2 Reyes 13 - Wuj Pa K'ubultzij

Rajawinik ma Joacaz pa tinimit Israel

¹ Are o chik oxib' juwinaq junab' che rajawinik ma Joás, chi uk'ojol ma Ocozías, chila pa tinimit Judá, i ma Joacaz, chi uk'ojol ma Jehú, xujeq ajawinik pa tinimit Israel, wuqlajuj junab' xuch'ij pa ajawinel pa tinimit Samaria.

² Xwiri ronojel ni'pa xu'ano lik utz taj chwach i Ajwal, man xu'an ronojel ni'pa i mak atzalal chi xu'an ma Jeroboam chi uk'ojol ma Nabat, xaq xu'an chke i tinimit aj Israel chi xemakun chwach i Dios, lik xumayij ti u'anik i mak atzalal.

³ Rumali xpe roywal i Ajwal che i tinimit Israel, xeujach k'iyal junab' pu'ab' ma Hazael chi ajawinel re i tinimit Siria, xaq pu'ab' ma Ben-adad chi uk'ojol.

⁴ Are uri ma Joacaz xlapan ru' i Ajwal, i Ajwal le xuta wach xtz'onox che, man ire lik reta'am xaq rilom wach taq i k'ax chi ku'an i ajawinel aj Siria chke i winaq aj Israel.

⁵ Are uri i Ajwal xuya jun tol ke aj Israel, keje uri ile chi aj Israel xkesaj kib' pki'ab' aj Siria, te'uri xek'iji chik chi taq kachoch, mijun xech'ojin chkij keje pacha ki'anom te'eq.

⁶ Xwiri xkijek' ti kib' che i mak atzalal chi xki'an i umuq uxikin ma Jeroboam, chi xki'an chke aj Israel chi xemakunik, lik k'a are xki'an ike. I ati tiox Asera k'a xk'iji chila pa tinimit Samaria.

⁷ Ma Joacaz xa lajuj kawinaq (50) achiyab' je ajrij taq kaway xekanaj ru', lajuj ch'ich' re anb'al ch'oj, xaq jo'mo' juchiy (10,000) achiyab' chi je yij che i ch'oj je ajchaqan, man i ajawinel re i tinimit Siria xuchup kiwach konojel, lik xu'an chke pacha uk'aj ulew.

⁸ I jub'an chik lapanik chrij uk'aslemal ma Joacaz xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Israel.

⁹ Are xkamik, xkimuq chila pa tinimit Samaria, chrijil chik ire xkanaj uk'ojol puk'exel chi ma Joás.

Rajawinik ma Joás pa tinimit Israel

¹⁰ Che i wuqlajuj juwinaq (37) junab' rajawinik ma Joás pa tinimit Judá, are uri ma Joás chi uk'ojol ma Joacaz, xujeq rajawinik pa tinimit Israel, xrajawin waqlajuj junab' chila pa tinimit Samaria.

¹¹ Xwiri ronojel ni'pa xu'ano lik utz taj chwach i Ajwal, man xujek' ti rib' che ronojel i mak atzalal chi xu'an ma Jeroboam chi uk'ojol ma Nabat, chi xu'an chke aj Israel chi xemakun chwach i Dios, xaq lik keje xu'an ire chi xumayij ti u'anik i mak atzalal.

¹² I jub'an chik lapanik chrij uk'aslemal ma Joás, ronojel ni'pa xu'ano xaq ronojel ni'pa i ch'oj chi xu'an ru' ma Amasías, chi ajawinel re i tinimit Judá, tz'ib'tal chupam i wuj crónicas ke i ajawinelab' aj Israel.

¹³ Are xkam ma Joás, xkimuq chila pa tinimit Samaria ku' i ajawinelab' aj Israel. Chrijil chik ile ma Jeroboam xk'iji kan puk'exel pa kub'ib'al chi o u'ij.

