2 Reyes 25 - Wuj Pa K'ubultzij

Utzaqik i Jerusalén

¹ Xwiri ma Sedequías xuqel i ajawinel aj pa tinimit Babilonia. Che i lajuj ij, che i lajuj ik' re ub'elej junab' rajawinik ma Sedequías, i ajawinel ma Nabucodonosor x-e chu'anik ch'oj pa Jerusalén junam ku' uwinaq chi je yij che i ch'oj xaq xusutij chik rij i tinimit xaq xe'uxlan chrij chwach. Xu'an ik'awb'al re ku'anb'ej ch'oj chkij.

² Che i julajuj junab' rajawinik i ajawinel ma Sedequías, i tinimit le k'a sutim rij.

³ Che i b'elejeb' ij re ukaj ik', che i junab' le, lik mas i numik xpe pa nim laj tinimit, i winaq lik nti chik o ku' re kkitijo.

⁴ Are uri xki'an jul chwach taq i tapial nim uwach re i nim laj tinimit. Tupu aj Caldea kisutim rij i tinimit, i ajawinel xaq konojel i achiyab' chi je yij che i ch'oj, xe'anmaj b'i pa nim laj tinimit cha'ab'. Konojel xe'el b'i che uchija chi o chuxol i keb' tapial chi nim uwach, che i b'e chi k-e pa tikonb'al kotz'ij chi o chi rachoch i ajawinel, te'uri xkimaj chub'i jun b'e chi k-e chwa ta'aj Jordán.

⁵ Xwiri i achiyab' chi je yij che i ch'oj aj Caldea, xeterej b'i chrij i ajawinel ma Sedequías; xetiki chuchapik k'a chwa ta'aj re i tinimit Jericó, chila chwa ta'aj le, i achiyab' chi je yij che i ch'oj xko'taj kanoq, ike to' xekicher b'ik.

⁶ I aj Caldea xkichap i ajawinel ma Sedequías, te'uri xkik'am b'i chwach i ajawinel aj Babilonia, chi o te chila pa tinimit Ribla, chi ukwenta ulew Hamat. Chila ma Nabucodonosor xub'ij wach utojb'alil kya' che ma Sedequías.

⁷ Lik chwach ma Sedequías xtaq uworik pkiqul i rak'al, xaq ire xtaq relsaxik ub'a'wach che, te'uri xtaq uyut'ik ru' karena k'amb'al b'i re pa tinimit Babilonia.

Uwulijsaxik i rachoch i Ajwal

⁸ Che i wuqub' ij, che i ujo' ik', re i b'elejlajuj junab' rajawinik ma Nabucodonosor, chi ajawinel pa tinimit Babilonia, i ma Nabuzaradán, chi are ajpatan re i ajawinel, aj-ok'al utzam chke i achiyab' chi je yij che i ch'oj re ma Nabucodonosor, xupon pa tinimit Jerusalén.

⁹ Are xupon pa nim laj tinimit Jerusalén, xunak' a' che i rachoch i Dios, che i nim laj rachoch i ajawinel xaq ronojel ni'pa i kachoch i winaq re i nim laj tinimit, xaq xk'at b'i kachoch konojel ni'pa nimaq kopis pa tinimit.

¹⁰ Xaq i achiyab' chi je yij che i ch'oj aj Caldea, chi je rachnimam ma Nabuzaradán, xkiwulijsaj li tapial nim uwach chi sutinnaq chrij i tinimit Jerusalén.

¹¹ Are uri ma Nabuzaradán xeuk'am b'i konojel i winaq pa Babilonia chi je kanajnaq kan pa nim laj tinimit xaq i jub'an chi xkiya kiwach ru' ajawinel aj Babilonia xaq i keb' oxib' chik aj-anol jalajuj taq b'iroxik ru' ab'aj.

¹² Xwi xkiya kan jujun winaq chi lik je nib'a', man kechakun chwach i ulew xaq kkitik uva.

¹³ I winaq aj Caldea xki'an ch'aqa taq che i jalajuj taq b'iroxik anch'ich' chi o prachoch i Ajwal, raqan taq ja, ukub'ib'al i raqan taq ja xaq i nim laj pila anch'ich'. Ronojel i anch'ich' le xkik'am b'i pa Babilonia.

¹⁴ Xaq xkik'am b'i i yab'al chaj, pala, k'atzb'al utzam kantela, i jalajuj taq lochb'al, ronojel i chapb'al re anch'ich' chi re kojb'al u'ij i Dios.

¹⁵ Xaq ma Nabuzaradán, chi aj-ok'al utzam ke achiyab' chi je yij che i ch'oj, xuk'am b'i ronojel i jalajuj taq b'iroxik chi saq-o'oj xaq i an-o'oj: Chi are yinb'al upam a'al xaq i nimaq taq laq.

¹⁶ I nim laj pila, i keb' raqan ja xaq ukub'ib'al i ja, chi uyijb'am ma Salomón re i rachoch i Dios, x-etamax taj ni'pa taq ralil i anch'ich' le man lik k'i.

