2 Reyes 15 - Wuj Pa K'ubultzij

Rajawinik ma Azarías pa tinimit Judá

¹ Che i wuqub' juwinaq (27) junab' rajawinik ma Jeroboam, pa tinimit Israel, are uri xujeq ajawinik a Azarías, chi uk'ojol ma Amasías, ajawinel re i tinimit Judá.

² A Azarías o waqlajuj junab' che are xujeq ajawinik, kab'lajuj kawinaq (52) junab' xrajawin pa tinimit Jerusalén. I uchuch ati Jecolías ub'i aj Jerusalén.

³ Ronojel ni'pa xu'an ma Azarías lik utz xaq lik suk'ulik chwach i Ajwal, keje pacha xu'an ma Amasías chi uqajaw.

⁴ Xwiri xresaj ti jalajuj taq lo'laj k'ijib'al ipa koksax wi ki'ij i jalajuj taq tiox, rumali konojel i winaq k'a kkisujuj kisipon xaq kkiporoj pom.

⁵ Rumali i Ajwal xuya jun tojb'al che i ajawinel le ru' jun itzel laj yob'il che tz'umalil, k'a xkam na. Chuxe'el ukamik i ajawinel le, xk'iji utukel che chik jun ja chila chupam i nim laj rachoch i ajawinel, ma Jotam chi uk'ojol, xkanaj chuk'amik utzam i tinimit Judá.

⁶ I jub'an chik lapanik chrij uk'aslemal ma Azarías xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Judá.

⁷ Are xkam ma Azarías, xkimuq chila ku' i ratit umam pa nim laj tinimit re ma David; chrijil chik ire, xkanaj kan uk'ojol puk'exel chi ma Jotam.

Rajawinik ma Zacarías pa tinimit Israel

⁸ Che i wajxaqlajuj juwinaq (38) junab' rajawinik ma Azarías, pa tinimit Judá, are uri xujeq ajawinik ma Zacarías, chi uk'ojol ma Jeroboam, pa tinimit Israel. Waqib' ik' xrajawin pa tinimit Samaria.

⁹ Xwiri ronojel ni'pa xu'ano lik utz taj chwach i Ajwal keje pacha xki'an i ratit umam, man xu'an ronojel ni'pa i mak atzalal chi xu'an ma Jeroboam, chi uk'ojol ma Nabat, chi xeutzaqsaj aj Israel chupam kimak.

¹⁰ Xwiri ma Salum, chi uk'ojol ma Jabes, xu'an ch'oj chrij ma Zacarías, xu'an k'ax che chila pa Ibleam, xukamsaj xaq xkanaj ire puk'exel pa ajawinel.

¹¹ I jub'an chik lapanik chrij uk'aslemal ma Zacarías xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Israel.

¹² Keje uri ile chi x-antaj ni ronojel ni'pa xub'ij i Ajwal che ma Jehú, man Ire xub'ij che chi konojel i ralk'uwal kekub'i ni pa kub'ib'al chi o u'ij re Israel k'a chukaj lemajil.

Rajawinik ma Salum pa tinimit Israel

¹³ Che i b'elejlajuj juwinaq (39) junab' rajawinik ma Uzías pa tinimit Judá, are uri xujeq ajawinik ma Salum, chi uk'ojol ma Jabes. Xa jun ik' xrajawin pa tinimit Samaria.

¹⁴ Ma Manahem, chi uk'ojol ma Gadi, xel chila che i tinimit Tirsa, xupon chila pa tinimit Samaria chukamsaxik ma Salum; chrijil chik ile xkanaj kan ire puk'exel pa ajawinel.

¹⁵ I jub'an chik lapanik chrij uk'aslemal ma Salum xaq ronojel ni'pa i ch'oj chi xu'an chrij ma Zacarías, tz'ib'tal chupam i wuj crónicas ke i ajawinelab' aj Israel.

¹⁶ Ma Manahem xuchup uwach i tinimit Tifsa xaq xrel-aj b'i ronojel ni'pa i jalajuj taq b'iroxik chi o chila, xaq keje ile xu'an chila pa tinimit Tirsa. Chila che i tinimit le, xujaq kipam konojel ixoqib' chi je k'aqtajnaq; xu'an ile chke man xkijaq ti uchija che re i nim laj tinimit.

Rajawinik ma Manahem pa tinimit Israel

¹⁷ Che i b'elejlajuj juwinaq (39) junab' rajawinik ma Azarías pa tinimit Judá, are uri xujeq ajawinik ma Manahem, chi uk'ojol ma Gadi pa tinimit Israel. Lajuj junab' xrajawin pa tinimit Samaria.

¹⁸ Xwiri ronojel ni'pa xu'ano lik utz taj chwach i Ajwal, man xu'an ronojel ni'pa i mak atzalal chi xu'an ma Jeroboam, chi uk'ojol ma Nabat, xu'an chke aj Israel chi xemakun chwach i Dios. Che taq i ij le,

¹⁹ ma Pul, chi ajawinel re i tinimit Asiria, xumaj ulew Israel. Are uri ma Manahem xuya wuqub' waqlajujwinaq jumo' (727) tintal saqpwaq che ma Pul, man kuyab'ej ucho'ab' rajawinik i ajawinel.

