2 Reyes 11 - Wuj Pa K'ubultzij

Umajik kan kub'ib'al chi o u'ij rumal ati Atalía

¹ Ati Atalía, chi uchuch ma Ocozías, are xretamaj chi xkam i ralab', x-e chkikamsaxik konojel ni'pa i ralk'uwal i ajawinel.

² Xwiri ati Josaba, chi umi'al i ajawinel ma Joram, chi ranab' ma Ocozías, xresaj b'i a Joás, chi uk'ojol ma Ocozías, chkixol i jub'an chik alk'uwalxelab' chi ktijin kikamsaxik. Keje uri ile chi xruwaj chwach ati Atalía, xuya chupam i ja ipa kwar wi, junam ru' i kchajiw re rumali xkamsax taj.

³ I a Joás le waqib' junab' xkuwaj kib' ru' i kchajiwik chila prachoch i Ajwal; che i keb' oxib' junab' le, are ati Atalía xrajawin puwi i tinimit.

⁴ Che i uwuq junab', ma Joiada xutaq kisik'ixik konojel i aj-atzil, konojel aj Creta xaq konojel i ni'pa kechajinik. Konojel i winaq le, xeroksaj b'i prachoch i Ajwal ipa o wi ire. Chila xu'an jun trat ku' chi lik xkisaqij pub'i i Ajwal chi lik kki'an na, xaq xuk'ut a Joás, chke chi uk'ojol i ajawinel.

⁵ Are uri xub'ij chke: “Are mer ki'ano are iri: Chi'ana oxib' tzob'aj che iwib'. I nab'e tzob'aj chke i oxib' tzob'aj le, kechajin ni che i ij sábado.

⁶ I ukab' tzob'aj kek'iji ni chwach uchija chi Shur ub'i; i urox tzob'aj kechajin ni chwach uchija chi o chrij i ja ipa kkimol wi kib' i je ajchajinelab'. Lik Keje ni ile, chi pa taq tzob'aj kichajij ni i nim laj ja re i ajawinel.

⁷ I keb' tzob'aj chi kechajin ti che i ij sábado, lik kkichajij ni ajawinel chila prachoch i Ajwal.

⁸ Yix chi'ana jun sotsik che iwib' chrij i ajawinel, chijujunal is kiwok'aj jun b'iroxik anb'al ch'oj pi'ab'; we o taq jun kraj kok b'i chixol yix chi itusum iwib', chikamsaj. Yix kiwachnimaj ni i ajawinel xaipa k-e wi.”

⁹ I je aj-atzil ke achiyab' chi je yij che i ch'oj, xki'an ronojel ni'pa xub'ij i ajsujul sipon chi ma Joiada. Are uri i aj-atzil le chkijujunal xkik'am i taqanik pkiwi kiwinaq, i taqanik le xya' chke i ke'ok pa chajinik che taq i ij sábado xaq chke i ke'uxlan che i ij le; konojel xeupon chwach i ajsujul sipon ma Joiada.

¹⁰ Are uri i ajsujul sipon, xujach i che' ch'ich' utzam, xaq i tob'al ib' re i ch'oj chke i je aj-atzil ke achiyab' chi je yij che i ch'oj, chi re te'eq i ma David chi o chila prachoch i Ajwal.

¹¹ Konojel achiyab' chi kechajinik xe'e pkik'ijib'al, chila pa wiqab'im xaq pa moxim re i rachoch i Ajwal, xaq chrij chwach i sujb'al sipon; chkijujunal kok'am pki'ab' jun b'iroxik anb'al re i ch'oj, tob'al re i ajawinel.

¹² Are uri ma Joiada xresaj li uk'ojol i ajawinel, xukoj i koron xaq xuya jun ilb'al re che re upatan, chrijil chik ukojik aceite puja', te'uri xusaqij chi are ire ajawinel. Are uri konojel i winaq xkipok'pa pki'ab' xaq xesik'in chub'ixkil: “¡Chk'asi ni i ajawinel!”

¹³ I ati Atalía are xuta chi kesik'in i chajinelab' xaq konojel i winaq, x-e prachoch i Ajwal ipa je o wi konojel.

¹⁴ Are uri xrilo chi tak'al i ajawinel chuk'ulel i raqan ja chrij pacha k-an chila prachoch i Ajwal. Chutzal je o wi i aj-atzil xaq i jutzob'aj chi ketijin pa ojmanik; konojel i winaq lik kekikotik kkixut'ij i trompeta. Are uri ati Atalía xuraqch'ij u'u' xaq xsik'in chub'ixkil: —¡Xinit'oro! ¡Xinit'oro!

¹⁵ Are uri i ajsujul sipon chi ma Joiada, xub'ij chke i je aj-atzil chi je o achiyab' chi je yij che i ch'oj pki'ab': —Chiwesaj chixol xaq chiwesaj li prachoch i Ajwal, kikamsaj chwaja i we o jun kuya uwach ru' xaq chikamsaj b'i ire ru'.

¹⁶ Keje u'anik uri ile, chi xkichapo xaq xkesaj b'i che uchija ipa je o wi i kaway, xkik'am b'i pa nim laj rachoch i ajawinel, chila xkikamsaj wi.

¹⁷ Chrijil chik ile, ma Joiada xu'an jun trat ru' i Ajwal xaq ku' konojel i winaq; i trat chi xki'ano le kub'ij chi lik kkito ni kib' che ronojel wach i kki'ano xaq je are ni utinimit i Ajwal.

¹⁸ Te'uri konojel xe'e prachoch i tiox Baal, lik xkiwulijsaj che xaq xkiwulijsaj i k'ijib'al ipa kkisujuj wi kisipon xaq i jalajuj taq tiox. I ma Matán, chi ajsujul sipon i tiox Baal, xkiwor puqul chila chwach i jalajuj taq sujb'al sipon. Chrijil chik ile ma Joiada xukoj jub'an chajinelab' prachoch i Ajwal.

¹⁹ Chrijil chik ile, xub'ij chke i je aj-atzil ke achiyab' chi je yij che i ch'oj, chke aj Creta, chke ajchajinelab' xaq chke konojel i winaq, chi kkachnimaj b'i ajawinel, kel chila prachoch i Dios, k-e chila k'a pa nim laj rachoch i ajawinel. Konojel xe'ok b'i chila che uchija ipa je o wi i chajinelab', are uri a Joás xkub'i che ukub'ib'al chi o u'ij.

²⁰ Konojel i winaq lik xekikotik. Man ati Atalía xkamsax ru' ch'ich' chila pa nim laj rachoch i ajawinel, rumali konojel i winaq lik o uxlanb'al k'uxij pkik'ux.

Rajawinik a Joás pa Judá

²¹ Wuqub' junab' o che a Joás are xujeq ajawinik.