoch, junam ku' i rijab' re i tinimit. I ajawinel utaqom b'i jun rajpatan chila ru' ma Eliseo. Xwiri chuxe'el ruponik i rajpatan i ajawinel le, ma Eliseo xub'ij chke i rijab' re i tinimit: —Lik chiwila pe', i kamsanel xutaq li jun rajtaqon chrelsaxik injolom. Xwiri lik chikojo retalil, are kk'un i utaqon le waral, chitz'apij b'i uchija xaq chila'puj. Man chrijil chik ile kqata ni uk'unik i rajaw i taqon le chi teren li chrij.

³³ K'a ktijin ne ma Eliseo chi lapanik ku' i rijab' re i tinimit, are uri xupon pan rajpatan i ajawinel aj Samaria, xub'ij che ma Eliseo: —I nim laj k'axi are i Ajwal xutaq li chqe, we keje ile ¿Lik wach taq kqoy-ej chik uri?