2 Reyes 10 - Wuj Pa K'ubultzij

Uchupik kiwach konojel i ralk'uwal ma Acab rumal ma Jehú

¹ Ma Acab o lajuj oxwinaq (70) rak'al chila pa tinimit Samaria. Are uri ma Jehú xutz'ib'aj wuj chke i jalajuj taq atol tzij re i tinimit le, chke i rijab' xaq chke i kechajiw i rak'al ma Acab. Chupam i wuj le xutz'ib'aj keje iri:

² “Are kupon i wuji iwu', yix chi keichajij i rak'al i ma Acab, kikaway, kich'ich' re anb'al ch'oj, utinimit chi sutim rij ru' i tapial nim uwach, xaq i jalajuj taq kichapb'al re anb'al ch'oj;

³ chi'ulu jun chke i rak'al iwajaw chi lik b'iw chkixol, chiya puk'ijib'al uqajaw xaq pukub'ib'al chi lik o u'ij xaq lik chikoch'ij iwib' rumal rajawinik ire.” Xcha.

⁴ Rumal ronojel ile, ike lik xkixij kib', rumali xkib'ij: “We keb' ajawinel xkich'ij ti ch'oj ru' ire ¿Wach taq uch'ijik uri kqa'an yoj ile?”

⁵ Are uri i ajchak chi o pa nim laj rachoch i ajawinel, i aj-ok'al utzam i jalajuj taq tinimit, rijab' re i jutzob'aj xaq ni'pa i je ajchajinel ke i rak'al; xkitaq ub'ixkil che ma Jehú: “Yoj kqa'an na wach i kab'ij chqe, man lik oj awajchak, xwiri mijun kqaya kan pa ajawinel. Cha'ana pacha kawaj yet.”

⁶ I ma Jehú xutz'ib'aj chik ukamul chke, keje iri xutz'ib'aj: “We yix iya'om iwach wu' xaq we kiwaj kixkojon che intaqanik, chik'upij uri kijolom i uk'ojol ma Acab, te'uri chweq keje taq or iri chixk'un chwilik, kik'am li kijolom ike le, waral pa Jezreel.” Xcha. I lajuj oxwinaq (70) je uk'ojol i ajawinel, chi ma Acab, je o chkixol uk'iyal nimaq taq winaq chi keok'aw utzam i tinimit chi xek'itsawik.

⁷ Are xupon i wuj ku', xekichap i lajuj oxwinaq (70) je uk'ojol i ajawinel, chi ma Acab, xekikamsaj; chrijil chik ile xkiya b'i kijolom chupam jub'an chikach, te'uri xkitaq b'i uya'ik pa tinimit Jezreel.

⁸ Are xupon i ajb'il tzij ru' ma Jehú, xub'ij che: —Xink'am li kijolom i je uk'ojol i ajawinel. Are uri ma Jehú xub'ij: —Chi'ana keb' t'ub'aj che, chiya kan chila pa okb'al re i tinimit chiya chila re chukab' ij.

⁹ Chukab' ij, xel li ma Jehú, xtak'i chkiwach konojel i winaq, xub'ij chke: —Yix lik nti imak, man yin xin-anaw ch'oj chrij iwajaw xaq xinkamsaj. Xwiri ¿Pachin xekamsaw konojel ike le?

¹⁰ Chiwetamaj chi ronojel ni'pa xub'ij i Ajwal chkij i ralk'uwal ma Acab, lik x-antaj na. Are i Ajwal x-anaw ronojel ile chrij pacha xub'ij i ma Elías chi rajpatan.

¹¹ I ma Jehú xukamsaj konojel i jub'an chi k'a je k'as kanoq re i ralk'uwal ma Acab chila pa Jezreel, xaq konojel i achiyab' chi o ki'ij, i ramiy xaq i ajsujul sipon, lik mijun chik xuk'asb'a kanoq.