¹⁷ I jujun raqan ja, o waqib' xik'ab' che i raqan, i retz'b'alil chi o puwi antal ru' anch'ich'; i retz'b'alil le o jun xik'ab' raqan. Puwi i retz'b'alil le, o jun k'ark'ar xaq o granada chrij chwach; ronojel ile is ru' anch'ich' antal wi. Xaq keje i jun chik raqan ja lik keje pacha ile.

Kelsaxik b'i i winaq re i tinimit Judá pa cho'ab' chwach kulew

¹⁸ I aj-atzil ke i ajchajinel xaq xuk'am b'i ma Seraías prexil, chi are atz laj ajsujul sipon, ma Sofonías chi are ukab' ajsujul sipon, xaq i oxib' chajinel chi je o chila xol uchija re i rachoch i Dios.

¹⁹ Chkixol i winaq chi je o kan pa tinimit, xk'am b'i aj-atzil ke i jalajuj taq tzob'ajil ke i achiyab' chi je yij che i ch'oj. Xaq xeuk'am b'i jo'ob' achiyab' chi lik are je rajpatan i ajawinel chi je o pa tinimit, i aj-atzil chi o chuqul utzukuxik achiyab' chi kkinawsaj kib' che u'anik i ch'oj xaq oxwinaq (60) chi nimaq kopis pa tinimit.

^20-21 Chrijil chik kik'amik b'i prexil ike le, i ma Nabuzaradán, xeuk'am b'i ru' i ajawinel re i tinimit Babilonia chi o chila pa tinimit Ribla. Chila che ulew Hamat, i ajawinel le xutaq kikamsaxik konojel. Keje uri ile chi konojel aj Judá, xe'elsax b'i chwach kulew.

Ki'anmajik b'i i winaq pa Egipto chi je kanajnaq kan pa Judá

²² Ma Nabucodonosor, chi ajawinel re i tinimit Babilonia, xuya kan ma Gedalías pa atol tzij pkiwi i winaq chi k'a xeukanaj kan pa tinimit Judá; i ma Gedalías le uk'ojol ma Ahicam xaq ri umam ma Safán.

²³ I aj-atzil ke achiyab' chi je yij che i ch'oj aj Judá, xaq konojel i achiyab' chi je yij che i ch'oj, are xketamaj wach xk'ulmaxik le, xe'e pa tinimit Mizpa che i lapanik ru' ma Gedalías. I kib'i achiyab' le je are iri: Ma Ismael, chi uk'ojol ma Netanías, ma Johanán, chi uk'ojol ma Carea; ma Seraías, chi uk'ojol ma Tanhumet, chi aj Netofa, xaq ma Jaazanías chi, uk'ojol jun achi aj Maaca. Konojel xeachnimax b'i kumal kiwinaq.

²⁴ Are uri ma Gedalías lik xub'ij pub'i i Dios chke ike xaq chke kiwinaq; xub'ij chke chi mkixij kib' chke i ajpatanib' aj Caldea, chekanaj kan pa jeqelem pa tinimit xaq chki'ana kipatan chrij i ajawinel aj Babilonia. Keje ile kkil ni uri chi ronojel lik utz ke'el ru'.

²⁵ Xwiri che i uwuq ik', ma Ismael, chi uk'ojol ma Netanías, chi xaq ri umam ma Elisama, chi alk'uwal re i ajawinel aj Judá, xupon chila pa tinimit Mizpa junam ku' lajuj achiyab'. Keje uri ile chi ma Ismael xaq i lajuj achiyab' le, xkikamsaj ma Gedalías, aj Judá xaq aj Caldea chi je o ru' ire.

²⁶ Are uri konojel i winaq rumal kixib'rikil chke aj Caldea, xe'el chila pkitinimit, xe'e pa Egipto; konojel chi ch'utiq chi nimaq xaq konojel i aj-atzil ke achiyab' chi je yij che i ch'oj.

Ma Joaquín xelsax prexil, xaq xya' u'ij pa Babilonia

²⁷ Xuk'ulmaj che i wuqlajuj juwinaq (37) junab' are xelsax b'i ma Joaquín chi ajawinel re i tinimit Judá pa cho'ab' chwach rulew, che i ij wuqub' juwinaq (27) re ik' kab'lajuj, xujeq ajawinik ma Evil-merodac pa tinimit Babilonia. I ajawinel le lik k'ax xuna ma Joaquín, rumali chi xresaj li prexil che i nab'e junab' re rajawinik.

²⁸ I ma Evil-merodac lik utz rilik ma Joaquín xu'an chkiwach i jub'an chik ajawinelab' chi je o ru' chila pa tinimit Babilonia.

²⁹ Keje uri ile chi ma Joaquín xresaj u'u' chi ukojom te'eq chila prexil xaq xya' uwa chila rumal i ajawinel ronojel ij re uk'aslemal.

³⁰ Xwi ta la ile, xaq ronojel ij re uk'aslemal ma Joaquín le, xya' umer re uk'aslemal rumal ma Evil-merodac, chi ajawinel pa Babilonia.