²⁰ Ronojel i tojonik le chi xu'an ma Manahem, xutz'onoj jun alkawal chke i b'eyomab', xub'ij chke chi chkijujunal kkiya jun pexu saqpwaq. Keje uri ile chi ajawinel xtzalij b'i pa tinimit Asiria, nti chik tzij xutzukuj.

²¹ I jub'an chik lapanik chrij uk'aslemal ma Manahem xaq ronojel ni'pa i xu'ano, tz'ib'tal chupam i wuj Crónicas ke i ajawinelab' aj Israel.

²² Chrijil ukamik ma Manahem xrajawin kan uk'ojol puk'exel chi ma Pekaía.

Rajawinik ma Pekaía pa tinimit Israel

²³ Che i lajuj kawinaq (50) junab' rajawinik ma Azarías pa tinimit Judá, xujeq ajawinik ma Pekaía, chi uk'ojol ma Manahem, pa tinimit Israel. Keb' junab' xrajawin pa tinimit Samaria.

²⁴ Xwiri ronojel ni'pa xu'ano lik utz taj xril i Ajwal, man xujek' ti rib' che ronojel ni'pa i mak atzalal chi xu'an ma Jeroboam uk'ojol ma Nabat, chi xeutzaqsaj aj Israel chupam kimak.

²⁵ Xwiri jun rajpatan chi ma Peka ub'i, chi uk'ojol ma Remalías, xu'an ch'oj chrij ma Pekaía, xu'an k'ax che xaq xukamsaj chila pa Samaria chupam i nim laj rachoch i ajawinel, junam ku' lajuj kawinaq (50) achiyab' chi je aj Galaad, xkikamsaj xaq xkanaj ire pa ajawinel puk'exel.

²⁶ I jub'an chik lapanik chrij uk'aslemal ma Pekaía, tz'ib'tal chupam i wuj Crónicas, ke i ajawinelab' aj Israel.

Rajawinik ma Peka pa tinimit Israel

²⁷ Che i kab'lajuj kawinaq (52) junab' rajawinik ma Azarías pa tinimit Judá, xujeq ajawinik ma Peka, chi uk'ojol ma Remalías, pa tinimit Israel. Juwinaq junab' xrajawin pa tinimit Samaria.

²⁸ Xwiri ronojel ni'pa i xu'ano lik utz taj xril i Ajwal man xujek' ti rib' che ronojel ni'pa i mak atzalal chi xu'an ma Jeroboam, uk'ojol ma Nabat, chi xeutzaqsaj aj Israel chupam kimak.

²⁹ Che taq ij re rajawinik ma Peka pa tinimit Israel, xupon ma Tiglat-pileser, chi ajawinel re i tinimit Asiria. I ajawinel le, xumaj i tinimit Ijón, Abel-bet-maaca, Janoa, Cedes, Hazor, Galaad, Galilea xaq ronojel ulew Neftalí; konojel i winaq xeuk'am b'i prexil pa tinimit Asiria.

³⁰ Are uri ma Oseas, chi uk'ojol ma Ela, xujeq ch'oj chrij ma Peka, chi uk'ojol ma Remalías, xu'an k'ax che xaq xukamsaj. Keje uri ile chi ma Oseas xkanaj puk'exel pa ajawinik che i junab' juwinaq (20) che rajawinik ma Jotam, chi uk'ojol ma Uzías.

³¹ I jub'an chik lapanik chrij uk'aslemal ma Peka, xaq ronojel ni'pa i xu'ano, tz'ib'tal chupam i wuj crónicas ke i ajawinelab' aj Israel.

Rajawinik ma Jotam pa tinimit Judá

³² Che i ukab' junab' rajawinik ma Peka, chi uk'ojol Remalías, ma Jotam, chi rak'al ma Uzías, xujeq ajawinik pa tinimit Judá.

³³ Ma Jotam o jo'ob' juwinaq (25) junab' che are xujeq ajawinik, waqlajuj junab' x-ajawin pa tinimit Jerusalén. I uchuch ati Jerusa ub'i, chi umi'al ma Sadoc.

³⁴ Ronojel ni'pa xu'an ma Jotam, lik suk'ulik chwach i Ajwal pacha xu'an uqajaw chi ma Uzías.

³⁵ Ma Jotam xu'an i nim laj uchija re i rachoch i Ajwal. Xwiri xelsax ti jalajuj taq lo'laj k'ijib'al ke i tiox, rumali i winaq k'a xkisujuj kisipon xaq k'a xkiporoj pom.

³⁶ I jub'an chik lapanik chrij uk'aslemal ma Jotam xaq ronojel ni'pa i xu'ano, tz'ib'tal chupam i wuj crónicas ke i ajawinelab' aj Judá.

³⁷ Che taq i ij le, i Ajwal xujeq utaqik b'i ma Rezín, chi ajawinel re i tinimit Siria, xaq ma Peka, chi uk'ojol ma Remalías, chu'anik ch'oj chrij i tinimit Judá.

³⁸ Are xkam ma Jotam, xkimuq chila prulew ma David ipa je muqtal wi i ratit umam; chrijil chik ile, xrajawin kan uk'ojol puk'exel, chi ma Acaz.