SEGUNDO LIBRO DE CR%D3NICAS 22 - Wuj Pa K'ubultzij

Rajawinik ma Ocozías

¹ I winaq aj Jerusalén puk'exel kan ma Joram, xkikoj uk'ojol cha'xel pa ajawinel chi ma Ocozías, man konojel uk'ojol chi je atzib' xekamsax kumal jub'an ili'omab' chi junam ku' aj Arabia xe'ok pa tinimit. Rumali chi ma Ocozías, chi uk'ojol ma Joram, chi ajawinel te'eq pa Judá, xujeq ajawinik.

² I ma Ocozías le o keb' juwinaq (22) junab' che are xujeq ajawinik, jun junab' xrajawin chila pa Jerusalén. I uchuch ati Atalía ub'i, chi ri umam kan ma Omri.

^3-4 Ma Ocozías le xaq xu'ano pacha xu'an ma Acab xaq pacha xki'an i rak'al, man i uchuch lik xutun chupam i utz taj, rumali lik je utz ku' i ralk'uwal ma Acab, ronojel ni'pa i xu'ano lik utz taj chwach i Ajwal. Man chrijil chik ukamik uqajaw, are i ralk'uwal ma Acab le xepixb'awik, rumali lik xaqmanal xu'an ma Ocozías.

⁵ Rumal uk'amik i pixb'anik le, ma Ocozías xuya uwach ru' ma Joram, chi uk'ojol ma Acab, chi ajawinel ke aj Israel; man keje ile kki'an ch'oj chrij ma Hazael, chi ajawinel ke aj Siria, chila pa Ramot chi ukwenta i ulew Galaad. Xwiri i aj Siria xki'an k'ax che ma Joram.

⁶ I ma Joram le xtzalij b'i pa Jezreel chukunaxik rib' rumal i k'ax chi x-an che kumal aj Siria chila pa Ramot are xu'an ch'oj chrij ma Hazael, chi ajawinel ke aj Siria. Rumali ma Ocozías x-e chusolixik ma Joram le chila pa Jezreel man iwab'.

Ukamsaxik ma Ocozías rumal ma Jehú

⁷ I Dios lik uch'ob'om chik chi ma Ocozías kkam na are kupon chusolixik ma Joram. K'ate ne xuponik, xe'e la ru' ma Joram chuk'ulaxik ma Jehú, chi uk'ojol ma Nimsi. Xwiri i Dios u'ulum chik ma Jehú le re keukamsaj i ralk'uwal ma Acab.

⁸ I ma Jehú are ktijin chu'anik i atb'al tzij chke i ralk'uwal ma Acab, xeuriq i aj-atzil ke aj Judá xaq i rachalal ma Ocozías, chi kki'an kipatan chrij ire, xaq lik xeukamsaj.

⁹ Xaq xutaq uk'amik ma Ocozías, chi ruwam te'eq rib' chila pa Samaria, xkichapo xkik'am b'i ru' ma Jehú xaq xkikamsaj. Xwiri utz umuqik xki'ano man ri umam kan ma Josafat, chi lik xuya uk'ux chutzukuxik i Ajwal. Keje uri ile chi lik mijun chke i rak'al ma Ocozías xk'asi kanoq re kuk'am chik upatan i etz uqajaw.

Ati Atalía kuk'am i kub'ib'al chi o u'ij

¹⁰ Ati Atalía, chi uchuch ma Ocozías, are xretamaj chi xkam i ralab', are uri x-e chkikamsaxik konojel ni'pa i ralk'uwal i ajawinel chi o pa Judá.

¹¹ Xwiri ati Josabet, chi umi'al i ajawinel ma Joram, xresaj a Joás, chi uk'ojol ma Ocozías chkixol i jub'an chik rak'al i ajawinel chi ktijin kikamsaxik, xruwaj chwach ati Atalía chupam jun warb'al junam ru' ixoq chi xk'itsawik, rumali chi xkamsax taj. Ile are ati Josabet x-anawik, chi umi'al i ajawinel ma Joram, ranab' ma Ocozías xaq rixoqil ma Joiada, chi ajsujul sipon.

¹² I a Joás le ruwam rib' ku' i keb' ixoqib' le chupam i rachoch i Ajwal, tz'aqat ati Atalía o pa ajawinel pa tinimit.