SEGUNDO LIBRO DE CR%D3NICAS 18 - Wuj Pa K'ubultzij

Ma Micaías kutzijoj ujamik rib' ma Acab che i ch'oj

¹ Ma Josafat xuriq k'iyal taq b'eyomal, unimarsaxik u'ij xaq xe'on achalib' ru' ma Acab.

² Are ik'awnaq chik keb' oxib' junab', i ma Josafat x-e pa tinimit Samaria chusolixik ma Acab, i ma Acab le xutaq ukamsaxik k'iyal taq chij k'iyal taq chikop yab'al u'ij ma Josafat xaq ni'pa i je achnimawnaq b'ik. Xaq xuyu'uj chi junam kki'an ch'oj chrij i tinimit Ramot, chi ukwenta ulew Galaad.

³ Are uri ma Acab, chi ajawinel ke aj Israel, xutz'onoj che ma Josafat, chi ajawinel ke aj Judá: —¿Kawaj kinawachnimaj chu'anik ch'oj chrij i tinimit Ramot, chi ukwenta ulew Galaad? I ma Josafat xub'ij: —Yin xaqjunam ku' inwinaq chi je yij che i ch'oj, oj o awu' xaq oj o ku' awinaq chu'anik ch'oj.

⁴ Xwiri nab'e chatz'onoj che i Ajwal, we utz ka'an ile.

⁵ I ajawinel ke aj Israel xumol kichi' konojel i profeta chi je jumo' (400) konojel, xutz'onoj chke: —¿Kmajaw nawi kqa'an ch'oj chrij i tinimit Ramot chi ukwenta ulew Galaad o kmajaw taj? Are uri ike xkib'ij: —Cha'ana ch'oj chrij man i Dios kujach ni tinimit le pa'ab'.

⁶ Xwiri ma Josafat xutz'onoj chke: —¿Nti nawi jun profeta waral man keje ile xaq kqatz'onoj che?

⁷ Are uri i ajawinel ke aj Israel xub'ij che ma Josafat: —O jun chik chi utz we kqatz'onoj che wach kub'ij i Ajwal. Ire le are ma Micaías, uk'ojol ma Imla; xwiri yin tzel kwilo man mijuyak kutzijoj utz laj taq b'iroxik chwe, lik arewi xwi i utz taj kutzijoj chwe —xcha. Xwiri ma Josafat xub'ij che: —Mab'ij ile, nim laj winaq.

⁸ Are uri i ajawinel ke aj Israel xusik' la jun rajpatan, xub'ij che: —Jat, la, chusik'ixik ma Micaías, chi uk'ojol ma Imla.

⁹ I ma Acab, chi ajawinel ke aj Israel xaq ma Josafat, chi ajawinel ke aj Judá, kikojom ki'u' re anb'al ch'oj, je kul chupam i kikub'ib'al chi o u'ij pa okb'al che i tinimit Samaria. Konojel i profeta xmajaj kijolom rumal i tewal chkiwach i keb' ajawinelab' le.

¹⁰ I ma Sedequías, chi uk'ojol ma Quenaana, u'anom jub'an ok'a' ch'ich' xaq ksik'in chub'ixkil i tziji: Keje iri ub'im i Ajwal: “¡Ru' i ok'a'i ka'an ni ch'oj chkij aj Siria k'a kak'is ni kiwach konojel.”

¹¹ Konojel i profeta xaqjun chitzij kkib'ij che ma Acab chi ajawinel: “Cha'ana ch'oj chkij i winaq chi aj Ramot chi ukwenta i Galaad man keach'ak na, man i Ajwal kujach i tinimit le pa'ab'.”

¹² I ajb'il tzij chi enaq te'eq chusik'ixik ma Micaías, xub'ij che: —Konojel i jub'an chik profeta lik xaqjun chitzij kkib'ij, man konojel kiya'om jun utz laj tzijonik che i ajawinel. Rumali kintz'onoj utzil chawe chi chab'ij ni tzij pacha kkib'ij ike le xaq chatzijoj ni jun tzij chi utz jub'i'.

¹³ Xwiri ma Micaías xub'ij che: —¡Lik pub'i i Ajwal kinb'ij chi xwi kinb'ij i tzij chi kinutaq Ire chub'ixkil!

¹⁴ Te'uri xupon chwach i ajawinel, are uri i ajawinel le xutz'onoj che: —Ma Micaías ¿Kmajaw nawi kqa'an ch'oj chrij i tinimit Ramot chi ukwenta ulew Galaad, o kmajaw taj? Are uri ma Micaías xub'ij: —Chi'ana ch'oj chkij man i Ajwal kujach ni tinimit le pi'ab'.

¹⁵ Xwiri i ajawinel xub'ij che: ¿Ni'pa mul rajwaxik kinb'ij chawe chi xwi i saq laj tzij kab'ij ni chwe pub'i Ajwal?

¹⁶ Are uri ma Micaías xub'ij: Je wilom konojel aj Israel chi to' je ch'etch'et ki'anom b'i pa taq es, pacha jub'an chij chi nti keyu'uwik. I Ajwal ub'im: “I winaqi nti kajaw; chkijujunal che'oj chi taq kachoch.”

