SEGUNDO LIBRO DE CR%D3NICAS 16 - Wuj Pa K'ubultzij

Ujunamsaxik kitzij ma Asa ru' ma Ben-adad

¹ Xwiri are o chik waqlajuj juwinaq (36) junab' che rajawinik ma Asa, i ma Baasa, chi ajawinel re i tinimit Israel, x-e chu'anik ch'oj chkij aj Judá, xaq xusutij rij i tinimit Ramá ru' i tapial nim uwach man keje ile mijun kel loq xaq mijun kok b'i ru' ma Asa, chi ajawinel re i tinimit Judá.

² Are uri ma Asa xuk'am ronojel i an-o'oj xaq i saq-o'oj chi o chupam i yab'al mer prachoch i Ajwal, xaq ni'pa o pa nim laj rachoch i ajawinel, xutaq b'i che ma Ben-adad, chi ajawinel pa tinimit Siria, chi jeqel chila pa tinimit Damasco. Xaq xutaq b'i ub'ixkil i tziji che:

³ “Chqa'ana jun trat awu' pacha xki'an i qatit qamam chkiwach; yin kintaq b'i jub'an sipon chawe chi are i an-o'oj xaq i saq-o'oj, xwiri yet kayoj i trat chi xa'an ru' ma Baasa, chi ajawinel re i tinimit Israel, man keje ile kumayij u'anik ch'oj chwij.”

⁴ Ma Ben-adad utz xuta wach xb'ix che rumal ma Asa, chi ajawinel re i tinimit Judá, are uri xeutaq b'i i kaj-atzil achiyab' chi je yij che i ch'oj man kki'an ch'oj chkij i jalajuj taq tinimit Israel. Keje uri ile chi ma Ben-adad xuk'am kan i jalajuj taq tinimiti: Ijón, Dan, Abel-maim xaq ronojel ni'pa i k'ijib'al ipa kk'oli wi i jalajuj taq b'iroxik chila pa tinimit Neftalí.

⁵ I ma Baasa are xuta ile xumayij u'anik i tapial nim uwach chi ktijin te'eq chu'anik chrij chwach i tinimit Ramá.

⁶ Are uri i ajawinel ma Asa xeuk'am b'i uwinaq chi aj Judá, xe'e chuk'amik ronojel ni'pa i ab'aj xaq i che' chi xusutij ma Baasa chrij i tinimit Ramá. Ru' ronojel ile xusutij rij i tinimit Geba xaq i tinimit Mizpa.

⁷ Che taq i ij le i profeta, chi ma Hanani, x-e chusolixik ma Asa, chi ajawinel re i tinimit Judá, xub'ij che: “Wo'or kattiki ti chu'anik ch'oj chkij i achiyab' chi je yij che i ch'oj re i ajawinel aj Siria, man xakub'a ti ak'ux che i Ajwal chi a-Dios, xa che i ajawinel aj Siria xakub'a wi ak'ux.

⁸ ¿Je k'i twa i achiyab' chi je yij che i ch'oj aj Etiopía xaq aj Libia chi lik k'i kikaway xaq k'i kich'ich' re anb'al ch'oj? Xwiri i Ajwal xeujach pa'ab' man xakub'a ak'ux che Ire.

⁹ Man i Ajwal lik reta'am wach kuk'ulmaj chwach ronojel i jyub' ta'aj, yab'al kicho'ab' ni'pa kkikub'a kik'ux che Ire. ¡Che ile lik a'anom nti anojb'al che awib'! Man wo'or ni'pa i k-eki lik knimar ni ch'oj chawij.” Xcha.

¹⁰ Are uri i ma Asa lik xpe roywal che i profeta, rumali xutaq uminik prexil. Xaq che taq i ij le lik x-on k'ax chke jujun winaq aj chila pa tinimit.

Ukamik ma Asa

¹¹ I u'anoj ma Asa k'a chujeqanik loq xaq k'a are xk'isik, tz'ib'tal chupam i kiwuj i ajawinelab' aj Judá xaq aj Israel.

¹² Are o chik b'elejlajuj juwinaq (39) junab' che rajawinik ma Asa, xpe jun yob'il che i raqan; xwiri che uyob'il le xutzukuj ti i Ajwal, xa je are i ajkunanelab' xeutzukuj.

¹³ Xkamik are o chik jun kawinaq (41) junab' che rajawinik,

¹⁴ xkimuq chila pa jul chi utaqom u'anik putinimit mam David. Xkiya puwi jun ch'at xaq lik xkib'ak uch'akul chupam jalajuj taq kunb'al chi lik muy. Te'uri xkinuk' jun nim laj a' yab'al u'ij.