2 Reyes 22 - Wuj Pa K'ubultzij

Rajawinik a Josías pa tinimit Judá

¹ I a Josías o wajxaqib' junab' che are xujeq ajawinik, julajuj juwinaq (31) junab' xrajawin chila Jerusalén. I uchuch ati Jedida ub'i, chi umi'al ma Adaía chi aj Boscat.

² Ronojel ni'pa xu'an a Josías lik utz xaq lik suk'ulik chwach i Ajwal, man uk'aslemal lik keje pacha re ratit umam chi ma David, lik xjech'ab' ti uk'aslemal.

Uriqtajik i wuj chi o u'atb'al tzij i Dios chupam

³ Che i junab' wajxaqlajuj re rajawinik ma Josías, i ajawinel xutaq b'i i rajtz'ib', chi ma Safán, chila prachoch i Ajwal; i ma Safán le uk'ojol ma Azalía, chi ri umam ma Mesulam; xub'ij che:

⁴ —Jat chrilik ma Hilcías, chi atz laj ajsujul sipon, chab'ij che chi chumolo uchi' i mer chi k'amtal b'i prachoch i Ajwal, chi kimolom i ajchajinelab' chke i winaq.

⁵ Man kujach ni chke i achiyab' chi o chkiqul uyijb'axik i rachoch i Ajwal, man ike le kekitoj ni i ajchakib' chi kkiyijb'a i rachoch i Dios.

⁶ Tojb'al ke i ajanelab', aj-ok'al utzam chke i je ajyakol ja. Man kkilo'b'ej re i che' xaq i ab'aj chi lik chomiq antal che, re kkiyijb'a i u'anom mal che rachoch i Dios.

⁷ Xaq mkitz'onoj chke wach kki'an che i mer le, man ike utz uchapb'exik kki'ano man je suk'ul laj taq winaq.

⁸ Are uri ma Hilcías chi atz laj ajsujul sipon xub'ij che ma Safán chi ajtz'ib', chi xuriq i wuj re u'atb'al tzij i Dios prachoch i Ajwal; are uri xujach che ma Safán, i ma Safán le xrajlaj uwach.

⁹ Chrijil chik ile, i ma Safán x-e chub'ixkil ronojel che i ajawinel, keje iri xub'ij che: —Ajawinel, i je awajpatan xki'an ya che i saqpwaq pa a' chi o te'eq chila prachoch i Dios, xaq xkijach chke i aj-ok'al utzam re i chak prachoch i Dios.

¹⁰ Xwi ta la ile, xaq ma Safán xub'ij che i ajawinel, chi ma Hilcías, chi ajsujul sipon, xuya jun wuj che. Are uri ma Safán xrajlaj i wuj le che i ajawinel.

¹¹ I ajawinel are xuta wach kub'ij i wuj re u'atb'al tzij i Dios, are uri xuraqch'ij u'u'.

¹² Te'uri xub'ij chke achiyab', chi ma Hilcías, ma Ahicam, chi uk'ojol ma Safán, ma Acbor, chi uk'ojol ma Micaías, ma Safán, chi ajtz'ib', xaq ma Asaías, chi rajpatan i ajawinel:

¹³ Jix chutz'onoxik che i Ajwal chrij ink'aslemal yin, xaq chrij kik'aslemal i winaq re ronojel i tinimit, xaq chrij kik'aslemal konojel aj Judá, wach usuk' i wuj le chi xriqtajik; i Ajwal moq xa mi'naq roywal qu' yoj man i qatit qamam xekojon ti che wach tz'ib'tal chupam i wuji, xaq xki'an taj wach taq tz'ib'tal chupam.

¹⁴ Are uri ma Hilcías, ma Ahicam, ma Acbor, ma Safán xaq ma Asaías, xe'e chrilik ati Hulda, chi ati profeta, chi rixoqil ma Salum, chi uk'ojol ma Ticva, chi ri umam ma Harhas, chi o chuqul uk'olik i k'ul chi o chila prachoch i Dios. Ati Hulda jeqel chila che Ukab' Uxol b'e re i tinimit Jerusalén, are xkitz'onoj che,

¹⁵ ire xub'ij chke: —Keje iri kub'ij i Ajwal, chi ki-Dios aj Israel: “Chib'ij iri che i winaq chi ix utaqom li chutz'onoxik chwe,

¹⁶ Yin chi in Ajwal kinb'ij chiwe: Kink'am li jun nim laj k'ax puwi i k'ijib'ali xaq pkiwi uwinaq, chrij pacha tz'ib'tal chupam i wuj, chi xrajlaj uwach i ajawinel aj Judá.

¹⁷ Man in ko'tam kanoq xaq kik'atom pom chkiwach i tiox, xaq lik kipetsam woywal ru' ronojel ni'pa kki'ano le; rumali lik petnaq woywal che i k'ijib'ali chi lik kik'aw taj.

¹⁸ Chib'ij ut che i ajawinel aj Judá, chi xixtaqaw li chutz'onoxik che i Ajwal, chi i Ajwal chi ki-Dios aj Israel, xaq kub'ij: Rumal lik xakoj retalil wach i xata,

¹⁹ rumal upetik rutzil ak'ux, xaq rumal u'anik ajaj che awib' chinwach Yin, are xata wach inb'im chi kin-an ni che i k'ijib'ali, xaq chke uwinaq, man kinchup ni kiwach xaq lik keink'oqoj na, xwiri rumal uraqch'ixik a'u' xaq rumal xato' chinwach, lik xatinta na. Yin chi in Ajwal kinb'ij iri chawe.

²⁰ Rumali kinya ni chawe chi lik utz kamik ka'ano, xaq kiriq ni iwib' ku' awatit amam, xaq kawil ti uri ronojel ni'pa i jalajuj taq k'ax chi kinpetsaj ni puwi i k'ijib'ali.” Are uri i je ajtaqon re i ajawinel xetzalij chub'i chulapik wach xb'ix chke.