2 Reyes 3 - Wuj Pa K'ubultzij

Rajawinik ma Joram pa tinimit Israel

¹ Are o chik wajxaqlajuj junab' che rajawinik ma Josafat pa tinimit Judá, i ma Joram, chi uk'ojol ma Acab, xujeq ajawinik puwi i tinimit Israel; kab'lajuj junab' xrajawin pa tinimit Samaria.

² Ronojel ni'pa xu'an ma Joram, lik utz taj chwach i Ajwal, xwiri xumaj taj pacha xki'an uqajaw uchuch, man ire xresaj i ab'aj chi xuyijb'a uqajaw kojb'al u'ij i tiox Baal.

³ Xwiri xaq xu'an i mak atzalal pacha xu'an ma Jeroboam, chi uk'ojol ma Nabat, chi rumal ile xeutzaqsaj konojel aj Israel chupam kimak

Ma Eliseo kutzijoj i ch'akanik puwi i tinimit Moab

⁴ I ma Mesa, chi ajawinel ke aj Moab, uchak ire are kk'iysaxik i chij, xaq lik arewi kujach jun alkawal che i ajawinel ke aj Israel chi are lajujmo' kab'lajujchiy (100,000) ral taq chij xaq lajujmo' kab'lajujchiy (100,000) mama'ib' chij chi elsam ti kismal.

⁵ Xwiri are xkam ma Acab, are uri i ajawinel ke aj Moab, xujeq ch'oj chrij i ajawinel ke aj Israel.

⁶ Are uri i ajawinel chi ma Joram xel chila pa tinimit Samaria, xumol kichi' xaq xerajlaj konojel i achiyab' chi je yij che i ch'oj aj Israel.

⁷ Are uri xutaq ub'ixkil che i ajawinel ke aj Judá: “I ajawinel aj Moab ktijin chu'anik ch'oj chwij, ¿Kinato nawi chu'anik ch'oj chkij aj Moab?” I ajawinel aj Judá xub'ij che: “Utzi', katwachnimaj chu'anik ch'oj, yin xaq inwinaq chi je yij che i ch'oj je ajchaqan xaq je ajrij taq kaway, oj o awu' yet xaq ku' awinaq.

⁸ Xwiri ¿Pachike b'e kqamaj b'ik?” Are uri ma Joram xub'ij che: “Are i b'e chi k-e pa tz'inilik jyub' chaqij chila pa Edom.”

⁹ Are uri i ajawinel aj Judá, aj Edom xaq aj Israel, xkimaj b'i kib'e. Xwiri wuqub' ij xkich'ijo man naj xesutin pa tz'inilik jyub' chaqij, rumali chi xk'is kiya' i winaq xaq xk'is kiya' i jalajuj taq chikop re kkitu'u.

¹⁰ Are uri i ajawinel ke aj Israel xub'ij: —¡B'ay! Wo'or kwil yin, i Ajwal xojuk'am li choj-oxib' ajawinelab', jachb'al qe pki'ab' aj Moab.

¹¹ Are uri ma Josafat xutz'onoj: —¿O nawi jun profeta waral, man kqatz'onoj che wach kub'ij i Ajwal chqe? Are uri jun chke i rajpatan i ajawinel ke aj Israel, xub'ij: —Olik, waral o ma Eliseo, chi uk'ojol ma Safat, ire le are te'eq tol re ma Elías.

¹² Ma Josafat xub'ij: —Jo' ri ru', man o ni uri utzij i Dios kub'ij chqe. Are uri i ajawinel ke aj Israel, ma Josafat xaq i ajawinel ke aj Edom, juntir xe'e la ru' ma Eliseo.

¹³ Xwiri ma Eliseo xub'ij che i ajawinel ke aj Israel: —¿Wach taq we yin chawe yet? We kawaj, jat chutz'onoxik chke i je profeta re ukojik u'ij i tiox Baal ke aqajaw achuch. Xwiri i ajawinel ke aj Israel xub'ij chik: —Kin-e taj, man i Ajwal xojuk'am li choj-oxib' waral, jachb'al qe pki'ab' aj Moab.

