1 Samuel 11 - Wuj Pa K'ubultzij

A Saúl xeuch'ak aj Amón

¹ Ma Nahas, chi ajawinel pa Amón, x-e pa tinimit Jabes chi o chila pa Galaad, are uri xeuyijb'a i achiyab' chi je yij che i ch'oj re anb'al ch'oj chrij i tinimit, xwiri i winaq aj chila pa tinimit Jabes le xkib'ij che: —Cha'ana jun trat qu' man keje ile kqajach ni qib' pa'ab'.

² Are uri ma Nahas, chi aj Amón, xub'ij chke: —Utzi' kin-an jun trat iwu' yix, xwiri we kiya chwe chi kwesaj li ib'a'wach wiqab'im chijujunal, man keje ile kinya ni kik'ix aj Israel.

³ Are uri i kinimaqil i tinimit Jabes xkib'ij che: —Chaya wuqub' ij chqe man tz'aqat kqataq utzijol chke konojel aj Israel, xwiri we mijun xk'un chqato'ik lik kqajach ni qib' uri pa'ab'.

⁴ I je ajb'il tzij xeupon pa Gabaa ipa jeqel wi a Saúl; are xkiya utzijol chke i winaq are uri lik konojel xe'o'ik.

⁵ Tz'aqat xk'un a Saúl pa taq es teren li chkij i ub'oyexab', are uri xutz'onoj: —¿Wach xkik'ulmaj i winaq? ¿B'uchak ke'o'ik? I winaq xkilap i tzij che chi xek'un achiyab' aj Jabes chub'ixkil.

⁶ Are xuta a Saúl ile, Utewal i Dios xqaj li puwi, are uri lik xpe jun nim laj roywal.

⁷ Are uri xeuk'am pan keb' b'oyexab' xu'an ch'aqa taq chke te'uri xutaq b'i uk'utik pa ronojel taq tinimit Israel, i ajb'il tzij keje iri kkib'ij chke i winaq: “Lik keje iri k-ani chke kib'oyexab' ni'pa kkiya ti kiwach ru' a Saúl xaq ru' ma Samuel.” Are uri xpe jun nim laj xib'rikil chke konojel i winaq rumali juntir xkiya kiwach ku'.

⁸ I a Saúl are xerajlaj uwinaq chila pa Bezec je o lajujmo' wuqlajujchiy jut'ub' (300,000) achiyab' chi je yij che i ch'oj aj Israel xaq jo'lajujmo' oxchiy (30,000) aj Judá.

⁹ Are uri xub'ij chke ajb'il tzij chi xek'unik: —Chib'ij chke i winaq aj pa tinimit Jabes re Galaad chi chweq pa'ij kojupon chkito'ik. Are uri i je ajb'il tzij xe'ek xaq xkilap chke aj Jabes, are xkita ike ile lik xekikotik.

¹⁰ Are uri xkib'ij che ma Nahas: —Chweq kqajach qib' pa'ab' man ka'an ni chqe pacha kumaj awach yet.

¹¹ Chukab' ij ma Saúl xumol kichi' achiyab' chi je yij che i ch'oj, xu'an oxib' tzob'aj chke, are k'amaja ksaqirik xe'ok b'i pkitinimit aj Amón, are uri xe'ok chkikamsaxik i winaq, i kamsanik le xuch'ij mer ij. I winaq chi xek'asi kanoq xkikichersaj b'i kib', mijun chke xkanaj taq kan ru' jun rachi'il.

¹² Are uri jujun winaq aj chila pa tinimit xkib'ij che ma Samuel: —¿Je pachin taq wa xkikoj taj chi a Saúl krajawin pqawi? Cheijacha i achiyab' le chqe man keqakamsaj.

¹³ Xwiri a Saúl xub'ij chke konojel i winaq: —Che i iji mijun kkamik man i Ajwal xeuto aj Israel che i ch'akanik.

¹⁴ I ma Samuel xub'ij chke konojel i winaq: —Jo pa tinimit Gilgal man kjeqan u'atik tzij chila.

¹⁵ Are uri konojel i winaq xe'e pa tinimit Gilgal, chila chwach i Ajwal xkiya kan ma Saúl pa ajawinel. Chrijil chik ile xkisujuj i sipon re riqb'al uxlanb'al k'uxij chwach i Ajwal; are uri a Saúl xaq konojel aj Israel lik xekikotik.