2 Reyes 18 - Wuj Pa K'ubultzij

Rajawinik ma Ezequías pa tinimit Judá

¹ Che urox junab' rajawinik ma Oseas, chi uk'ojol ma Ela, chi ajawinel re i tinimit Israel, are uri xujeq ajawinik ma Ezequías, chi uk'ojol ma Acaz, chila pa tinimit Judá.

² Ma Ezequías o jo'ob' juwinaq (25) junab' che are xujeq ajawinik. B'elejeb' juwinaq (29) junab' xrajawin pa tinimit Jerusalén. I uchuch ati Abi ub'i, chi umi'al ma Zacarías.

³ Ronojel ni'pa xu'an ma Ezequías lik utz xril i Ajwal, keje pacha i utz chi xu'an i etz ratit umam chi ma David.

⁴ Ma Ezequías le are ire xelsaw i k'iyal taq lo'laj k'ijib'al ipa koksax wi u'ij i tiox, x-on ch'aqa taq che i k'iyal taq ab'aj chi o u'ij chke i winaq, xupaxij k'iyal taq tiox re uk'exwach ati Asera xaq xu'an ch'aqa taq che i kumatz chi re ab'aj an-o'oj chi xu'an ma Moisés, xaq i Nehustán kkib'ij che, chi lik k'a arewi aj Israel kkik'at pom chwach.

⁵ Ma Ezequías xukub'a uk'ux che i Ajwal, chi ki-Dios aj Israel. Chkixol konojel i jalajuj taq ajawinelab' aj Judá chi xek'iji chuxe'el xaq chrijil chik ire, lik nti chik jun chik pacha ire.

⁶ Ire lik xukub'a uk'ux che Ajwal, man lik xujek' ti rib' ru', xaq xu'an ronojel ni'pa i kub'ij utzij upixab' chi xuya i che ma Moisés.

⁷ Rumali i Ajwal lik o putzal xaq lik xuya i jalajuj taq ch'akanik che ru' ronojel ni'pa xu'ano. I ma Ezequías le xu'an ch'oj chrij i ajawinel aj Asiria, lik xuya ti chik rib' che chi ku'an taq upatan chrij.

⁸ Xaq xu'an k'ax chke aj Filistea chi je jeqel chila che ulew Gaza xaq i jub'an chik chi je o che i ulew ipa o wi i tak'taq ja chi re ilb'al, k'a chila che i jalajuj taq tinimit chi sutim rij ru' i tapial nim uwach.

Kich'akik aj Samaria

⁹ Che ukaj junab' rajawinik ma Ezequías, chi are i uwuq junab' rajawinik ma Oseas, chi uk'ojol ma Ela chila pa tinimit Israel, i ma Salmanasar, chi ajawinel re i tinimit Asiria, xusutij rij i nim laj tinimit Samaria xaq xu'an ch'oj chrij.

¹⁰ Are ik'awnaq chik oxib' junab', are uri xtiki chuch'akik i tinimit le. Ile xuk'ulmaj che uwaq junab' rajawinik ma Ezequías, chi xaq are i ub'elej junab' rajawinik ma Oseas pa tinimit Israel, are xk'am kan i tinimit Samaria.

¹¹ I ajawinel re i tinimit Asiria xeresaj b'i konojel aj Israel chi je o chila pa tinimit, xeuk'am b'i Asiria, xeuya chila pa tinimit Halah chi o chupam ulew Habor chi are i raqana chi kik'aw chila pa Gozán, xaq xeuya chila pa nimaq taq tinimit ke aj Media.

¹² Xkik'ulmaj ile man xekojon ti che i Ajwal chi ki-Dios, xkisach utrat xaq xekojon ti che ronojel ni'pa xub'ij ma Moisés chke, chi rajpatan i Dios; ike lik xki'an taj.

Uk'amik kan i Judá rumal ma Senaquerib

¹³ Che ukajlajuj junab' rajawinik ma Ezequías, ma Senaquerib, chi ajawinel re i tinimit Asiria, xu'an ch'oj chkij konojel i nimaq taq tinimit Judá chi o tapial nim uwach chkij xaq xeuk'am kanoq.

