2 Reyes 14 - Wuj Pa K'ubultzij

Rajawinik ma Amasías pa tinimit Judá

¹ Che ukab' junab' rajawinik ma Joás chi uk'ojol ma Joacaz pa tinimit Israel, i ma Amasías chi uk'ojol ma Joás, xujeq ajawinik pa tinimit Judá.

² Ma Amasías o jo'ob' juwinaq (25) junab' che are xujeq ajawinik, xrajawin b'elejeb' juwinaq (29) junab' pa tinimit Jerusalén. I uchuch ati Joadán ub'i, ire le aj pa tinimit Jerusalén.

³ Ronojel ni'pa xu'an ma Amasías lik utz xaq suk'ulik chwach i Ajwal, xwiri keje taj pacha xu'an umam chi mam David, man ire lik keje xu'ano pacha xu'an uqajaw chi ma Joás,

⁴ xaq xkesaj ti jalajuj taq lo'laj k'ijib'al ke i tiox, rumali i tinimit xumayij ti usujuxik sipon xaq uporoxik pom.

⁵ Ma Amasías are lik xkowir uwach pa ajawinik, xeukamsaj konojel ni'pa je aj-atzil chi xekamsaw uqajaw.

⁶ Xwiri xeukamsaj ti kak'al i je ajkamsanel, chrij pacha tz'ib'tal chupam i wuj re u'atb'al tzij ma Moisés chi keje iri kub'ij: I Ajwal xub'ij: “I qajawxelab' kmajaw taj chi kekamsax rumal kimak i kalk'uwal, xaq i kalk'uwal kmajaw taj kekamsax rumal kimak i kiqajaw.” Lik chkijujunal kekam ni rumal kimak chi ki'anom.

⁷ Ma Amasías are ire xekamsaw i jo'mo' juchiy (10,000) aj Edom “Chwa Ta'aj chi Atz'am” ub'i xaq xumaj kan i tinimit Sela, xuya pub'i Jocteel chi k'a are ub'i ile wo'or.

⁸ Chrijil chik ile, xutaq b'i utzijol ru' ma Joás, chi uk'ojol ma Joacaz, xaq ri umam ma Jehú, ajawinel ke aj Israel, i tzij chi xutaq b'i ub'ixkil keje iri kub'ij: “Chatpetoq, man kqa'an ch'oj awu'.”

⁹ Xwiri ma Joás xutaq ub'ixkil i tziji che: “I k'ix xub'ij che i che' chakalte' chi o chwi taq jyub' Líbano: Chaya ami'al che ink'ojol, man ku'an rixoqil che. Xwiri jun itzel chikop xik'aw chila xuya'ya kan i k'ix le.

¹⁰ Yin weta'am chi xeach'ak aj Edom, rumali kana yet chi nim a'ij, xaq lik kattijin chutzukuxik mas a'ij; xwiri utz na we katkanaj kan chi awachoch. ¿B'uchak kawaj chi katzukuj i k'ax pawi xaq pkiwi i tinimit Judá?”

¹¹ Xwiri ma Amasías xkojon ti che. Are uri ma Joás xumaj b'i ub'e chu'anik ch'oj chrij ma Amasías chila pa tinimit Bet-semes chi ukwenta ulew Judá.

¹² I utzob'ajil ma Judá, xech'ak kumal aj Israel, rumali chi chkijujunal xe'e pa'anem chi taq kachoch.

¹³ Ma Joás, chi ajawinel re i tinimit Israel, xumin ma Amasías prexil chila pa tinimit Bet-semes, i ma Amasías le, ajawinel re i tinimit Judá. Chrijil chik ile, x-e pa tinimit Jerusalén, xuwulijsaj waqwinaq (120) xik'ab' che i tapial nim uwach, xujeq b'i uwulsaxik che Uchija re ma Efraín, xeuk'isa k'a chila che Uchija chi o Puch'uk.

¹⁴ Xwi ta la ile, xaq xuk'am ronojel i an-o'oj, saq-o'oj xaq ronojel ni'pa i jalajuj taq b'iroxik chi o prachoch i Dios, xaq ronojel ni'pa i jalajuj taq b'eyomal chi o pa nim laj rachoch i ajawinel. Xuchap keb' oxib' winaq, xeuk'am b'i ru' pa tinimit Samaria.

