2 Reyes 2 - Wuj Pa K'ubultzij

Uk'amik b'i ma Elías chikaj

¹ Are xuriq i or chi i Ajwal kuk'am b'i ma Elías chikaj chupam jun kaqsut, i ma Elías xaq ma Eliseo xe'el li chila pa Gilgal.

² Ma Elías xub'ij che ma Eliseo: —Chatkanaj kan chi, man i Ajwal xinutaq b'i pa tinimit Betel. Xwiri ma Eliseo xub'ij che: —Kinb'ij pub'i i Ajwal xaq pa b'i yet, chi katinya ti kan atukel. Are uri xe'e junam pa tinimit Betel.

³ Xwiri i je profeta chi je jeqel chila pa tinimit Betel, xe'el li chuk'ulaxik ma Eliseo, xkib'ij che: —¿Aweta'am chik chi i Ajwal kuk'am b'i atijonel wo'or? Are uri ma Eliseo xub'ij: —Qatzij, weta'am chik, xwiri yix milap la.

⁴ Chrijil chik ile, i ma Elías xub'ij che ma Eliseo: —Chatkanaj kan chi, man i Ajwal kinutaq b'i pa tinimit Jericó. Xwiri ma Eliseo xub'ij che: —Kinb'ij pub'i i Ajwal xaq pa b'i yet, chi katinya ti kan atukel. Are uri xe'e junam pa tinimit Jericó.

⁵ Xwiri i je profeta chi je jeqel pa tinimit Jericó, xe'el li chuk'ulaxik ma Eliseo xkib'ij che: —¿Aweta'am chik chi i Ajwal kuk'am b'i atijonel wo'or? Are uri ma Eliseo xub'ij: —Qatzij, weta'am chik, xwiri yix milap la.

⁶ Chrijil chik ile, i ma Elías xub'ij che ma Eliseo: —Chatkanaj kan chi, man i Ajwal kinutaq b'i chi raqana Jordán. Xwiri ma Eliseo xub'ij che: —Kinb'ij chawe pub'i i Ajwal xaq pa b'i yet chi katinya ti kan atukel. Are uri xe'e junam chi raqana Jordán.

⁷ Xwiri xeupon lajuj kawinaq (50) je profeta, xekanaj kan naj pan jub'i' chkiwach ike; i ma Elías xaq ma Eliseo xetak'i pan chuchi' i raqana Jordán.

⁸ Are uri ma Elías xujol u'u' jurjik chi ukojom, xu'an b'orb'ik che, te'uri xub'uj chupam i ya, are uri i ya xujaq rib' upam; te'uri ike xeik'aw pa chaqij ulew.

⁹ Are je o chik ch'aqap, ma Elías xub'ij che ma Eliseo: —Chab'ij chwe wach utzil kawaj chi kin-an chawe wo'or, chi k'a oj o junam. Ma Eliseo xub'ij: —Kwaj yin kaya kan kamul ucho'ab' atewal pinwi.

¹⁰ Ma Elías xub'ij che: —Lik xa jub'i' ti katz'onoj, xwiri we kinawilo are kinelsax b'i awu', kya' ni uri chawe; xwiri we kinawil taj, lik kya' ti uri chawe —xcha.

¹¹ Tz'aqat ketijin che i b'e xaq ketijin che i lapanik, xaqte'et xwinaqir jun ch'ich' xaq jub'an kaway chi ronojel pacha a' ktoqowik chi xujach kixol. Keje uri ile chi ma Elías xk'am b'i chikaj chupam jun kaqsut.

¹² I ma Eliseo are xril ronojel ile, are uri ko xsik'in chub'ixkil: “¡Inqajaw, Inqajaw, chi at keje pacha kik'iyal achiyab' chi je yij che i ch'oj chke aj Israel!” Chrijil chik ile, xril ti chik uwach ma Elías, are uri ma Eliseo xuraqch'ij u'u', xu'an keb' che, k'utb'al re ub'is.

