2 Reyes 1 - Wuj Pa K'ubultzij

Ukamik ma Ocozías

¹ Chrijil chik ukamik ma Acab, i winaq aj Moab xewalij chu'anik ch'oj chkij i aj Israel.

² I ma Ocozías xtzaq li che i kale ja che jun wantana che i nim laj rachoch chila pa tinimit Samaria, lik k'ax xu'ano. Are uri xeutaq b'i jub'an ajb'il tzij chu'anik i tz'onb'enik che i tiox Baal-zebub, chi ki-dios aj Ecrón, man kraj kretamaj we k'a kutzirik.

³ Xwiri i ángel re i Dios xub'ij che ma Elías, chi aj pa tinimit Tisbe: Jat chkik'ulaxik i ajb'il tzij chi xeutaq li ajawinel ke aj Samaria, xaq chatz'onoj chke: ¿B'uchak kkitz'onoj taq che i tiox Baal-zebub, chi kitiox aj Ecrón, nti b'awa Dios pa Israel?

⁴ Xwi ta la ile, xaq chab'ija chke, chi Yin in Ajwal, kinb'ij che ma Ocozías: “Katwalij ti chik chwi ach'at, chila katkam wi.” Are uri ma Elías xu'ano; chrij pacha xub'ij i Ajwal che.

⁵ Are xetzalij b'i ajb'il tzij, are uri i ajawinel le xutz'onoj chke: —¿B'uchak xixtzalij loq?

⁶ Are uri ike xkib'ij che: —Man xojuk'ulaj jun achi pa b'e, xub'ij chqe chi kojtzalij chub'i ru' i ajawinel chi oj utaqom b'ik, xaq kqab'ij ni i tziji chawe: Keje iri kub'ij i Ajwal: “¿B'uchak chi katz'onoj taq che i tiox Baal-zebub, chi kitiox aj Ecrón, nti b'awa Dios pa Israel? Rumal i xa'ano le wo'or, katwalij ti chik chwi ach'at, chila katkam wi. Keje ile xub'ij i achi le chqe.”

⁷ Are uri i ajawinel xutz'onoj chke: —¿Wach ktzun i achi chi xik'ulaj chi xub'ij ile chiwe?

⁸ I je ajb'il tzij xkib'ij: —Jun achi ukojom jun u'u' jurjik patzpik ismal che, xaq uximom jun tz'um che upam —xecha. Are uri i ajawinel xub'ij: —¡Ile are ma Elías, chi aj pa tinimit Tisbe!

⁹ Rumali xutaq la b'i jun aj-atzil ke i achiyab' chi je yij che i ch'oj chuk'amik, xaq ku' jub'an chik lajuj kawinaq (50) achiyab' chi xaq je yij che i ch'oj. Are xeuponik, i ma Elías kul puwi jun jyub'. Are uri i aj-atzil ke achiyab' chi je yij che i ch'oj le, xub'ij che ma Elías: —¡Yet chi at profeta, i ajawinel kub'ij chi chatqaj loq!

¹⁰ Are uri ma Elías xub'ij che: —Qatzij yin in profeta, rumali chtzaq li a' chikaj, chatuk'ata ni yet xaq cheuk'ata ni konojel lajuj kawinaq achiyab' le, (50) Are uri chi lik che i or le, xtzaq li a' chikaj, xeuk'at b'i konojel.

¹¹ Chrijil chik ile, i ajawinel xutaq chub'i jun chik aj-atzil ku' jub'an chik lajuj kawinaq (50) achiyab' chi je yij che i ch'oj; are xupon ru' ma Elías, xub'ij che: ¡Yet chi at profeta; i ajawinel kub'ij chi chatqaj loq, xaq lik chab'isoj!

¹² Are uri ma Elías xub'ij che: —Qatzij yin in profeta, chtzaq na li a' chikaj, chatuk'ata ni yet xaq cheuk'ata ni konojel i lajuj kawinaq (50) achiyab' le. Are uri chi lik che i or le, xtzaq li a' chikaj, xuk'at b'i ire xaq xeuk'at b'i konojel i lajuj kawinaq (50) achiyab'.

¹³ Are uri churoxmul i ajawinel xutaq chub'i jun chik aj-atzil chi yij che i ch'oj, junam ku' jub'an chik lajuj kawinaq (50) achiyab'; xwiri i urox aj-atzil le, x-an b'i k'a ru' ma Elías, xxuki chwach, xub'ij che: —Profeta cha'ana jun utzil chwe, chawila tob'al inwach xaq tob'al kiwach i lajuj kawinaq (50) achiyab' chi je awajchak;

¹⁴ chuxe'el ink'unik yin, xtzaq li a' chikaj, xeuk'at b'i keb' aj-atzil xaq i achiyab' chi je petnaq ku'. Wo'or, kintz'onoj chawe chi chawila tob'al inwach —xcha.

¹⁵ Are uri i ángel re i Ajwal xub'ij che ma Elías: —Jat ru', maxij awib' che. I ma Elías x-e ru' i aj-atzil ke achiyab' je yij che i ch'oj chrilik i Ajawinel.

¹⁶ Are xeupon ru' i ajawinel, i ma Elías xub'ij che: —Keje iri kub'ij i Ajwal: “¿B'uchak chi xataq b'i ajb'il tzij ru' i tiox Baal-zebub, chi are kitiox aj Ecrón, pacha taq nti Dios pa Israel chi katuto? Rumali chi katwalij ti chik chwi ach'at, chila katkam wi.”

¹⁷ Lik saq laj tzij i ajawinel xkamik, chrij pacha xub'ij i Ajwal che ma Elías chi ajb'il utzij. Xkanaj ucha' puk'exel chi ma Joram man i ma Ocozías le lik nti jun rak'al xuk'uwalij. Ile xuk'ulmaj che ukab' junab' rajawinik ma Joram chi uk'ojol ma Josafat chila pa tinimit Judá.

¹⁸ I jub'an chik lapanik chrij uk'aslemal ma Ocozías xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Israel.