1 Samuel 30 - Wuj Pa K'ubultzij

Ma David xeuch'ak aj Amalec

¹ Che urox ij ma David xaq i achiyab' chi je o ru' xeupon pa tinimit Siclag, xekiriqa chi aj Amalec kimajom chik i ulew Neguev, xaq ketijin chu'anik k'ax chke i winaq aj Siclag xaq ketijin chunak'ik a' che i tinimit.

² Tupu mijun xkikamsaj, xwiri xekik'am b'i konojel ixoqib' xaq ak'alab' ni'pa je o chila.

³ I ma David xaq konojel achiyab' chi je enaq ru', are xeupon pa tinimit Siclag xkilo chi ronojel is k'atnaq chik xaq je k'amtal b'i kixoqil xaq kak'al,

⁴ are uri konojel lik xesik'in che o'ej k'a xekos na.

⁵ Xaq xekik'am b'i keb' rixoqil ma David chi je are ati Ahinoam chi aj pa Jezreel xaq ati Abigail chi rixoqil kan etz ma Nabal chi aj Carmel.

⁶ Ma David lik xok il man i achiyab' chi je enaq ru' kkaj upuk'ik chab'aj, man konojel petnaq koywal rumal wach xkik'ulmaj i kak'al. Xwiri ma David xukub'a uk'ux che i Rajwal Dios.

⁷ Are uri ma David x-e ru' ma Abiatar, chi ajsujul sipon, chi uk'ojol ma Ahimelec, xub'ij che: —Cha'ana jun utzil chak'ama li i efod chwe. I ma Abiatar xuya i efod che ma David,

⁸ i ma David le xuk'am unojb'al che i Ajwal, xutz'onoj che: —¿Kin-e nawi chkitzukuxik ili'omab' le? ¿K'a keinmaja nawi? Are uri i Ajwal xula' uwach che: —Utz we katterej b'i chkij man k'a keamaja na xaq k'a kattiki ni chumajik chke ronojel ni'pa i xkik'am b'ik.

⁹ I ma David xumaj la b'i ub'e junam ku' i lajujwinaq jumo' (600) achiyab' chi je o ru', xeupon chi raqana chi Besor ub'i. Chila xekanaj wi.

¹⁰ I lajujwinaq (200) achiyab' chi lik je kosnaq chik xki'axuj ti chik i raqana. Xwi chik i jumo' (400) xki'axuj i raqana xaq k'a xeterej b'i chkij ili'omab'.

¹¹ Chila chwa ta'aj, xkiriq jun aj Egipto, xkik'am b'i chwach ma David, tupu xkitzuqu xaq xkiya ni uya' nab'e.

¹² Xkiya ch'aqap lejom higo che xaq keb' lejom uva chaqij. Ru' ile i achi aj Egipto xpe ucho'ab' man o chik oxib' ij xaq oxib' a'ab' che chi nti wa utijom xaq nti ya utu'um.

¹³ Are uri ma David xutz'onoj che: —¿Pachin taq awajaw? ¿Ipa katpe wi? Are uri i achi aj Egipto xub'ij che: —Yin in aj pa Egipto, in rajchak jun aj Amalec, xwiri o chik oxib' ij chi i wajaw xinro'taj man xinriq yob'il.

¹⁴ Xojupon chu'anik ela' chila pa wiqab' che ulew ke aj Creta, chila pa kulew aj Judá xaq aj Caleb. Xaq xqanak' a' che i tinimit Siclag.

¹⁵ Are uri ma David xub'ij che: —¿Kawaj nawi chi kinak'am b'i chila ipa je o wi ili'omab' le? I aj Egipto xub'ij che: —Utz, xwiri we lik kab'ij pub'i i Dios chi kinakamsaj taj xaq we kinajach ti che i wajaw, katink'am b'i uri.

¹⁶ Are uri xeuk'am b'i k'a chila ipa je o wi ili'omab'. Ike le kikichersam b'i kib', ketijin chwa'im, ketijin che i ab'arik man ketijin chu'anik i nima'ij rumal ronojel i ela' chi xeki'ana li pkulew aj Filistea xaq pkulew aj Judá.

¹⁷ Are uri ma David le x-e chkij xujeq u'anik ch'oj ku', xsaqirik k'a xqaj ij xtiki chke, laj konojel xeukamsaj, xwi xetotaj i jumo' (400) alab'om chi xe'anmaj b'i chrij kikamey.

¹⁸ Ma David xtiki chumajik ronojel ni'pa xkel-aj b'i aj Amalec xaq xtiki chumajik i keb' rixoqil chke.

¹⁹ Lik nti xramtaj che ronojel ni'pa xkel-aj te b'i ili'omab', tupu jun b'iroxik lik pich' lik k'a xetiki chumajik chke xaq xramtaj ti jun ak'al, xaq mitene jun nim, man i ma David le lik xtiki chik chumajik chke ronojel.

²⁰ I ma David xuk'am li konojel kichikop xaq konojel kichij; i uwinaq ma David chi xek'amaw b'i chikop kesik'in chub'ixkil: ¡Are je uch'akom ma David iri!

²¹ Are xupon ma David ku' i je lajujwinaq (200) achiyab' chi xekanaj kan ch'aqa ya Besor rumal kikosik, konojel i lajujwinaq achiyab' le xe'e chuk'ulaxik ma David xaq i winaq chi je enaq ru'. Are uri ma David xuya rutzil kiwach.

²² Xwiri jujun chke uwinaq ma David chi utz ti kik'ux, xe'ok chi ch'ojinik, xkib'ij: Konojel ni'pa xe'e ti qu' chu'anik ch'oj lik nti ke che ronojel ni'pa xqamaj li yoj. Xwi chkik'ama b'i kixoqil xaq i kak'al, te'uri che'oj.

²³ Xwiri ma David xub'ij: —Mi'an keje ile, wachalal, man ronojel ni'pa ile are i Ajwal uya'om chqe, xuto qak'aslemal xaq xeujach konojel ili'omab' pqa'ab'.

²⁴ Xwiri yix usuk' ti kib'ij, man rajwaxik chi pacha uk'iyal kya' che i jun chi xupon chu'anik ch'oj xaq keje uk'iyal ile kya' che i jun chi xkanaj kan chuchajixik ub'itaq qe.

²⁵ Che taq i ij le, xaq k'a are o wi wo'or, lik keje ile k-ani pa Israel.

²⁶ I ma David are xupon chila che i tinimit Siclag, xuk'am jub'i' che ronojel ni'pa xkimaj chke ajch'oj chkij, xutaq b'i chke kinimaqil aj Judá chi lik je utz ku', xaq xutaq b'i ub'ixkil i tziji: “Xintaq b'i jun ral isipon chi are jub'i' che i b'iroxik chi xinmaj chke i ajch'oj chrij i Ajwal.”

²⁷ Xaq xutaq b'i sipon chke ni'pa je o pa Betel, ni'pa je o pa Ramot chi o chila Neguev, ni'pa je o chila pa Jatir,

²⁸ ni'pa je o chila pa Aroer, ni'pa je o chila pa Sifmot, ni'pa je o chila pa Estemoa,

²⁹ ni'pa je o chila pa Racal, ni'pa je o chila pa jalajuj taq tinimit Jerameel, ni'pa je o chila pa jalajuj taq kitinimit aj Ceneo,

³⁰ ni'pa je o chila pa tinimit Horma, ni'pa je o chila pa Corasán, ni'pa je o chila pa Atac,

³¹ ni'pa je o chila pa Hebrón xaq ni'pa je o chila pa jalajuj taq k'ijib'al ipa xeb'in wi ma David junam ku' uwinaq.