1 Timotéo 2 - Wuj Pa K'ubultzij

I lapanik ru' i Dios pkiwi konojel i winaq

¹ Wo'or o keb' oxib' tzij kwaj kinb'ij chawe: Nab'e, chab'ij chke konojel i je re i Dios chi o ni uchak kojlapan ru' i Dios, chqatz'onoj che pkiwi i winaq, chqatz'onoj che wach i rajwaxik chke, xaq chqatioxij che i Dios kumal konojel i winaq.

² Chqatz'onoj che i Dios pkiwi i ajawinelab', xaq pkiwi i raqan u'ab', man chom ni uri kojk'iji'ik, xaq nti ch'oj kpe pqawi. Nti koj-atiw uri chu'ankil pacha kraj i Dios xaq chu'ankil ronojel pacha i kmajawik.

³ We keje kqa'an ile, utz uri ke'eloq, xaq chom kril i Dios chi Tol qe.

⁴ Kraj Ire chi konojel ketotajik; xaq lik kketamaj ni saq laj tzij.

⁵ Man xa jun i Dios o pqawi qonojel, xaq xa jun achi chi ku'atsaj qatzij chwach i Dios; ile are i Jesucristo chi antal winaq che.

⁶ Ire lik xuya rib' che i kamik pacha qajachik rumal i totajik re qonojel are xuriq i ij chi uch'ikom i Dios. Keje ile x-antajik k'utb'al re chqe chi i Dios kraj chi qonojel kojtotajik.

⁷ Rumali xinucha yin chub'ixkil i tzij le; xu'an apóstol chwe, xaq xinutaq b'i chuk'utik chke i ne te aj Judío winaq wach i ukub'ib'al kik'ux che i Jesucristo, xaq wach i saq laj tzij re i Dios. Qatzij i xinb'ij le; kint'oron taj.

I kik'aslemal achiyab' xaq ixoqib'

⁸ Rumali, kwaj yin chi lik xa'ipa i achiyab' chkimayij uchapik kib' pa tzij, chkimayij i koywal, are i chki'ana chkikoch'ij kib' chu'anik utz laj taq winaq che kib' xaq chelapan ru' i Dios.

⁹ Xaq kwaj yin chi i ixoqib', chkikojo ki'u' pacha kmajaw chke chi je re i Dios. Mek'achir chukojik chomiq taq k'ul; are chkikojo pacha usuk' i ch'uqb'al kij, are ti majb'al kiwach i winaq kki'ano. Xaq mki'an taq ch'am taj che i kiwi; mek'achir chuwiqik kib' ru' taq i an-o'oj, xaq ru' taq i chomiq ab'aj, xaq ru' taq i ki'u' chi lik paqalik.

¹⁰ Chek'achir chu'anik chom che kib' ru' wach taq i kki'ano. Ile lik are kmajaw chke ixoqib' chi je re i Dios.

¹¹ I ixoqib' lik chkikojo retalil wach i kk'ut chke, chekojon che i k'utunik.

¹² Yin kinya ti chke ixoqib' chi kek'utun pa molb'al ib'; xaq kinya ti chke we are ike keok'aw utzam chke i achiyab'.

¹³ Kinb'ij ile man are i nab'e x-anik are i ma Adán, te'uri xyijb'ax ati Eva.

¹⁴ Xaq are ti ma Adán xt'ortaj rumal Itzel, xa are i ati Eva; ire xuqel uri utzij i Dios.

¹⁵ Xwiri i ixoq kuriq ni utotajik rumal uk'itsaxik rak'al, xaq we lik o ukub'ib'al uk'ux che i Dios, we o uk'axnab'al uk'ux chke i winaq xaq we ch'am xaq we o uno'oj uk'ux chwach i Dios.