Ma Eliseo kkanaj kan puk'exel ma Elías

¹³ Te'uri juntir ma Eliseo le xuyak u'u' ma Elías chi jurjik chi xtzaq kanoq are xel b'i chikaj, chrijil chik ile xtzalij li chi raqana Jordán, chila xtak'i wi.

¹⁴ Are uri xuk'am i k'ul jurjik, xub'uj che i raqana xaq xsik'in chub'ixkil: “¿Ipa o wi i Ajwal chi u-Dios ma Elías?” Are lik k'ate xub'uj i k'ul pa ya, are uri i ya le xujaq rib' upam, xaq xe'el k'ulala; te'uri ma Eliseo xik'aw chuxol i ya pa chaqij ulew.

¹⁵ I je profeta chi je aj Jericó chi je o pan chwach, are xkil ile xkib'ij: “¡Utewal ma Elías o puwi ma Eliseo, wo'or!” Are uri xe'e chuk'ulaxik xaq xexuki'ik, xkiqajsaj kipalaj k'a chwach ulew.

¹⁶ Xkib'ij che: —Chata pe', chqaxol yoj chi oj awajchak je o lajuj kawinaq (50) achiyab' chi lik ko kiwach. Chaya chke chi ke'e chutzukuxik atijonel; qeta'am taj moqxa utewal i Dios xuk'am b'i che jun jyub' o xaq we che jun uwa ta'aj. Ma Eliseo xub'ij: —Ntaj, nti uchak kitaq utzukuxik.

¹⁷ Xwiri ike lik xki'an pen kib' chub'ixkil chi ke'e chutzukuxik ma Elías, rumali chi xya' b'i chke i lajuj kawinaq (50) achiyab' le chi lik ko kiwach; oxib' ij xkich'ij chutzukuxik, xwiri xkiriq taj.

¹⁸ Te'uri xetzalij chali pa Jericó ipa kanijnaq wi kan ma Eliseo, are xeupon ru', ire xub'ij chke: —Yin xinb'ij chiwe chi kix-e taj.

Ma Eliseo k-on ch'am che i ralaxb'al ya pa Jericó

¹⁹ I winaq chi je o chila pa tinimit Jericó xkib'ij che ma Eliseo: —Chata pe', i tinimit lik utz uk'ijib'al, xwiri pacha kawilo, i ya lik ch'am taj xaq i ulew lik k-on ti utz i tikon chwach.

²⁰ I ma Eliseo xub'ij chke: —Chik'ama li jun yab'al k'ak' chwe, chiya li atz'am chupam —xcha. Are xyataj tan i yab'al che le,

²¹ i ma Eliseo x-e chila ipa o wi ralaxb'al ya, are xuponik, xuk'aq b'i atz'am chupam i ralaxb'al ya le, xub'ij: —Keje iri kub'ij i Ajwal: “Yin in-anom chik ch'am che i ya ri, wo'or mijun kkam chik, xaq k-on ti chik che ulew chi kuya ti uwach.”

²² Lik che i or tan le, i ya x-on kan ch'am k'a arewi wo'or chrij pacha xub'ij ma Eliseo.

²³ Chrijil chik ile, i ma Eliseo xel chila, x-e pa Betel. Are xumaj b'i ub'e, o jun tzob'aj alab'om je aj pa tinimit, xe'el li pa b'e, xe'ok chuyo'yaxik; kesik'in chub'ixkil che: “¡Chatpaqal b'ik, ma ch'olom puja'! ¡Chatpaqal b'ik, ma ch'olom puja'!”

²⁴ I ma Eliseo xusutij rib' chkitaqexik, xeuk'oqoj pub'i i Ajwal. Are uri juntir xe'el li keb' atitab' yum pa taq es, xeki'an ch'aqa taq chke i keb' kawinaq (42) alab'om le.

²⁵ Chrijil chik ile, i ma Eliseo x-e puwi i jyub' Carmelo, are xel chila, xtzalij chub'i pa tinimit Samaria.