1 Samuel 27 - Wuj Pa K'ubultzij

U'enam ma David pa kulew aj Filistea

¹ Xwiri, ma David xuch'ob'o: “I ma Saúl kinukamsaj ni ile chweq kab'ij, rumali utz we kin-e pkulew aj Filistea man keje ile ma Saúl kinutzukuj ti chik pkulew aj Israel. Xwi keje ile kwesaj ni wib' pu'ab'.”

² Keje uri ile chi ma David junam ku' lajujwinaq jumo' (600) achiyab' chi kachnimam b'ik, xkimaj b'i kib'e, xe'e ru' ma Aquis, chi ajawinel re i tinimit Gat, man kkiya kib' pu'ab', i ma Aquis le are uk'ojol ma Maoc.

³ Ma David xaq i achiyab' chi je o ru' xe'e pa jeqelem chila pa tinimit Gat, chila ru' ma Aquis. Chkijujunal achiyab' chi je enaq ru' ma David xe'e ku' i kalk'uwal, xaq ma David x-e ku' i keb' rixoqil, chi are ati Ahinoam chi aj pa tinimit Jezreel, xaq ati Abigail chi rixoqil te'eq i etz ma Nabal, chi aj pa tinimit Carmel.

⁴ Are xretamaj ma Saúl chi ma David x-anmaj b'ik, man x-e pa tinimit Gat, are uri xumayij uterb'exik.

⁵ Ma David xub'ij che ma Aquis: —We yet ka'an jun nim laj utzil chwe, chaya jun ink'ijib'al che jun tinimit chi o pa nim laj tinimit, man kmajaw taj chi awajchaki kk'iji taq awu' yet pa tinimit ipa at o wi pa ajawinel.

⁶ Lik che i ij le ma Aquis xuya i tinimit Siclag che ma David, rumali k'a are o wi wo'or chi i tinimit Siclag ukwenta i tinimit Judá.

⁷ Ma David xk'iji jun junab' ru' kajib' ik' chila pkulew aj Filistea.

⁸ I ma David junam ku' i achiyab' xe'e chumajik ub'itaq ke i winaq chke chi je jeqel pa jalajuj taq tinimiti: Gesur, Gezer xaq i tinimit Amalec, lik ujer je jeqel chila che i ulew le, chi kusuk'b'a b'i pa tinimit Shur k'a kupon che i tinimit Egipto.

⁹ Are keupon chila che i jalajuj taq tinimit le lik mijun achi xaq mijun ixoq kkik'asb'a kanoq. Xaq kkik'am b'i chij, b'akib', axna, kamey xaq kkik'am ne b'i k'ul. Chrijil chik ile ketzalij chub'i chila ipa o wi ma Aquis.

¹⁰ I ma Aquis xutz'onoj che: “¿Pachike taq tinimit xatupon wi wo'or chumajik li ub'i taq ke i winaq?” I ma David xub'ij che: “Xinupon chila pa tinimit chi o pa wiqab' che i tinimit Judá”, o moqxa pa “wiqab' che i tinimit Jerameel o moqxa pa wiqab' che ulew ke aj Ceneo.”

¹¹ Ma David mijun winaq kuk'asb'a kanoq che ixoqib' che achiyab' keukamsaj, lik konojel keukamsaj man keje ile nti jun k-e chulapik pa tinimit Gat wach ktijin chu'anik. Ronojel ni'pa i ij chi xuch'ij chila pkulew aj Filistea lik keje ile xu'ano.

¹² Ma Aquis lik xukub'a uk'ux che ma David man kuch'ob'o chi aj Israel lik ktitat kipam che ma David, rumali xub'ij: “Ire le lik utz chi arewi kin-an wajchak che.” Xcha.