SEGUNDO LIBRO DE CR%D3NICAS 21 - Wuj Pa K'ubultzij

Rajawinik ma Joram

¹ Are xkam ma Josafat, xmuq chila putinimit ma David chi etz umam. Puk'exel ire xkanaj kan uk'ojol pa ajawinel chi ma Joram.

² I ucha' ma Joram, chi je uk'ojol ma Josafat, je are iri: Ma Azarías, ma Jehiel, ma Zacarías, ma Micael xaq ma Sefatías; konojel ike le je uk'ojol ma Josafat, chi ajawinel pa Judá.

³ I ma Josafat xusipaj k'iyal taq b'iroxik chke uk'ojol chi an-o'oj, saq-o'oj xaq jub'an chik b'iroxik chi lik paqal rajil. Xaq xuya jalajuj taq tinimit chke chi sutim rij ru' tapial nim uwach chila pa Judá, xwiri i ajawinik xuya kan che ma Joram man are ire atz chke.

⁴ Xwiri ma Joram are lik kul chik puk'ijib'al chi o u'ij re kan uqajaw, lik ru' kuchil xeukamsaj konojel ucha' xaq jujun chke aj-atzil ke aj Israel.

⁵ I ma Joram le o kab'lajuj juwinaq (32) junab' che are xujeq ajawinik, xuch'ij wajxaqib' junab' pa ajawinik chila pa Jerusalén.

⁶ Xwiri xu'ano pacha xki'an konojel i ajawinelab' aj Israel xaq xu'ano pacha xki'an i rak'al ma Acab, man i rixoqil ralk'uwal kan ma Acab; rumali ronojel ni'pa xu'ano lik utz taj chwach i Ajwal.

⁷ Xwiri i Ajwal xuchup ti kiwach i ralk'uwal kan ma David rumal i trat chi u'anom ru'. Man i Ajwal ub'im che ma David xaq chke i ralk'uwal: Arewi kjuluw ni kantil re ma David chinwach.

⁸ Che rajawinik ma Joram, i tinimit Edom xwalij chu'anik ch'oj chrij i tinimit Judá xaq xki'an kib' chu'ulik jun kajawinel.

⁹ Are uri ma Joram xe'e junam ku' i aj-atzil ke achiyab' chi je yij che i ch'oj xaq xuk'am b'i ronojel ni'pa uch'ich' re anb'al ch'oj; are xok a'ab' i ma Joram le xaq i aj-atzil ke achiyab' chi je yij che i ch'oj xkisutij kij aj Edom xaq xki'an ch'oj chkij.

¹⁰ Xwiri aj Edom xkesaj kib' chuxe' kitaqanik aj Judá i k'a are je o wi wo'or. Xaq che taq i ij le aj Libna xkesaj kib' pu'ab' ma Joram. Man i ma Joram le xro'taj kan i Ajwal, chi ki-Dios i ratit umam.

¹¹ Xwi ta la ile, xaq xu'an jalajuj lo'laj taq k'ijib'al tzam taq jyub' Judá kojb'al ki'ij i jalajuj taq tiox chi xaril je antalik, are ile x-anawik rumali i winaq aj Jerusalén xekojon ti che i Ajwal, xaq xeusachsaj aj Judá.

¹² Are uri ma Joram le xupon jun wuj pu'ab' re ma Elías, chi profeta, keje iri kub'ij: “I Ajwal, chi u-Dios mam David, chi amam, kub'ij chawe: Xa'an ti utz pacha xu'an ma Josafat, chi aqajaw, xaq pacha xu'an ma Asa, chi ajawinel re i tinimit Judá.

¹³ Yet xatterej chu'anik pacha xki'an i ajawinelab' re i tinimit Israel, awumal yet chi aj Judá xaq aj Jerusalén xekojon ti che i Ajwal pacha xki'an i ralk'uwal ma Acab. Xwi ta la ile, xaq xeakamsaj acha' chi lik mas je utz chawach yet.

¹⁴ Rumali i Ajwal kuya ni jun nim laj k'ax puwi atinimit, pkiwi awak'al, awixoqil xaq pkiwi konojel ub'itaq awe.

¹⁵ Xaq kuya ni k'iyal taq yob'il pawi yet; lik kat-on ni iwab' rumal jun itzel laj yob'il chi kpe ni uk'axk'ol apam k'a kel na li awixkol rumal.”

¹⁶ Are uri i Ajwal xu'an chke aj Filistea xaq aj Arabia chi je o chkij chkiwach aj Cus chi xpe jun nim laj koywal che ma Joram;

¹⁷ rumali chi xe'e chu'anik ch'oj chkij aj Judá, xkimaj i tinimit chke, xkik'am b'i ronojel i jalajuj taq b'eyomal chi o pa nim laj rachoch i ajawinel, xkik'am b'i rak'al xaq rixoqil ma Joram. Xwi a Joacaz xkanaj kan ru', chi cha'xel.

¹⁸ Chrijil chik ronojel ile i Ajwal xupetsaj jun nim laj yob'il che upam chi lik kkuntaj taj.

¹⁹ Keje ile xik'aw k'iyal ij, xwiri are ya xik'aw keb' junab', xel li rixkol rumal i yob'il xaq lik xkam b'i rumal uk'axk'ol. I uwinaq mitene jun kantela xkitzij che k'axnab'al re, pacha x-an chke i ratit umam.

²⁰ I ma Joram le o kab'lajuj juwinaq (32) junab' che are xujeq ajawinik chila pa Jerusalén, wajxaqib' junab' xuch'ij pa ajawinik chila. Mijun xo' taq che are xkamik. Xkimuq chila putinimit mam David, xwiri chila taj ipa kemuq wi i ajawinelab'.