¹⁷ I ajawinel ke aj Israel xub'ij che, ma Josafat: —Lik xinb'ij ile chawe chi achi le lik nti jun utz laj b'iroxik kutzijoj chwe, lik xwi i utz taj kutzijoj.

¹⁸ Ma Micaías xub'ij chik: —Rumal i xab'ij le wo'or, chikojo retalil utzij i Ajwal: Xwil i Ajwal kul chupam i ukub'ib'al chi o u'ij, xaq xewil konojel i achiyab' chi je yij che i ch'oj aj chikaj chi je tak'al puwiqab'im xaq pumoxim.

¹⁹ Are uri i Ajwal xutz'onoj: “¿Pachin nawi k-e chuyu'uxik ma Acab man k-e chu'anik ch'oj chrij i tinimit Ramot chi ukwenta ulew Galaad chuqajsaxik ki'ij chila?” O jub'an junwi xkib'ij xaq o jub'an chik junwi xkib'ij.

²⁰ Xwiri jun tewal xupon chwach i Ajwal xaq xub'ij che chi are ire k-e chuyu'uxik ma Acab. I Ajwal xutz'onoj che wach u'anik k-on che,

²¹ i tewal le xub'ij chi kuya ni t'oronik pkichi' konojel i je aj-atsal utzij i ajawinel. Are uri i Ajwal xub'ij che: Lik kattiki ni chut'orik, jat cha'ana pacha xab'ij.

²² Wo'or aweta'am chik chi i Ajwal ukojom jun t'oronik pkichi' konojel je aj-atsal atzij le xaq usaqim chi katij ni k'ax.

²³ Are uri ma Sedequías, chi uk'ojol ma Quenaana, xtejeb' pan ru' ma Micaías xuxa' jun ab' che upalaj xaq xub'ij: ¿Ipa xel wi utewal i Ajwal chwe yin man wo'or xatu'ijla yet?

²⁴ I ma Micaías xub'ij che: —Lik kawetamaj na are kuriq i ij chi to' kawuwaj chik awib' chi taq ja.

²⁵ Are uri i ajawinel ke aj Israel xuya i taqaniki: —¡Chichapa ma Micaías le, chik'ama b'i prexil chwach ma Amón, chi aj-ok'al utzam i tinimit, xaq chwach ma Joás chi ink'ojol!

²⁶ Chib'ij chke chi yin kintaq uminik prexil, xa jub'i' uwa xaq xa jub'i' uya' chkiya che k'a kintzalij na li yin we to' utz inwach nti kink'ulmaj.

²⁷ Are uri ma Micaías xub'ij chik: “We utz awach xaq we nti kak'ulmaj are kattzalij loq, ke'el uri chi ni'pa inb'im le are ti Dios xb'iw chwe.”

²⁸ Keje uri ile, chi ajawinel ke aj Israel xaq ma Josafat, chi ajawinel ke aj Judá, xkimaj b'i kib'e, xe'e chu'anik ch'oj chrij i tinimit Ramot chi ukwenta ulew Galaad.

²⁹ I ajawinel ke aj Israel xub'ij che ma Josafat: —Yin kin-e chu'anik ch'oj ru' jun in-u' junwi, xwiri yet kakoj b'i in-u' yin. Keje uri ile chi i ajawinel ke aj Israel xukoj b'i u'u' junwi, junam x-e chu'anik ch'oj.

³⁰ Xwiri i ajawinel aj Siria ub'im chke i aj-atzil ke i jalajuj taq ch'ich' re anb'al ch'oj chi kki'an ti ch'oj ru' jun we are ti ajawinel ke aj Israel.

³¹ I aj-atzil ke i ch'ich' re anb'al ch'oj are xkil ma Josafat, xkich'ob' ike chi are ma Acab, chi ajawinel ke aj Israel, are uri xkisutij rij kamsab'al re. Xwiri ma Josafat xsik'in chutz'onoxik utob'al, i Ajwal xuto xaq xu'an chke i ajch'oj chrij chi xe'anmajik.

³² Ike are xkilo chi are ti ajawinel ke aj Israel, are uri xkimayij roqtaxik.

³³ Xwiri jun achi chi yij che i ch'oj to' xuk'aq jun uch'ab', i ch'ab' le lik xok b'i chila ipa kuriq wi rib' uchi' u'u' i ajawinel re tob'al uwach uk'ux, rumali lik xuch'ap b'i chwach uk'ux i ajawinel ke aj Israel le. Are uri i ajawinel le xub'ij che i achi chi uk'amom b'i i ch'ich' re anb'al ch'oj: —Chojtzalijoq xaq chinawesaj b'i pa ch'oj man lik k'ax chik in olik.

³⁴ Che i ij le lik xnimar i ch'oj, rumali chi i ajawinel ke aj Israel lik xtak'i chupam uch'ich' chu'anik ch'oj chkij aj Siria k'a xqaj ij; xwiri che uqajb'al ij le xkamik.