¹⁴ Are uri ma Eliseo xub'ij che: —Kinb'ij pub'i Ajwal, chi ronojel lik ktiki che, chi kinrilo; kinb'ij chawe, chi wetene yin kinkojon ti che ma Josafat chi ajawinel ke aj Judá, yin katinta teneri xaq katintzutza taj.

¹⁵ Xwiri, chib'isoj, chik'ama li jun ojmanel chwe —xcha ma Eliseo. Rumali chi xupon jun ojmanel; are xujeq ojmanik i ucho'ab' i Dios xqaj puwi ma Eliseo,

¹⁶ i ma Eliseo xub'ij: —Keje iri kub'ij i Ajwal: “Chi'ana k'iyal taq uk'ijib'al ya che uwa ta'aji,

¹⁷ man tupu nti tew xaq nti jab', xwiri i ta'aji knoj ni che i ya, keje ile kitu' ni iya' yix, kkitu' ni kiya' ichikop xaq ikaway.

¹⁸ Tupu ile xa jun ilb'al re ku'an i Ajwal chiwe, man Ire xaq keujach ni aj Moab pi'ab',

¹⁹ are uri yix kiwulijsaj ni ronojel i jalajuj taq tinimit chi sutim rij ru' tapial nim uwach, xaq i nimaq taq tinimit chi lik nim ki'ij; xaq kik'atzij ni ronojel i che' chi kuya uwach, kitz'apij ni ronojel i ralaxb'al ya xaq kinojsaj ni che ab'aj ronojel uwach ulew ipa ketikan wi.”

²⁰ Lik saq laj tzij, che ukab' ij, are xuriq i or re usujuxik i sipon, xk'un i ya che i b'e Edom chi xunojsaj uwach ronojel ulew.

²¹ I aj Moab xketamaj chi i ajawinelab' keupon chu'anik ch'oj chkij, rumali chi xekisik'ij konojel alab'om xaq achiyab' chi o chik kijunab' chu'anik ch'oj. Konojel xek'iji chila ipa kk'is wi uchi' i tinimit.

²² Are xsaqir chukab' ij, i ij lik kwalch'in puwi i ya, are uri aj Moab xkil i ya le chi lik kaq u'anom pacha i kik'.

²³ Rumali ike xkib'ij: “¡Chiwila pe', ile lik kik'! Ile are i ajawinelab' xki'an ch'oj chkiwach xaq xkikamsaj kib'. ¡Jo' la qonojel aj Moab, chuk'amik ub'itaq ke chi xkanaj kanoq!”

²⁴ Xwiri, are xe'ok b'i aj Moab chila ipa je o wi aj Israel, are uri aj Israel, xe'el li chu'anik ch'oj chkij xaq xki'an chke chi xe'anmaj b'ik, xwiri i aj Israel, xeterej b'i chkij k'a xekikamsaj.

²⁵ Te'uri xkiwulijsaj ronojel i jalajuj taq tinimit, xkinojsaj che ab'aj ronojel uwach ulew ipa ketikan wi, xkitz'apij ronojel i ralaxb'al ya xaq xkik'atzij ronojel i che' chi kuya uwach. Xwi xkanaj kan i tinimit chi Kir-hareset ub'i. Xwiri jub'an ajk'aqol ab'aj, xkisutij rij i tinimit le xaq xkisachsaj uwach.

²⁶ I ajawinel ke aj Moab, are xunab'ej chi je ajch'oj chrij ya ketiki chuch'akik, are uri xeusik'ij jo'lajujwinaq jumo' (700) achiyab' chi je yij che i ch'oj je ajchaqan, re kki'ana ch'oj chila ipa o wi i ajawinel ke aj Edom; xwiri xetiki ti che.

²⁷ Are uri xusik'ij uk'ojol atz, chi kkanaj te'eq puk'exel pa ajawinel, xusujuj re usipon puwi tapial nim uwach. Ile lik xupetsaj koywal aj Israel, rumali chi aj Israel le xetzalij chub'i pkitinimit.