SEGUNDO LIBRO DE CR%D3NICAS 11 - Wuj Pa K'ubultzij

¹ Are xupon ma Roboam pa tinimit Jerusalén, xumol kichi' lajujmo' kachiy jut'ub' (180,000) achiyab' chi je yij che i ch'oj chi je re utzob'ajil ma Judá, xaq re utzob'ajil ma Benjamín man keje ile ke'e chu'anik ch'oj chkij aj Israel k'amb'al tan chik re rajawinik.

² Xwiri i Ajwal xu'ijla ma Semaías, chi lik rajpatan ire, xub'ij che:

³ “Chab'ij che ma Roboam, chi uk'ojol ma Salomón, chi ajawinel pa Judá, xaq chke konojel aj Israel chi je o pa Judá xaq chke aj Benjamín,

⁴ chi Yin kinb'ij chke mki'an ch'oj ku' i katz kicha'. Chetzalij b'i konojel chi taq kachoch man keje ile kwaj Yin chi k-antaj na.” Xcha. Are xkita wach xub'ij i Ajwal chke, xetzalij b'i konojel chi taq kachoch, xe'e ti chik chu'anik ch'oj chrij ma Jeroboam.

I ma Roboam kel chisaq

⁵ Ma Jeroboam xjeqi pa Jerusalén xaq xuyak tinimit chi xusutij rij ru' i tapial nim uwach chila pa Judá.

⁶ Xukowij rij i jalajuj taq tinimiti ru' tapial nim uwach: Belén, Etam xaq i Tecoa,

⁷ Bet-sur, Soco, Adulam,

⁸ Gat, Maresa, Zif,

⁹ Adoraim, Laquis, Azeca,

¹⁰ Zora, Ajalón xaq i Hebrón. Are tinimit ile chi xoksax i tapial nim uwach chrij chi je o pa Judá xaq pa Benjamín.

¹¹ Xukamulij ukowirsaxik i tapial nim uwach, xaq xeukoj aj-atzil pkiwi, xaq xutaq b'i jalajuj wach taq kkitijo, i aceite xaq i uwa'al uva muqb'am.

¹² Xaq xuya tob'al kib' re i ch'oj, kiche' chi ch'ich' utzam, keje ile chke konojel i tinimit lik utz uchajixik xu'ano. Keje uri ile chi ma Roboam xkanaj kan ulew Judá xaq ulew Benjamín pu'ab'.

¹³ I ajsujul sipon xaq aj Leví re ronojel i tinimit Israel chi kepe pa jalajuj taq k'ijib'al xkiya kiwach ru' ma Roboam.

¹⁴ I je aj Leví xko'taj kan kulew chi re uwayb'al kichikop xaq i jub'an chik kulew, xe'e pa jeqelem pa tinimit Jerusalén xaq che jub'an chik tinimit Judá, man ma Jeroboam xaq konojel ni'pa i rak'al xkiya ti chke chi kki'an kipatan re i ajsujul sipon.

¹⁵ I ma Jeroboam je ukojom chik jub'an ajsujul sipon chkiwach jub'an chik dios, che i jalajuj taq k'ijib'al ipa kki'an wi sujunik chkiwach itzel xaq chkiwach uk'exwach torib' chi xu'ano.

¹⁶ Xwiri i jub'an chik chi lik kiya'om kik'ux chutzukuxik i Ajwal, chi ki-Dios aj Israel, xki'ano chrij pacha xki'an ni'pa i ajsujul sipon xaq aj Leví, xe'e pa Jerusalén chusujuxik kisipon chwach i Ajwal, chi ki-Dios i katit kimam.

¹⁷ Keje uri ile chi xkikowirsaj i ajawinik pa tinimit Judá xaq xkito ma Roboam, chi uk'ojol ma Salomón. Ile xa oxib' junab' xuch'ijo man xwi i junab' ile xki'ano chrij pacha xu'an mam David xaq ma Salomón.

¹⁸ Ma Roboam xk'uli ru' ati Mahalat, chi umi'al ma Jerimot, chi uk'ojol mam David ru' ati Abihail, i ati Abihail le umi'al ma Eliab, chi uk'ojol ma Isaí.

¹⁹ I rak'al ma Roboam ru' ati Mahalat je are iri: Ma Jehús, ma Semarías xaq ma Zaham.

²⁰ Chrijil chik ile i ma Roboam xk'uli ru' ati Maaca, chi umi'al ma Absalón; i kak'al je are iri: Ma Abías, ma Atay, ma Ziza xaq ma Selomit.

²¹ Ma Roboam xk'uli ku' wajxaqlajuj ixoqib' xaq je o oxwinaq (60) qas ti mer je rixoqil, xwiri are mer k'ax kuna chkixol konojel ixoqib' le are ati Maaca. Xuk'uwalij wajxaqib' juwinaq (28) uk'ojol xaq oxwinaq (60) umi'al ronojel.

²² Ma Roboam le xuch'ik rij ma Abiam, chi ralab' ati Maaca, chuya'ik pa aj-atzil pkiwi i ratz ucha', man kraj kuya kan pa ajawinel.

²³ Xuyijb'a ru' jun nim laj nojb'al i xujach i jalajuj taq tinimit re i Judá xaq re i Benjamín chke i jub'an chik rak'al xaq xujach ronojel i tinimit chi sutim rij ru' tapial nim uwach; lik k'i ub'itaq ke xuya'o xaq je k'i kixoqil xeutzukuj.