K'isb'al tzijonik xaq i ukamik ma Eliseo

¹⁴ Ma Eliseo lik iwab', kamik chik re, are uri ma Joás, chi ajawinel re i tinimit Israel, x-e chrilik, are xuponik, xutz'ulej, xo' ru' xaq xub'ij che: —¡Inqajaw, Inqajaw, yet pa tinimit Israel at keje pacha jun jutzob'aj achiyab' chi je yij che i ch'oj chi lik ko kiwach!

¹⁵ Ma Eliseo xub'ij che: —Chak'ama b'i jun k'aqb'al ch'ab' xaq jujun ch'ab'. Are uri i ajawinel xuk'am jun k'aqb'al ch'ab' xaq jujun ch'ab' chrij pacha xb'ix che.

¹⁶ Are uri ma Eliseo xub'ij che: —Chayijb'a awib', man kak'aq b'i jun ch'ab'. Tz'aqat i ajawinel ktijin chu'anik wach xb'ix che, are uri ma Eliseo xuya u'ab' puwi u'ab' i ajawinel.

¹⁷ Are uri xub'ij che i ajawinel: —Chajaqa i wantana pusuk' i relb'al ij. I ajawinel xujaq i wantana, are uri ma Eliseo xub'ij che: —Wo'or, ¡Chak'aqa b'i ch'ab'! I ajawinel le xuk'aq b'i ch'ab', te'uri ma Eliseo xsik'in chub'ixkil: —¡Ch'ab' ajtonel chi re i Ajwal! ¡Ch'ab' chi kton chuchupik uwach i tinimit Siria! ¡Yet keach'ak ni aj Siria chila pa tinimit Afec, xaq lik kachup ni kiwach konojel!

¹⁸ Chrijil chik ile xub'ij che i ajawinel: —Cheak'ama i ch'ab'. I ajawinel are xuk'am i ch'ab', ma Eliseo xub'ij che: —Wo'or chab'uju pulew. I ajawinel oxmul xub'uj i ch'ab' pulew, te'uri xumayij.

¹⁹ Are uri i profeta, xpe roywal che xaq xub'ij che: —Wetene xab'uj i ch'ab' jo'mul pulew, xaq wetene waqmul, lik kattiki te'eqi chkich'akik aj Siria ronojel ij saq, k'a kachup ni kiwach uri konojel. Xwiri wo'or xa oxmul kattiki ni chkich'akik.

²⁰ I ma Eliseo xkamik, are uri xkimuqu. Lik junab' junab' k'iyal taq tzob'aj ili'omab' aj Moab, ke'ok pa tinimit Israel,

²¹ xuk'ulmaj juyak i aj Israel ketijin chumuqik jun kamnaq, are xkilo chi ktijin kuponik i jutzob'aj ili'omab'; are uri xkik'aq la b'i i kamnaq le chupam ujul ma Eliseo, te'uri xe'ek. Xwiri i kamnaq le, are xtzaq puwi i ub'aqil ma Eliseo, are uri xwalij che i kamik xaq xtak'i anoq.

²² I ma Hazael, chi ajawinel re i tinimit Siria, xeuya i winaq pa k'ax ronojel ij re uk'aslemal ma Joacaz.

²³ Xwiri i Ajwal, lik xril tob'al kiwach, k'ax xeuna ike le, rumal utrat chi u'anom ru' ma Abraham, ma Isaac xaq ru' ma Jacob, rumali xraj ti kikamsaxik xaq xeresaj tu b'i ru' ire. Lik k'a are o wi wo'or je resam tu b'i ru'.

²⁴ I ma Hazael, chi ajawinel re i tinimit Siria, xkamik, are uri xrajawin kan uk'ojol puk'exel chi ma Ben-adad.

²⁵ Are uri ma Joás, chi uk'ojol ma Joacaz, xtiki chik chumajik i tinimit che ma Ben-adad chi xumaj che uqajaw chi ma Joacaz pa ch'oj. I ma Joás le, oxmul xtiki chuch'akik ma Ben-adad, rumali chi xtiki chik chumajik k'iyal nimaq taq tinimit Israel.