SEGUNDO LIBRO DE CR%D3NICAS 9 - Wuj Pa K'ubultzij

I ati ajawinel re i tinimit Sabá kusolij ma Salomón

¹ I ati ajawinel re i tinimit Sabá, xuta wach taq kb'ix chrij ma Salomón chi xnimar u'ij, rumali chi ati ajawinel le x-e pa Jerusalén chuk'amik upam ru' k'ax laj taq tz'onb'enik. Xupon pa Jerusalén ru' k'iyal taq u'ij man achnimam b'i kumal jutzob'aj chi lik je k'i kik'amom b'i jub'an kamey chi lik keb'alk'at chuxe' an-o'oj xaq chomiq taq ab'aj chi lik paqal rajil. Are xupon chwach ma Salomón xutz'onoj ronojel che ni'pa uch'ob'om utz'onoxik.

² Are uri ma Salomón xula' uwach ronojel ni'pa i tz'onb'enik chi x-an che rumal ati ajawinel. Lik nti jun b'iroxik, tupu lik k'ax ula'ik uwach we xusaqij taj.

³ Are xril ati ajawinel chi ma Salomón lik o uno'oj, xaq xril i nim laj rachoch chi u'anom,

⁴ xril i jel laj taq ti'b'alil chi o chwi mexa, i k'ijib'al ipa je o wi i jalajuj taq rajpatan, uwiqik kib' i rajchak xaq uwiqik kib' ajya'ol ya xaq i sipon chi ksujux prachoch i Dios; are uri ati ajawinel aj Sabá lik xub'isoj ronojel ile.

⁵ Xub'ij che i ajawinel: Lik saq laj tzij b'ari ronojel ni'pa xinta chila pintinimit chrij ni'pa a'anom xaq i ano'oj.

⁶ K'a xink'un ni chrilik ronojel ru' inb'a'wach te'uri xinkojo. Lik saq laj tzij, mitene pa nik'aj kilapom chwe che i nim laj ano'oj, Man lik mas nim ab'eyomal chwach ni'pa intom te'eq.

⁷ ¡Kinb'ij yin lik kekikot ni'pa awixoqil xaq konojel ni'pa awajchak, chi arewi je o chatzal man kkita i chomiq taq atzij re no'oj!

⁸ ¡Lik nim u'ij i lo'laj Awajwal Dios man xariq rutzil uk'ux xaq xuya pa'ab' chi ka'at ni tzij puwi utinimit Israel! Rumal nim laj k'axnab'al uk'ux i Dios le che utinimit Israel, u'anom ajawinel chawe man kanimarsaj xaq kaya ukowil utinimit ronojel ij saq xaq ka'an jun atb'al tzij suk'ulik pkiwi utinimit.

⁹ Te'uri ati ajawinel le xujach wuqub' kajwinaq (87) tintal an-o'oj pu'ab' i ajawinel, xaq xuya k'iyal kunb'al muy xaq chomiq taq ab'aj, chi lik paqal rajil. Lik uponnaq ti kunb'al muy le pa tinimit Israel pacha xusipaj ati ajawinel aj Sabá che ma Salomón, chi ajawinel aj Israel.

¹⁰ Xwi ta la ile, i achiyab' chi kechakun ru' ma Hiram xaq ru' ma Salomón xkik'am li an-o'oj chila pa Ofir, xaq xkik'am li che' sándalo xaq i chomiq taq ab'aj, chi lik paqal rajil.

¹¹ Ru' i che' sándalo le i ajawinel xu'an jub'an atb'al chi xukoj chrij chwach i rachoch i Dios xaq re i nim laj rachoch ire xaq ru' i che' le xu'an jub'an arpa xaq i salterio ke aj-ojmanel. Lik ilom ti jun b'iroxik pacha ile chila pa ulew Judá.

¹² I ajawinel ma Salomón xuya che ati ajawinel aj Sabá ronojel ni'pa xutz'onoj, tupu ma Salomón le o uya'om chik che puk'exel ni'pa xya' che ire. Chrijil chik ile i ati ajawinel le xtzalij b'i putinimit chila Sabá achnimam b'i kumal i je rajpatan.

U'ij xaq ub'eyomal ma Salomón

¹³ I an-o'oj chi kya' che ma Salomón junab' junab' kmoltaj kajib' kajwinaq jumo' (484) tintal ronojel.

¹⁴ Ajlam ti uri ni'pa i mer re alkawal chi kkitoj konojel ajk'ay xaq ajlo'onel che. Xaq konojel i ajawinelab' aj pa tinimit Arabia xaq i jalajuj taq atb'al tzij chi je uwi ujolom i jalajuj taq tinimit Israel, kkik'am li an-o'oj xaq saq-o'oj che ma Salomón le.

