1 Samuel 5 - Wuj Pa K'ubultzij

I kaxa re utrat i Ajwal o pkitinimit aj Filistea

¹ I aj Filistea are xetiki chumajik b'i kaxa re utrat i Ajwal, xkesaj b'i chila pa Eben-ezer, xkik'am b'i pa Asdod.

² Xkikoj b'i chila prachoch i tiox Dagón, lik chuk'ulel i tiox le xkiya wi.

³ Are xsaqir chukab' ij, xe'ok b'i winaq aj Asdod prachoch i tiox Dagón, are uri xkiriq i tiox Dagón le chi jab'al b'i pulew chwach i lo'laj ukaxa i Ajwal, are uri xkiyako xkiya chik puk'ijib'al.

⁴ Xwiri, chukab' ij are xeupon chik i aj Asdod, xkiriq chik i kitiox chi jab'al b'i pulew chwach i lo'laj ukaxa i Ajwal. Ajnaq keb' u'ab' xaq ujolom tzaqnaq puwi i che' re uxe' uchija, xwi uch'akul nti xuk'ulmaj.

⁵ Rumali k'a are o wi wo'or, chi are ke'ok b'i ajsujul sipon re i tiox Dagón chila che i tinimit Asdod, kkitak'alb'ej ti che' re uxe' uchija.

⁶ Chrijil chik ile, i Ajwal xuya jun nim laj utojb'alil chke aj Asdod, lik xupetsaj jub'an sipoj che kich'akul konojel i winaq.

⁷ I winaq chi aj Asdod are xkilo wach ktijin uk'ulmaxik, xkib'ij: “I kaxa re utrat i Dios ke aj Israel kmajaw taj chi kkanaj chqaxol yoj, man i Dios le ktijin chuya'ik jun nim laj tojpen pqawi xaq puwi i qatiox Dagón”; xecha.

⁸ Are uri xkitaq utzijol ku' konojel kaj-atzil aj Filistea man kkimol kib' ku' xaq xkitz'onoj chke: —¿Wach kqa'an che i kaxa re ki-Dios aj Israel? I aj-atzil xkib'ij: —Chik'ama b'i pa tinimit Gat. Are uri aj Filistea xkik'am b'i chila.

⁹ Xwiri are kiya'om chik i kaxa pa Gat, i Ajwal xupetsaj jun nim laj xib'rikil pkiwi i winaq chila pa tinimit Gat le, lik xupetsaj jub'an sipoj che kich'akul konojel che nimaq che ch'utiq.

¹⁰ Are uri i aj Filistea xkik'am b'i lo'laj ukaxa i Dios chila pa Ecrón, xwiri i winaq aj Ecrón le xesik'in rumal kixib'rikil xkib'ij: “¡Xkik'am li kaxa re ki-Dios aj Israel qu' kamsab'al qe qonojel!” Xecha.

¹¹ Rumali konojel i winaq aj Ecrón lik xpe jun nim laj xib'rikil chke, man kkina ike kekam rumal i nim laj tojpen chi xuya li Dios pkiwi, rumali xkitaq kisik'ixik konojel i kaj-atzil ke aj Filistea xkib'ij chke: “Chik'ama b'i lo'laj ukaxa i ki-Dios aj Israel chila ipa xik'am wi loq, man keje ile kojukamsaj ti uri qonojel.”

¹² I kisik'inik i winaq re i tinimit kupon k'a chikaj rumal uk'axk'ol, man lik chaqchik sipoj che i kich'akul konojel i je kamnaq taj.