SEGUNDO LIBRO DE CR%D3NICAS 25 - Wuj Pa K'ubultzij

Rajawinik ma Amasías

¹ Ma Amasías o jo'ob' juwinaq (25) junab' che are xujeq ajawinik, b'elejeb' juwinaq (29) junab' xrajawin pa Jerusalén. I uchuch ati Joadán ub'i, chi aj Jerusalén.

² I ma Amasías xu'an i utz xaq i suk'ulik chwach i Ajwal, xwiri ru' ti ronojel uk'ux xu'ano.

³ Ma Amasías are lik xkub'i puk'ijib'al, xeukamsaj konojel ni'pa je aj-atzil chi xekamsaw uqajaw.

⁴ Xwiri xeukamsaj ti kak'al chke man chrij pacha tz'ib'tal chupam i wuj re u'atb'al tzij ma Moisés, i Ajwal xuya i taqaniki: “I qajawxelab' kekamsax ti rumal kimak i kak'al, xaq mitene ak'alab' kekamsax rumal kimak kiqajaw, man chkijujunal kekam ni rumal kimak.”

⁵ Ma Amasías xumol kichi' konojel i achiyab' re utzob'ajil ma Judá xaq utzob'ajil ma Benjamín; xu'an pa taq alk'uwalil chke, xeukoj i aj-atzil pkiwi chi je are aj-atzil ke achiyab' je yij che i ch'oj. Te'uri xerajlaj konojel achiyab' chi o chik juwinaq junab' chke, keje ile xaq xe'ul lajujmo' wuqlajujchiy jut'ub' (300,000) achiyab' chi je yij che i ch'oj chi ketiki chu'anik ch'oj ru' i che' ch'ich' utzam xaq ru' i tob'al ib' re i ch'oj.

⁶ Xaq xeutoj lajujmo' kab'lajujchiy (100,000) achiyab' chi je yij che i ch'oj re i ajawinel ke aj Israel ru' oxlajuj oxwinaq (73) tintal saq-o'oj.

⁷ Xwiri jun rajpatan i Dios xupon chwach i ajawinel, xub'ij che: —Nim laj ajawinel, matkachnimaj taq i achiyab' chi je yij che i ch'oj re i ajawinel ke aj Israel, man i Ajwal nti ku' ike xaq nti ku' utzob'ajil ma Efraín.

⁸ Xwiri we yet kawaj chi katkachnimaj ike jati junam ku' chu'anik ch'oj, xwiri i Dios kixujach ni pki'ab' i ajch'oj chiwij, man i Dios pu'ab' o wi chi kixch'akanik xaq pu'ab' o wi we kijam iwib' —xcha.

⁹ I ma Amasías xutz'onoj che i rajpatan i Dios: —¿Wach kin-an che i oxlajuj oxwinaq tintal saq-o'oj chi xinya chke achiyab' chi je yij che i ch'oj aj Israel? I rajpatan i Dios xub'ij che: —I Ajwal kuya ni k'i chawe chwach ni'pa xaya yet le.

¹⁰ Are uri ma Amasías xeresaj chkixol uwinaq i utzob'ajil ma Efraín chi xeupon te'eq chuto'ik xaq xeutaq b'i chi taq kachoch. Xwiri ike xpe koywal chke aj Judá, are uri xe'e chi taq kachoch mi'naq b'i koywal.

¹¹ Are uri ma Amasías xukowij uwach xaq xeuk'am b'i uwinaq chi je yij che i ch'oj chwa “Ta'aj chi Atz'am” ub'i xaq chila xeukamsaj wi jo'mo' juchiy (10,000) achiyab' aj Seir.

¹² Xwi ta la ile, xaq i aj Judá xekichap jo'mo' juchiy (10,000) achiyab' je k'aslik, xkik'am b'i puwi jun jyub' chi lik k'i ab'aj o chwach; chila xekik'aq li konojel, are uri xe'on ch'aqa taq konojel.

¹³ Xwiri i achiyab' chi je utzob'ajil ma Efraín chi xeutaq b'i ma Amasías chi taq kachoch, man xuya ti chke chi xeton che i ch'oj, xkimaj jalajuj taq tinimit Judá, xjeqan b'i Samaria, xupon k'a Bet-horón, xekikamsaj lajujwinaq wuqmo' (3,000) winaq xaq xkel-aj k'iyal taq ub'itaq ke.