¹⁵ I ajawinel ma Salomón xutaq u'anik lajujwinaq (200) tob'al ib' re i ch'oj chi lik an-o'oj, i jujun tob'al ib' le xuk'am b'i oxlajuj pexu an-o'oj.

¹⁶ Xaq xutaq u'anik jo'lajujwinaq (300) tob'al ib' ch'utiq, i jujun ral taq tob'al ib' le xuk'am b'i oxib' pexu ru' wajxaqib' ons an-o'oj chi lik wach'wam. Xuya chila chupam i nim laj rachoch chi “K'achelaj Líbano”; kecha che.

¹⁷ Xaq xutaq u'anik jun kub'ib'al chi o u'ij re marfil, xaq lik xutaq uch'uqik rij ronojel ru' rutzil an-o'oj.

¹⁸ I kub'ib'al le chi o u'ij o waqib' cholchol che, jun yab'al an-o'oj, jun yab'al ab'aj k'ulala xaq k'ulala che i yab'al ab'aj le, je tak'al jujun uk'exwach koj.

¹⁹ Xwi ta la ile, xaq je o jub'an chik kab'lajuj koj chi je tak'al jujun chke chila pa taq utzal i waqib' cholchol le. Lik nti jun ajawinel anawnaq ile.

²⁰ Xaq ronojel i jalajuj taq tu'b'al uya' i ajawinel lik an-o'oj, xaq ronojel i jalajuj taq ulaq chi o pa nim laj rachoch, chi “K'achelaj Líbano” ub'i. Lik nti jun ub'itaq re we saq-o'oj, man che taq i ij re i ajawinel ma Salomón le, lik nti qas u'ij i saq-o'oj.

²¹ Man i jalajuj taq barco re i ajawinel chi uya'om chila chuchi' i mar junam ku' u-barco ma Hiram, pa taq oxib' junab' keupon chila che i tinimit Tarsis kok'am li an-o'oj, saq-o'oj, marfil, b'atz xaq pacha i qol xwiri kotz'ij kij.

²² I ajawinel ma Salomón lik ij ij knimar uno'oj xaq ub'eyomal chkiwach konojel i ajawinelab' chwach i jyub' ta'aj.

²³ Konojel i ajawinelab' re uwach i jyub' ta'aj lik kkaj rilik uwach, xaq lik kkaj utayik uno'oj chi yatal che rumal i Dios.

²⁴ Konojel i winaq le junab' junab' kkik'am b'i jun usipon i ajawinel chi are iri: Jalajuj taq b'iroxik chi antal che an-o'oj xaq che i saq-o'oj, k'ul jurjaq, ch'ich' anb'al ch'oj, jalajuj taq kunb'al muy, kaway xaq i mulib'.

Ma Salomón ajk'ay ch'ich' re b'inb'al xaq i kaway

²⁵ Ma Salomón o lajujmo' (4,000) k'ijib'al kaway ru' ipa keuya wi ukaway xaq uch'ich'. Xaq o lajujmo' juchiy (12,000) achiyab' ajrij taq kaway ru', chi xeuk'am b'i chila ipa o wi kik'ijib'al ch'ich' re anb'al ch'oj xaq ku' ajchajal re i ajawinel chila pa Jerusalén.

²⁶ I ma Salomón le lik pu'ab' je o wi i jub'an chik ajawinelab' chi kjeqan b'i chi raqana Éufrates k'a chila che i tinimit ke aj Filistea xaq k'a chila chuchi' i tinimit Egipto.

²⁷ I ajawinel xeut'iqb'a k'iyal saq-o'oj chila pa Jerusalén pacha uk'iyal ab'aj chi lik t'ub'ulik, xaq xutik k'iyal che' chakalte' chwa taq ta'aj pacha uk'iyal i higo aj pa taq es.

²⁸ I kaway chi kk'am li che ma Salomón kepe chila pa tinimit Musri xaq che i jub'an chik tinimit.

Ukamik ma Salomón

²⁹ I jub'an chik anoj re ma Salomón k'a are xjeqan loq xaq are xk'isik, tz'ib'tal chupam i wuj crónica re ma Natán, chi profeta, chrij pacha xutzijoj i ma Ahías aj Silo, xaq chrij ni'pa xutzijoj i Dios che ma Iddo, chi profeta, are xutz'ib'aj ronojel i utz taj chi xu'an ma Jeroboam, chi uk'ojol ma Nabat.

³⁰ I ma Salomón xrajawin kawinaq (40) junab' pkiwi konojel aj Israel chila pa Jerusalén.

³¹ Are xkamik xkimuq chila putinimit ma David chi uqajaw. Chrijil chik ire le xkanaj kan uk'ojol puk'exel pa ajawinik chi ma Roboam.