Biblia Todo Logo
Bìoball air-loidhne

- Sanasan -

1 Samuel 31 - Wuj Pa K'ubultzij


Ma Saúl xaq i je rak'al xekam pa ch'oj

1 I aj Filistea xki'an ch'oj ku' aj Israel, xwiri i aj Israel xe'anmajik xaq lik k'i xekam chke, chila puwi i jyub' Gilboa.

2 I aj Filistea xeterej b'i chrij ma Saúl xaq chkij i rak'al, xkikamsaj ma Jonatán, ma Abinadab xaq i ma Malquisúa.

3 Te'uri xeterej b'i chrij ma Saúl, are uri i ajk'aqol ch'ab' xetiki chumajik ru' kich'ab', rumali chi ma Saúl le lik xuxij rib' chke.

4 Rumali ma Saúl xub'ij che i kk'amaw b'i jalajuj taq uch'ich' re anb'al ch'oj: —Chawesaj li ach'ich' chi o uware k'ulala, chinakamsaj man keje ile kek'un ti i je itzel ti laj taq winaq le kinkikamsaj xaq kki'an ni ketz'b'al chwe. Xwiri i kk'amaw b'i jalajuj taq uch'ich' re anb'al ch'oj le xraj ti xukamsaj man lik kuxij rib'. Are uri ma Saúl xuk'am pan uch'ich' chi o uware k'ulala xuk'aq rib' puwi.

5 I kk'amaw b'i jalajuj taq uch'ich' ma Saúl re anb'al ch'oj are xrilo chi xkam ma Saúl are uri xaq xuk'aq rib' puwi uch'ich' ire xaq xkamik.

6 Keje kikamik ma Saúl ile che taq i ij le, xkam ire, xekam oxib' uk'ojol, xkam i ajtol re xaq xekam konojel uwinaq.

7 I aj Israel chi je jeqel ch'aqap che i ta'aj xaq prelb'al ij che i Jordán, are xkilo chi konojel aj Israel chi je yij che i ch'oj xekamik, xkam ma Saúl xaq xekam oxib' rak'al, are uri xko'taj kan kitinimit, xe'anmaj b'ik. I aj Filistea are xeupon chila xekanaj kan pa jeqelem che i tinimit le.

8 Che ukab' ij i aj Filistea, are xeupon chumolik ub'itaq ke i kamnaq, xekiriq ma Saúl junam ku' i je oxib' rak'al je jab'al b'i puwi i jyub' Gilboa.

9 Are uri xkik'atzij b'i ujolom che xaq xkik'am b'i uch'ich' chi xukamsaj rib' ru' xaq xekitaq b'i jub'an ajb'il tzij pa jalajuj taq tinimit ke aj Filistea man kekiya utzijol chke i winaq chila prachoch i ki-dios.

10 I jalajuj taq uch'ich' ma Saúl re anb'al ch'oj, xkiya chila prachoch i ki-dios chi Astarot ub'i, xaq xkitzayb'a uch'akul chwach xan chi re Bet-sán.

11 Are xketamaj i winaq aj pa tinimit Jabes, chi re i Galaad, wach xki'an i aj Filistea che ma Saúl,

12 xkijunamsaj kitzij konojel achiyab' chi lik ko kiwach chu'anik ch'oj, te'uri xe'e chila ipa o wi uch'akul ma Saúl, xeb'in jun a'ab', are xeupon chila ipa o wi uwach xan le chi re Bet-sán, xkiqajsaj li uch'akul ma Saúl xaq kich'akul i je oxib' uk'ojol, are uri xetzalij chub'i pa Jabes, chila xkiporoj wi.

13 Te'uri xkimuq uchajil i ch'akulaj chila pa Jabes chuxe' jun che'. Chrijil chik ile wuqub' ij xkitij ti kiwa xaq xkitu' ti kiya'.

© Biblia Achí de Cubulco, Derechos reservados de Sociedad Bíblica de Guatemala

Bible Society in Guatemala
Lean sinn:



Sanasan