¹⁴ Are uri ma Ezequías chi ajawinel re i tinimit Judá, xutaq ub'ixkil che i ajawinel re i tinimit Asiria, chi o chila pa tinimit Laquis, keje iri xub'ij che: “Xin-an jun utz taj; chatel b'i chupam intinimit, yin kintoj ni alkawal chawe chi katz'onoj chwe.” Are uri i ajawinel re i tinimit Asiria xutz'onoj jo'lajujwinaq kamo' (1,100) tintal saq-o'oj xaq wajxaqib' jo'winaq (108) tintal an-o'oj re alkawal che ma Ezequías, chi ajawinel re i tinimit Judá.

¹⁵ I ma Ezequías xujach ronojel ni'pa i saq-o'oj chi xuriq prachoch i Ajwal xaq ronojel ni'pa i b'eyomal chi o chila pa nim laj rachoch i ajawinel.

¹⁶ Xaq lik che i ij le, i ma Ezequías xresaj uchija che i rachoch i Ajwal xaq i uchapb'al uchija le; chi lik are ire ch'uquwnaq rij ru' an-o'oj, te'uri xuya che i ajawinel re i tinimit Asiria.

¹⁷ Chrijil chik ile i ajawinel re i tinimit Asiria xutaq b'i jun ajpatan chi atz u'ij, jun aj-ok'al utzam chi kul uk'ux che, xaq jun chik ajpatan chi atz u'ij. Ike le xenab'ej b'i chkiwach jub'an achiyab' chi je yij che i ch'oj, xeik'aw Laquis, xe'e k'a Jerusalén anb'al ch'oj. Are xeupon Jerusalén xe'uxlan chila chuchi' i toma chi kpe chupam i k'olb'al ya chila ajsik, che i b'e chi k-e pa k'ijib'al chi “Ch'ajb'al k'ul” ub'i.

¹⁸ Are uri xkisik'ij ma Ezequías chi ajawinel, xaq ma Eliaquim chi uk'ojol ma Hilcías, chi aj-atzil chila pa nim laj rachoch i ajawinel, ma Sebna, chi ajtz'ib' xaq ma Joa, chi uk'ojol ma Asaf, chi ajtz'ib' re i ajawinel, xe'e chuk'ulaxik kib' ku' i je ajch'oj chkij.

¹⁹ Chila i rajpatan i ajawinel aj Asiria xub'ij chke: —Chib'ija i tziji che ma Ezequías chi i nim laj ajawinel aj Asiria xutaq ub'ixkil: “¿Wach taq che lik akub'am wi ak'ux?

²⁰ ¿Kach'ob' wa yet chi i chomiq laj taq tzij xaqjun ru' jun utz laj ch'ob'onik re anb'al ch'oj xaq xaqjun ru' i cho'ab'? ¿Pachin wa che akub'am wi ak'ux man kinaqelo?

²¹ Kwil yin chi yet li akub'am ak'ux chke aj Egipto chi katkito. Utzi' xwiri i tinimit Egipto keje pacha jun ajij chaqij chi patz'tajnaq, we o jun kuk'am ucho'ab' che kok b'i che u'ab'. Ile are ma faraón, chi ajawinel pa Egipto, i tziji ke konojel ni'pa kkikub'a kik'ux che ire.

²² We yix kib'ij chwe: Yoj qakub'am qak'ux che i Ajwal chi qa-Dios, ¿Xelsax tab'a wa i jalajuj taq sujb'al usipon i Dios le rumal ma Ezequías xaq i k'ijib'al re kojb'al u'ij, xaq xutaq ub'ixkil chi konojel i winaq aj Judá xaq aj Jerusalén kkiya ni u'ij xwi chila che i sujb'al sipon chi o pa tinimit Jerusalén?

²³ Cha'ana jun trat ru' wajaw chi are i ajawinel chila pa tinimit Asiria: Yin kinya uri jo'mo' (2,000) kaway chawe, we yet kattiki chutzukuxik achiyab' chi je ajrij taq kaway.

²⁴ Yet kattiki tene chroqtaxik b'i i jun chi pich' u'ij chke i ajpatanib' aj Asiria, ¿Kawoy-ej b'ari achiyab' ajrij taq kaway, xaq ch'ich' re anb'al ch'oj ke aj Egipto?

