2 Reyes 12 - Wuj Pa K'ubultzij

¹ Xuk'ulmaj ile che i uwuq junab' rajawinik ma Jehú pa tinimit Israel; i a Joás le xrajawin kawinaq (40) junab' pa Jerusalén. I uchuch, ati Sibia ub'i chi aj chila pa tinimit Beerseba.

² Ronojel ni'pa xu'an a Joás lik utz xaq lik suk'ulik chwach i Ajwal, man xk'itsax rumal ma Joiada chi ajsujul sipon i Dios.

³ Xwiri xelsax ti i k'ijib'al ipa koksax wi ki'ij i jalajuj taq tiox, man konojel i winaq k'a kkisujuj kisipon xaq kkiporoj pom chila.

^4-5 Xuk'ulmaj jun ij, a Joás xub'ij chke ajsujul sipon i Dios: Chimolo yix uchi' ronojel i mer chi kkik'am li winaq prachoch i Ajwal, i mer tojb'al re kik'aslemal i winaq chrij pacha b'italik, xaq ronojel i mer chi kel pkik'ux i winaq uya'ik prachoch i Ajwal. Ru' i mer le chiyijb'a ronojel ni'pa i kraj uyijb'axik che i rachoch i Ajwal.

⁶ Xwiri, xuriqa i junab' oxib' juwinaq (23) re rajawinik ma Joás, i je ajsujul sipon i Dios, kiyijb'am ti i rachoch i Ajwal.

⁷ Are uri i ajawinel chi ma Joás xusik'ij i ajsujul sipon i Dios chi ma Joiada xaq i jub'an chik ajsujul sipon i Dios, xeuyajo, xub'ij: —¿B'uchak chi yix iyijb'am ti i rachoch i Ajwal? Wo'or, mik'am chik i mer chke i winaq; xwiri i mer chi k'a o iwu' chijacha, man kyijb'ax i rachoch i Ajwal.

⁸ Are uri i je ajsujul sipon utz xkita chi nti chik mer kkik'am chke i winaq xaq nti chik chkiqul uyijb'axik i rachoch i Ajwal.

⁹ Are uri i ajsujul sipon chi ma Joiada xuk'ama jun kaxa, xu'an jun tel puwi, te'uri xuya puwiqab'im che i sujb'al sipon, pusuk' i okb'al b'ik prachoch i Ajwal, i je ajsujul sipon chi kechajiw i okb'al re i rachoch i Dios le, chila kkiya wi ronojel i mer chi kkiya i winaq prachoch i Ajwal.

¹⁰ Are kkilo chi lik nojnaq chik i kaxa che i mer, kupon i ajtz'ib' re i ajawinel xaq i atz laj ajsujul sipon, kkajlaj i mer chi kiya'om i winaq prachoch i Ajwal; chrijil chik ile kkiya chupam jub'an yab'al.

¹¹ Are tz'ib'am chik ni'pa i mer xmoltajik, are uri ike le xkijach chke i kok'aw utzam i chak man keje ile ike kekitoj i ajanelab' xaq i keok'aw utzam i ajchakib' chila prachoch i Ajwal.

¹² Xaq kekitoj konojel ni'pa i keyakaw ja xaq ni'pa i kkiyijb'a usuk' i ab'aj, man keje ile kkilo' jalajuj taq che' xaq i tz'alam, ab'aj re yijb'al re i rachoch i Ajwal, xaq ronojel ni'pa i jub'an chik rajwaxik.

¹³ Xwiri i mer chi kkik'am b'i prachoch i Ajwal xkichapb'ej taj re u'anik i tu'b'al ya saq-o'oj, k'atzb'al utzam i chij re i kantil chi k'atnaq chik, nimaq taq laq, trompeta xaq i jub'an chik b'iroxik chi an-o'oj xaq i saq-o'oj;

¹⁴ man i mer le kjach chke i aj-ok'al utzam i jalajuj taq chak, yijb'al re i rachoch i Ajwal.

¹⁵ Xwiri ktz'onox ti chke ni'pa taq mer kkisacho are kekitoj i ajchakib', man ike le lik nti mer to' kkik'amo chi re i rachoch i Ajwal, lik je suk'ul laj taq winaq.

¹⁶ Xwiri i mer chi re i sipon re kuyb'al mak, kk'am tu b'i prachoch i Ajwal, man i mer le, ke je ajsujul sipon i Dios.

¹⁷ Che taq i ij le, ma Hazael, chi ajawinel re i tinimit Siria, xu'an ch'oj chrij i tinimit Gat xaq xtiki chuk'amik; chrijil chik ile, x-e chu'anik ch'oj chkij i winaq aj Jerusalén.

¹⁸ Xwiri ma Joás, chi ajawinel re i tinimit Judá, xuk'am ronojel ni'pa b'iroxik chi kijachom i ratit umam pu'ab' i Ajwal, chi je are ma Josafat, ma Joram, y ma Ocozías, xaq xuk'am i b'iroxik chi ujachom ire pu'ab' i Ajwal, xaq ronojel ni'pa an-o'oj chi xuriq prachoch i Ajwal xaq pa nim laj rachoch ire; ronojel ile xutaq b'i che ma Hazael. Are uri ma Hazael le, xuxlan chu'anik ch'oj chkij aj Jerusalén.

¹⁹ I jub'an chik lapanik chrij uk'aslemal ma Joás xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Judá.

²⁰ Are i je rajpatanib' xe'anaw che ronojel, man are ike xech'ob'owik wach taq ukamsaxik kki'an che. Xkikamsaj chila chupam i nim laj ja Milo, chi o pa xulanik che i tinimit Sila.

²¹ Ma Josacar, chi uk'ojol ma Simeat xaq ma Jozabad, chi uk'ojol ma Somer, chi je rajpatan, xki'an k'ax che kamsab'al re. Are xkamik, xkimuq chila putinimit ma David; chrijil chik ile xkanaj kan uk'ojol puk'exel chi ma Amasías.