SEGUNDO LIBRO DE CR%D3NICAS 1 - Wuj Pa K'ubultzij

Utz'onoxik uno'oj ma Salomón che i Dios

¹ Ma Salomón, chi uk'ojol ma David, lik mijun xelsaw che i ajawinik rumal utonik i Ajwal, rumali chi lik xnimar u'ij.

² Are uri xeusik'ij konojel aj Israel: Je aj-atzil ke i achiyab' chi je yij che i ch'oj je uwi ujolom i tinimit xaq konojel i aj-atzil ke i jalajuj taq alk'uwalil chi o i atb'al tzij pki'ab' chila pa Israel.

³ Are uri ma Salomón xaq konojel i winaq chi xkimol kib', xe'e pa tinimit Gabaón ipa o wi i ja re riqb'al ib' ru' i Dios, ipa koksax wi u'ij i Dios chi u'anom kan ma Moisés, chi rajpatan i Dios, chila pa tz'inilik jyub' chaqij.

⁴ Xwiri ma David uk'amom b'i ukaxa i Dios chila Quiriat-jearim, xuk'am b'i k'a che i k'ijib'al chi uyijb'am ire, chi uyakom jun ja re k'ul chila Jerusalén.

⁵ I sujb'al sipon re anch'ich' chi uyijb'am te'eq ma Bezaleel, chi uk'ojol ma Uri, xaq ri umam ma Hur, o chila chwach i ja re riqb'al ib' ru' i Dios chila pa Gabaón. Rumali ma Salomón xaq konojel i winaq xe'e chila chutz'onoxik kino'oj che i Dios.

⁶ Are uri i ma Salomón xel an puwi i sujb'al sipon anch'ich' chi o chwach i Ajwal, chila chwach i ja re riqb'al ib' ru' i Dios, chila xusujuj lajujwinaq kamo' (1,000) porom sipon.

⁷ Lik che i a'ab' le i Dios xuk'ut rib' che ma Salomón, xub'ij che: “Chatz'onoj ronojel ni'pa kawaj man yin kinya ni chawe.”

⁸ Ma Salomón xub'ij che i Dios: Yet xa'an jun nim laj utzil che i etz inqajaw ma David, xaq xinaya yin pa ajawinel puk'exel kan ire.

⁹ Wo'or ut Ajwal Dios cha'ana chrij pacha asujunik che inqajaw ma David, man xinaya pa ajawinel pkiwi i winaq chi lik je k'i pacha uk'aj ulew.

¹⁰ Rumali chaya innojb'al xaq chaya inb'iwil chrok'axik utzam chke i winaqi, man ¿pachin taq wa ktiki chu'atik tzij puwi i nim laj atinimiti?

¹¹ Are uri i Dios xub'ij che ma Salomón: “We are arayijb'al ile, man atz'onom ti ab'eyomal, atz'onom ti jalajuj taq ub'itaq awe, ukojik a'ij, kikamsaxik i ajch'oj chawij, xaq mitene jun ak'aslemal chi lik nim; puk'exel ile yet xatz'onoj anojb'al ab'iwil re u'anik jun utz laj atb'al tzij pkiwi intinimit chi xatinya pa ajawinel pkiwi,

¹² yin kinya ni uri anojb'al xaq ab'iwil; xwi ta la ile, xaq kinya ni ab'eyomal, xaq a'ij chi xinya ti chke i ajawinelab' chaxe'el yet, xaq kinya ti chke i ajawinelab' chawijil chik yet.”

¹³ Chrijil chik ile i ma Salomón xel chila pa Gabaón che i ja re riqb'al ib' ru' i Dios, i xtzalij b'i pa Jerusalén chrijil chik u'olem pa ja re k'ul re riqb'al ib' ru' i Dios, i xujeq ajawinik pkiwi aj Israel.

Ma Salomón kulo'o xaq kuk'ayij ch'ich' re b'inb'al xaq i kaway

¹⁴ Ma Salomón xumol uchi' ronojel i ch'ich' re anb'al ch'oj, xaq konojel i winaq ajrij taq kaway. Lajujwinaq oxmo' (1,400) ch'ich' re anb'al ch'oj o ru', xaq lajujmo' juchiy (12,000) winaq ajrij taq kaway. Te'uri xeuk'am b'i chila ipa o wi kik'ijib'al ch'ich' re anb'al ch'oj xaq ku' ajchajal re i ajawinel chila pa Jerusalén.

¹⁵ I ajawinel xeut'iqb'a k'iyal saq-o'oj xaq an-o'oj chila pa Jerusalén pacha uk'iyal ab'aj chi lik k'i t'ub'ulik, xaq xutik k'iyal che' chakalte' chwa taq ta'aj pacha uk'iyal i higo aj pa taq es.

¹⁶ I kaway chi kk'am li che ma Salomón kepe chila pa tinimit Musri xaq pa Cilicia, man i je ajlo'onel re i ajawinel le chila keupon wi chulo'ik.

¹⁷ Jun ch'ich' chi klo' chila pa Egipto lajujwinaq jumo' (600) saqpwaq rajil, jun kaway lajuj wuqwinaq (150) saqpwaq rajil. Te'uri i ajlo'onel xaq ajk'ayinel re ma Salomón kkik'ayij chub'i chke i ajawinelab' aj Het xaq chke i ajawinelab' aj Siria.