¹⁴ Are xtzalij li ma Amasías chkich'akik aj Edom, xeuk'am li jalajuj taq tiox chi xaril je antalik aj Seir, xaq xu'an chke chi lik je u-dios, xukoj ki'ij xaq xuporoj pom chkiwach.

¹⁵ I Ajwal lik xpe roywal che ma Amasías, rumali xutaq b'i jun profeta ru' chub'ixkil che: —¿B'uchak xamol kichi' i jalajuj taq tiox re jun nim laj tinimit xaq xakoj ki'ij chi xetiki ti chuto'ik kiwinaq are xa'an ch'oj chkij?

¹⁶ Xwiri are k'a ktijin ne i profeta chub'ixkil ile, i ajawinel xub'ij che: —¿Xatab'a at qakojom chuya'ik i pixb'anik chke i ajawinelab'? Chamayij ile chi to' xaqmanal kab'ij ¿O kawaj katkamsaxik? Are uri i profeta x-on ti chik pen che xwiri k'a xub'ij: —Yin weta'am chi Dios lik kuchup ni awach rumal i xa'ano ri chi xak'am ti inpixb'anik.

¹⁷ Xwiri ma Amasías, chi ajawinel ke aj Judá, xa are xuk'am kipixb'anik i jub'an chik winaq, rumali xutaq ub'ixkil i tziji che ma Joás, chi uk'ojol ma Joacaz, xaq ri umam ma Jehú: “Chatpetoq, su' chqa'ana i ch'oj.”

¹⁸ Xwiri ma Joás xutaq ub'ixkil i tziji che: “I k'ix xub'ij che i che' chakalte' chi o chwi taq jyub' Líbano: Chaya ami'al che ink'ojol man k-on rixoqil che. Xwiri jun itzel laj chikop xik'aw chila, xuya'ya kan i k'ix le.

¹⁹ Yet kab'ij chi xeach'ak aj Edom, rumali kana yet chi nim a'ij xaq kattijin chutzukuxik mas a'ij; xwiri lik mas ne utz chat-ol chi awachoch. ¿B'uchak kawaj katzukuj i k'ax pawi xaq pkiwi i tinimit aj Judá?”.

²⁰ Xwiri ma Amasías xkojon ti che, man i Dios uch'ob'om chik chi keje ile kuk'ulmaj rumal xekik'am li jalajuj taq tiox aj Edom, rumali keujach ni pu'ab' ma Joás.

²¹ Are uri ma Joás xumaj b'i ub'e chu'anik ch'oj chrij ma Amasías chila pa Bet-semes chi o chupam ulew Judá.

²² I utzob'ajil ma Judá xqajsax ki'ij kumal aj Israel, rumali konojel i winaq xe'e chi taq kachoch.

²³ Chila pa Bet-semes i ma Joás, chi ajawinel ke aj Israel, xuchap ma Amasías, chi ajawinel ke aj Judá, xuk'am b'i pa Jerusalén. I ma Joás le xaq xuwulijsaj waqwinaq (120) xik'ab' che i tapial nim uwach che i tinimit Jerusalén le, xujeq uwulsaxik che Uchija re ma Efraín, xuk'isa k'a chila che Uchija chi o Puch'uk.

²⁴ Xwi ta la ile, xaq xuk'am ronojel i an-o'oj, saq-o'oj, ronojel i jalajuj taq b'iroxik chi o prachoch i Dios chi yatal pu'ab' ma Obed-edom kuchajij, xaq ronojel i b'eyomal chi o pa nim laj rachoch i ajawinel. Xeuchap b'i keb' oxib' winaq, te'uri xtzalij b'i pa Samaria.

²⁵ Ma Amasías, chi uk'ojol ma Joás, chi ajawinel ke aj Judá, xk'asi chik jo'lajuj junab' chrijil chik ukamik ma Joás, chi uk'ojol ma Joacaz, chi ajawinel ke aj Israel.

²⁶ I jub'an chik lapanik chrij uk'aslemal ma Amasías, are xujeqo xaq are xuk'iso, tz'ib'tal chupam i wuj ke i ajawinelab' aj Judá xaq aj Israel.

²⁷ I ma Amasías are xro'taj i Ajwal, jub'an achiyab' aj Jerusalén xkich'ob' ukamsaxik; are uri ire x-e chuto'ik rib' pa tinimit Laquis. Xwiri lik xkiterb'ej b'ik, xkimaja k'a che i tinimit le i chila xkikamsaj wi.

²⁸ Te'uri xkiya b'i chrij jun kaway xaq xkimuqu chila putinimit mam David ipa je muqtal wi i ratit umam.