SEGUNDO LIBRO DE CR%D3NICAS 23 - Wuj Pa K'ubultzij

¹ Che uwuq junab' ma Joiada xutaq kisik'ixik i je aj-atzil chke achiyab' je yij che i ch'oj chi je are iri: Ma Azarías chi uk'ojol ma Jeroham, ma Ismael chi uk'ojol ma Johanán, ma Azarías chi uk'ojol ma Obed, ma Maasías chi uk'ojol ma Adaía xaq ma Elisafat chi uk'ojol ma Zicri, xub'ij chke chi kkiya kiwach ru'.

² Ike le xeb'in chupam ronojel ulew Judá, xkimol kichi' aj Leví chi je o pa jalajuj taq tinimit Judá xaq i je aj-atzil ke alk'uwalxelab' aj Israel, xe'e konojel pa tinimit Jerusalén.

³ Konojel ni'pa xkimol kib' chila xki'an jun trat ru' i ajawinel prachoch i Dios. I ma Joiada xub'ij chke: “¡I ala chi o chiwachi are rak'al i ajawinel! Are ire ri kmajawik kkanaj pa ajawinel chrij pacha ub'im i Ajwal chke i je umuq uxikin ma David.

⁴ Are iri kmajawik ki'ano: Jun chke i oxib' tzob'aj chiwe, chi ix ajsujul sipon xaq ix aj Leví chi ki'an i patan che i ij sábado, kichajij ni uxol taq uchija re i rachoch i Dios;

⁵ jun chik chke oxib' tzob'aj chiwe kichajij ni i nim laj rachoch i ajawinel, xaq i jun chik chke oxib' tzob'aj chiwe le kichajij ni uxol uchija chi Cimiento ub'i, tz'aqat konojel i winaq kekanaj ni chwaja re i rachoch i Dios.

⁶ Xwiri mijun kok b'i prachoch i Dios, xwi i ajsujul sipon xaq aj Leví chi je o pkipatan. Xwi ike le kmajawik ke'ok b'ik man ike lik je ultalik; xwiri konojel i winaq lik kechajin na kojb'al u'ij i Ajwal.

⁷ I aj Leví kkisutij ni rij i ajawinel, chijujunal kkok'aj i anb'al ch'oj pi'ab'; we o jun lik k-on pen rib' kok b'i prachoch i Dios, lik kkam na. Kiwachnimaj ni ajawinel xaipa k-e wi.” Xcha.

⁸ I aj Leví xaq konojel aj Judá xki'an ronojel ni'pa xb'ix chke rumal ma Joiada, chi ajsujul sipon. Chkijujunal xkik'am i taqanik pkiwi kiwinaq chke ni'pa ke'ok che i chajinik che i ij sábado xaq chke ni'pa ke'el che i chajinik, man ma Joiada, chi ajsujul sipon, xuya ti chke chi ke'e chi taq kachoch ni'pa i xk'is u'ijlal kichak.

⁹ Are uri ma Joiada xujach chke i aj-atzil ke achiyab' chi je yij che i ch'oj, ni'pa i che' ch'ich' utzam xaq i jalajuj taq tob'al ib' re i ch'oj chi re te'eq mam David chi k'olom chila prachoch i Ajwal.

¹⁰ Te'uri xeuya i winaq pa wiqab'im xaq pa moxim chwach uchija che i rachoch i Dios, xaq chrij chwach i sujb'al sipon, is konojel kok'am kiche' ch'ich' utzam tob'al re i ajawinel.

¹¹ Are uri ma Joiada junam ku' i rak'al xkesaj li uk'ojol i ajawinel, xkikoj i koron puja' xaq i jalajuj taq b'iroxik chi koksax chrij jun ajawinel, te'uri xkikoj aceite puja'; keje uya'ik kan uri ile pa ajawinel. Te'uri konojel i winaq xesik'in chub'ixkil: ¡Chk'asi ni i ajawinel!

¹² I ati Atalía are xeuta i winaq chi kesutinik xaq kesik'in chukojik u'ij i ajawinel, x-e prachoch i Ajwal ipa je o wi konojel.

¹³ Are uri xrilo chi tak'al i ajawinel pa okb'al chuk'ulel aqan re i ja. Pa taq utzal je o i aj-atzil xaq aj-ojmanelab' chi ketijin che i ojmanik, konojel lik kekikotik kkixut'ij i trompeta; xaq i ajb'ix ru' i jalajuj taq ki'ojom ketijin chi b'ixanik. Are uri ati Atalía xuraqch'ij u'u' xaq xsik'in chub'ixkil: —¡Yix xa keb' ipalaj xa keb' ipalaj!

¹⁴ Xwiri ma Joiada, chi ajsujul sipon, xeusik'ij i je aj-atzil ke achiyab' chi je yij che i ch'oj, xub'ij chke: —¡Chiwesaj b'i chkixol i winaq xaq chiwesaj b'i chwaja i chikamsaj pachin jun kuya uwach ru'! —Xcha. Man i ajsujul sipon ub'im chi kkamsax ti prachoch i Ajwal,

¹⁵ rumali xkichapo xkesaj b'i che uchija ipa je o wi i kaway che i nim laj ja re i ajawinel, chila xkikamsaj wi.

¹⁶ Chrijil chik ile i ma Joiada xu'an jun trat ku' konojel i winaq xaq ru' i ajawinel, chi je are ni ike je utinimit i Ajwal.

¹⁷ Are uri xe'e la konojel prachoch i Baal xaq xkiwulijsaj li k'ijib'al ipa ksujux wi i sipon, xaq keje xki'an che i jalajuj taq tiox chi xaril je antalik. I ma Matán, chi ajsujul sipon chwach i tiox Baal, xkiwor puqul chila chwach i sujb'al sipon.

¹⁸ Chrijil chik ile ma Joiada xukoj jun chajinel prachoch i Ajwal, xuya pki'ab' i ajsujul sipon xaq aj Leví, chi chjach kan kipatan rumal mam David chi are kkisujuj i sipon prachoch i Ajwal chrij pacha utz'ib'am kan ma Moisés xaq keb'ixan ru' jun nim laj kikotemal, pacha uch'ob'om te'eq ma David.

¹⁹ Xaq xeukoj chajinel pa taq okb'al che i rachoch i Ajwal, man keje ile mijun kok prachoch i Ajwal we u'anom ti ch'am che rib'.

²⁰ Te'uri xeusik'ij i je aj-atzil chke achiyab' chi je yij che i ch'oj, i winaq chi nim kopis, i ajk'amol utzam chke i jalajuj taq tinimit xaq konojel i winaq, xkachnimaj b'i i ajawinel, xe'el chila prachoch i Dios, xe'e chila pa nim laj rachoch i ajawinel. I a Joás xok b'i che i nim laj uchija. Te'uri xkikub'a i ajawinel che ukub'ib'al chi o u'ij.

²¹ Konojel i winaq lik xekikotik. Lik o chomb'al ib' chkixol, man ru' ch'ich' chi k'ulala o uware xkamsax wi ati Atalía.