2 Reyes 24 - Wuj Pa K'ubultzij

¹ Che rajawinik ma Joacim, i ma Nabucodonosor, chi ajawinel re i tinimit Babilonia, xumaj kan i tinimit, are uri ma Joacim xk'iji oxib' junab' pu'ab' ma Nabucodonosor le. Xwiri ma Joacim xk'un unojb'al, are uri xqelan che ronojel ni'pa kb'ix che.

² Are uri i Ajwal xeutaq jub'an ili'omab' chrij ma Joacim, chi je aj Caldea, aj Siria, aj Moab xaq aj Amón. Xeutaq b'i pa ch'oj chkij aj Judá chupb'al uwach i tinimit le chrij pacha ub'im i Ajwal, chi xkib'ij i profeta.

³ Ronojel ile xuk'ulmaj i tinimit Judá, man keje urayijb'al i Ajwal ile che, elsab'al ke chwach ire, rumal i jalajuj taq mak atzalal chi xu'an ma Manasés,

⁴ xaq rumal i kamik chi kmajaw taj xu'ano, chi ru' ile xnoj uwach i tinimit Jerusalén che i kik'. Rumali i Ajwal xraj ti ukuyik kimak.

⁵ I jub'an chik lapanik chrij uk'aslemal ma Joacim xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Judá.

⁶ Chrijil ukamik ma Joacim xkanaj uk'ojol puk'exel chi a Joaquín.

⁷ Are uri i ajawinel aj Egipto lik xel ti chik pa nim laj utinimit, man i ajawinel aj Babilonia xumaj kan ronojel ni'pa rulew che; i ulew le kjeqan b'i che u'ab' i raqana Egipto kupon k'a che i raqana Éufrates.

Kik'amik b'i a Joaquín xaq i rach atol tzij pa tinimit Babilonia

⁸ A Joaquín o wajxaqlajuj junab' che are xujeq ajawinik, oxib' ik' xuch'ij pa ajawinel pa tinimit Jerusalén. I uchuch, ati Nehusta ub'i, chi umi'al ma Elnatán, chi aj Jerusalén.

⁹ Xwiri ronojel ni'pa xu'ano lik utz taj xril i Ajwal, man xu'ano pacha xu'an uqajaw.

¹⁰ Che taq i ij le, i achiyab' chi je yij che i ch'oj re ma Nabucodonosor, chi ajawinel re i tinimit Babilonia, xe'e pa ch'oj chrij i tinimit Jerusalén, xaq lik xkisutij rij.

¹¹ Are kisutim chik rij i nim laj tinimit, are uri xupon ma Nabucodonosor.

¹² Are uri ma Joaquín, chi ajawinel aj Judá, junam ru' uchuch xaq i je rajpatan, je unimaqil xaq i achiyab' chi kul k'uxij chke, xkijach kib' pu'ab' i ajawinel aj Babilonia, chrijil chik ile i ajawinel le xeuk'am b'i prexil. Ile xuk'ulmaj che uwajxaqib' junab' rajawinik ma Nabucodonosor.

¹³ Chrijil chik ile, ma Nabucodonosor xresaj li ronojel ni'pa i b'eyomal chi o prachoch i Ajwal, xaq ni'pa o pa nim laj rachoch i ajawinel, lik x-antajik chrij pacha ub'im i Ajwal, man xupaxij ronojel ni'pa i b'iroxik an-o'oj chi xu'an ma Salomón, chi ajawinel aj Israel, re i rachoch i Ajwal.

¹⁴ Te'uri xeuk'am b'i konojel ni'pa winaq aj Jerusalén prexil, xaq konojel i je aj-atzil, i achiyab' chi lik je yij che i ch'oj xaq lik ko kiwach, aj-anol jalajuj taq b'iroxik pa ab'aj xaq konojel je ajch'ayol ch'ich'. K'a xetz'aqat ni jo'mo' juchiy (10,000) winaq chi xek'am b'i prexil. Mijun winaq xkanaj kan pa nim laj tinimit, konojel xe'e prexil, xwi xek'am tu b'i i winaq chi lik je nib'a'.

¹⁵ Ma Nabucodonosor xeuk'am b'i ma Joaquín, uchuch, je rixoqil, je rajpatanib' xaq konojel i winaq chi lik nim ki'ij chi je o chila pa nim laj tinimit; konojel xeresaj b'i pa Jerusalén, xeuk'am b'i pa tinimit Babilonia.

¹⁶ I uk'iyal i achiyab' je lajujwinaq wuqlajujmo' (7,000) chi xeuk'am b'i i ajawinel aj Babilonia prexil, lajujwinaq kamo' (1,000) aj-anol jalajuj taq b'iroxik pa ab'aj, xaq lajujwinaq kamo' (1,000) ajch'ayol ch'ich', i uwi je are i achiyab' chi lik ko kiwach che i ch'oj.

¹⁷ Chrijil chik ile, i ajawinel aj Babilonia xuya kan a Matanías pa ajawinel puk'exel i rika' chi ma Joaquín. Xaq xujalwachij ub'i, xuya pub'i Sedequías.

Rajawinik a Sedequías

¹⁸ A Sedequías o jun juwinaq (21) junab' che are xujeq ajawinik, julajuj junab' xuch'ij pa ajawinel pa tinimit Jerusalén. I uchuch, ati Hamutal ub'i, chi umi'al ma Jeremías, chi aj Libna.

¹⁹ Xwiri ronojel ni'pa xu'ano lik utz taj xril i Ajwal, man xu'ano pacha xu'an ma Joacim.

²⁰ Rumali i Ajwal lik xpe roywal che i tinimit Jerusalén xaq che i tinimit Judá, rumali xeresaj chwach ire.