¹² Chrijil chik ile, x-e pa tinimit Samaria, are ktijin chi b'e, xupon che jun k'ijib'al Bet-equed ub'i, chi ke ajyu'ul chij.

¹³ Chila xeuriq wi i ratz ucha' ma Ocozías, chi ajawinel te'eq pa tinimit Judá. Are uri ma Jehú xutz'onoj chke: —¿Ix pachin taq yix? Ike xkib'ij: —Oj ratz ucha' ma Ocozías, xojk'un chuya'ik rutzil kiwach i je uk'ojol i ajawinel xaq i je rak'al ati ajawinel.

¹⁴ Are uri ma Jehú xub'ij chke i winaq chi je teren chrij: —Cheichapa, keje ile je k'aslik. I winaq chi je teren chrij ma Jehú, xekichapo, are je kichapom chik, te'uri xekiwor pkiqul chila chunaqaj che i k'otom Bet-equed chi ke i ajyu'ul chij. Je keb' kawinaq (42) achiyab' konojel, mijun chke xk'asi kanoq.

¹⁵ Are xel ma Jehú chila, xkik'ulaj kib' ru' ma Jonadab, chi uk'ojol ma Recab, chi uponnaq chrilik. Ma Jehú xuya rutzil uwach xaq xub'ij che: —¿Lik utz nawi ak'ux chwe yin pacha ink'ux yin chawe yet? Ma Jonadab xub'ij: —Qatzij lik utz ink'ux chawe. Are uri ma Jehú xub'ij: —We keje ile chaya a'ab' chwe. Are uri ma Jonadab xuya u'ab' che, i ma Jehú xu'ansaj b'i ru' chupam uch'ich' chi re ub'inb'al.

¹⁶ Te'uri xub'ij che: —Chinawachnimaj pe', keje ile kawilo chi wanima lik kukoj u'ij i Ajwal. Keje uri ile chi xuk'am b'i chupam uch'ich' chi re ub'inb'al.

¹⁷ Are xok b'i pa tinimit Samaria, ma Jehú xeukamsaj konojel i umuq uxikin ma Acab chi k'a je k'as kanoq. Lik xuchup kiwach konojel, chrij pacha ub'im i Ajwal che ma Elías.

U'atixik ukojik u'ij i tiox Baal rumal ma Jehú

¹⁸ Chrijil chik ile, ma Jehú xumol kichi' konojel i winaq, xub'ij chke: —Ma Acab xukoj jub'i' u'ij i tiox Baal, xwiri yin lik kinkoj ni mas u'ij.

¹⁹ Rumali cheisik'ij konojel i profeta chi je ajkojol u'ij i tiox Baal, xaq konojel i je ajsujul sipon chwach ire, lik mijun we kupon taj, man inyijb'am jun nim laj sujunik, kojb'al u'ij i tiox Baal; pachin jun kupon taj, kkamsax na. Xwiri ma Jehú xuch'ob' u'anik i t'oronik le, man kuk'isb'ej kiwach konojel i kekojow u'ij i tiox Baal.

²⁰ Are uri xutaq ub'ixkil chi ktzijox u'anik jun nim laj nima'ij kojb'al u'ij i tiox Baal. Lik keje ile xki'an che.

²¹ Te'uri xkitaq b'i ajb'il tzij pa jalajuj taq tinimit Israel, rumali chi konojel ni'pa kkikoj u'ij i tiox Baal, xeupon prachoch i tiox le. Lik mijun we xupon ti chke, rumali chi lik xnoj i rachoch i tiox Baal.

²² Ma Jehú xub'ij che i aj-ok'al utzam ke i kechajiw k'ul, chi kresaj li k'ul chi kkikoj konojel ni'pa kkikoj u'ij i tiox Baal, man koksax chke konojel i winaq chi kkikoj u'ij i tiox le. Lik keje ile xu'an i kchajiw k'ul.