²⁵ Xwi ta la ile ¿Kach'ob' yet ile chi yin xink'un chu'anik ch'oj, xaq chuchupik uwach i tinimiti we inb'im ti che i Ajwal? ¡Are ire xintaqaw chu'anik ch'oj xaq chuchupik uwach atinimit!”

²⁶ Are uri ma Eliaquim, ma Sebna xaq ma Joa, xkila' uwach che ajpatan aj Asiria: —Cha'ana utzil chqe chi chatch'aw qu' pa ch'ab'al aj Aram man yoj kqata ile, xwiri moja'ijla pa Hebreo, man i winaq chi je o chila puwi i tapial nim uwach kkita.

²⁷ Xwiri i ajpatan aj Siria xub'ij: —Yin in utaqom ta li ajawinel re Asiria i chub'ixkil i tziji che iwajaw xaq chiwe yix, i tzij chi kinb'ij ke iwinaq chi je o puwi i tapial nim uwach le. Man ike xaq keje yix iwonojel, kitij ni ikis xaq kitu' ni ichul.

²⁸ Are uri i ajpatan xtak'i chkiwach xaq xsik'in chub'ixkil pkich'ab'al aj Hebreo: —Chita wach kub'ij i nim laj ajawinel aj Asiria chiwe:

²⁹ “Miya iwib' chi kixut'or ma Ezequías, man ire ktiki ti chito'ik pin-ab'.”

³⁰ We ma Ezequías lik kub'ij chiwe chi kkikub'a ik'ux che i Ajwal, xaq kub'ij chiwe: “Qatzij i Ajwal lik kojuto na, Ire kuya taj chi i nim laj tinimiti ktzaq ni pu'ab' i ajawinel aj Asiria.”

³¹ Lik mixkojon uri che. I ajawinel aj Asiria xinutaq li chub'ixkil chiwe chi chi'ana i chomb'al k'uxij chiwach ru' ire, xaq lik chqaj ik'ux; keje ile chijujunal kitij ni uwach utikon chi are i uva xaq i higo, xaq kitu' ni ya chi kresaj li puk'otom.

³² Chrijil chik ile kixuk'am nu b'i che chik jun tinimit chi kmajawik pacha iwe yix, lik are jun tinimit chi lik k-on utz i trigo xaq i uva re anb'al lejom wa re trigo xaq i uwa'al uva muqb'am. Xaq lik are jun tinimit chi lik o i aceite oliva xaq lik o uwa'al kab'; yix lik utz uri kixk'iji'ik xaq lik kixkam taj. Xwiri mixkojon che ma Ezequías le, xa kixut'oro, man kub'ij chiwe chi kixuto i Ajwal.

³³ ¿O wa jun chke i tiox chi re jub'an chik tinimit xtiki chkito'ik kitinimit pu'ab' i ajawinel aj Asiria?

³⁴ ¿Ipa je o wi kitiox aj Hamat xaq aj Arfad? ¿Ipa je o wi kitiox aj Sefarvaim, aj Hena xaq aj Iva? ¿Xetiki wa chkito'ik aj Samaria pki'ab' aj Asiria?

³⁵ ¿Pachin taq wa chke i k'iyal taq tiox le re i jalajuj taq tinimit, xtiki chuto'ik kulew pu'ab' i ajawinel aj Asiria? ¿B'uchak uri kich'ob' yix chi i Ajwal ktiki chuto'ik i tinimit Jerusalén?

³⁶ Konojel i winaq lik xech'aw ti chik, lik mitene jun tzij xkib'ij chik, man i ajawinel xub'ij chi mijun kch'awik.

³⁷ Are uri ma Eliaquim, chi uk'ojol ma Hilcías, chi aj-atzil chila pa nim laj rachoch i ajawinel, ma Sebna, chi ajtz'ib' xaq ma Joa, chi ajtz'ib' re i ajawinel, xkiraqch'ij ki'u' rumal kib'is, te'uri xe'e chrilik i ajawinel ma Ezequías, man kkilap ronojel che wach xub'ij i atz laj ajpatan chke.