¹⁵ I jub'an chik lapanik chrij uk'aslemal ma Joás, xaq i ch'oj chi xu'an ru' ma Amasías, chi ajawinel re i tinimit Judá, xaq ronojel ni'pa xu'ano, tz'ib'tal chupam i wuj ke i ajawinelab' aj Israel.

¹⁶ Are xkamik, xkimuq chila pa tinimit Samaria, junam ku' i ajawinelab' aj Israel; chrijil chik ire, xrajawin kan uk'ojol puk'exel chi ma Jeroboam.

¹⁷ Ma Amasías, chi uk'ojol ma Joás, chi ajawinel re i tinimit Judá, k'a xk'asi chik jo'lajuj junab' chrijil chik ukamik ma Joás, chi uk'ojol ma Joacaz, ajawinel re i tinimit Israel.

¹⁸ I jub'an chik lapanik chrij uk'aslemal ma Amasías, tz'ib'tal chupam i wuj crónicas ke i ajawinelab' aj Judá.

¹⁹ O jub'an achiyab' aj Jerusalén, xkich'ob' ukamsaxik ma Amasías, rumali ire x-e chruwaxik rib' pa tinimit Laquis, xwiri xkiterb'ej b'ik, xkimaja k'a che i nim laj tinimit le xaq chila xkikamsaj wi.

²⁰ Te'uri xkiya b'i chrij jun kaway, xkimuqu pa tinimit Jerusalén, chi are utinimit ma David, chila ipa je muqtal wi i ratit umam.

²¹ Are uri konojel i tinimit Judá xkiya kan a Azarías pa ajawinel puk'exel uqajaw chi ma Amasías. I Azarías le are jun ala chi waqlajuj junab' o che.

²² I Azarías le are xyijb'aw i nim laj tinimit xaq xtiki chik chuk'amik xu'an ile chrijil chik ukamik uqajaw.

Rajawinik ukab' ma Jeroboam pa tinimit Israel

²³ Che i jo'lajuj junab' rajawinik ma Amasías, chi uk'ojol ma Joás, chi ajawinel re i tinimit Judá; ma Jeroboam, chi uk'ojol ma Joás, chi ajawinel re i tinimit Israel, xujeq ajawinik pa tinimit Israel. Xrajawin jun kawinaq (41) junab' chila Samaria.

²⁴ Xwiri ronojel ni'pa i xu'ano, lik utz taj chwach i Ajwal, man xu'an ronojel ni'pa i mak atzalal chi xu'an ma Jeroboam, chi uk'ojol ma Nabat, chi xeutzaqsaj aj Israel chupam kimak.

²⁵ Ma Jeroboam xuya chik uchi' i ulew Israel puk'ijib'al. Kel chila che i okb'al re i ulew Hamat, k-e k'a chila chuchi' i mar Arabá ub'i, chrij pacha usaqim i Ajwal, chi ki-Dios aj Israel che ma Jonás, chi uk'ojol ma Amitai, chi xaq profeta re i tinimit Gat-hefer.

²⁶ Man i Ajwal xril i nim laj k'ax chi je o aj Israel chupam; mijun winaq re i tinimit we xutij ti i k'ax le, mijun xtow i tinimit Israel le.

²⁷ Are uri i Ajwal xeuto man xutaq b'i ma Jeroboam chkito'ik, chi uk'ojol ma Joás, man i Ajwal uch'ob'om ti uchupik uwach kib'i aj Israel chwach i jyub' ta'aji.

²⁸ I jub'an chik lapanik chrij uk'aslemal ma Jeroboam xaq ronojel ni'pa xu'ano xaq ronojel ni'pa i ch'oj chi xu'ano, xaq wach taq uya'ik chik i tinimit Damasco xaq ulew Hamat pki'ab' aj Israel, tz'ib'tal chupam i wuj crónicas ke i ajawinelab' aj Israel.

²⁹ Are xkam ma Jeroboam, xkimuq chila ku' ajawinelab' aj Israel, Chrijil chik ire xkanaj kan uk'ojol puk'exel chi ma Zacarías.