²³ Chrijil chik ile ma Jehú xaq ma Jonadab xe'ok b'i prachoch i tiox Baal. Are uri ma Jehú xub'ij chke konojel ni'pa kkikoj u'ij i tiox le: —Chikojo retalil we nti taq jun chixol chi kukoj u'ij i Ajwal, lik xwi i kekojow u'ij i tiox Baal kek'iji waral.

²⁴ Konojel ni'pa kkikoj u'ij i tiox Baal, xe'ok b'i prachoch, chusujuxik, xaq chuporoxik kisipon. Tz'aqat ma Jehú xeuya kan kajwinaq (80) achiyab' pa okb'al che i rachoch i tiox Baal, xaq xub'ij chke: —We jun chiwe yix, kuya che jun chke i achiyab' chi xinya pi'ab' chi kel b'ik, saq laj tzij lik kkam na.

²⁵ Are xutzin ma Jehú chusujuxik i porom sipon, te'uri xuya i taqanik chke i ajchajinel xaq chke i je aj-atzil: ¡Chixok b'ik, cheikamsaj! ¡Mijun miya che chi k-anmajik! Are uri i achiyab' chi je rachi'il ma Jehú, xe'ok b'i chkikamsaxik ru' ch'ich', te'uri xekesaj li chila, xekik'aq b'i chisaq. Chrijil chik ile i achiyab' le, xe'ok b'i chila prachoch i tiox Baal.

²⁶ I tiox chi o u'ij chke i winaq le, xkesaj loq xaq xkik'ato.

²⁷ Xwi ta la ile, xaq xkiwulijsaj i tiox Baal, xkiwulijsaj i rachoch xaq xki'an tzaqb'al ib' che, lik keje ile xkanajik k'a arewi o wi wo'or.

²⁸ Keje uri ile chi ma Jehú xuchup uwach i tiox Baal chila pa tinimit Israel.

²⁹ Xwiri ire xaq xu'an i makunik pacha xu'an ma Jeroboam, chi uk'ojol ma Nabat, chi xaq xeutzaqsaj aj Israel chupam i makunik man xaq xukoj ki'ij uk'exwach i chikop an-o'oj, chi o chila pa tinimit Dan xaq pa tinimit Betel.

³⁰ I Ajwal xub'ij che ma Jehú: “Rumal ronojel i utz chi xa'an chinwach yin, man xa'an ronojel ku' i ralk'uwal ma Acab chrij pacha kwaj yin, rumali konojel awak'al kek'iji ni pa kub'ib'al chi o u'ij re Israel, k'a kk'is ni ukaj lemajil.”

³¹ Tupu ma Jehú x-on ti mer suk'ulik, man xk'achir ti chu'anik chrij pacha kub'ij i atb'al tzij re i Ajwal chi ki-Dios aj Israel. I ma Jehú le xujek' ti rib' che i makunik chi xu'an ma Jeroboam xaq xeutzaqsaj aj Israel chupam kimak.

³² Che taq i ij le i Ajwal xujeq utzitik kulew aj Israel. Ma Hazael xu'an ch'oj chkij i aj Israel che jalajuj taq kik'ijib'al ipa je o wi.

³³ I k'ijib'al le je are iri: K'ijib'al ipa kel wi li i ij che i raqana Jordán, che ronojel ulew Galaad, Gad, Rubén xaq Manasés; xaq che ronojel ulew Aroer chi o naqaj che i ral raqana Arnón, xaq kojom pajil i Galaad xaq i Basán.

³⁴ I jub'an chik lapanik chrij uk'aslemal ma Jehú xaq ronojel ni'pa xu'ano xaq ronojel ukowil uwach, ile tz'ib'tal chupam i wuj re i crónicas ke i ajawinelab' aj Israel?

³⁵ Are xkamik, xkimuq chila pa tinimit Samaria, i uk'ojol, chi ma Joacaz, xkanaj puk'exel pa ajawinel.

³⁶ I ma Jehú wajxaqib' juwinaq (28) junab' xrajawin chila pa tinimit Samaria xaq puwi ronojel ulew Israel.