1 Reyes 7 - Wuj Pa K'ubultzij

Jub'an chik ja chi xu'an ma Salomón

¹ I ma Salomón oxlajuj junab' xuch'ij chuyakik i nim laj rachoch ire.

² Xaq xuyak i nim laj ja re i ajawinel chi “K'achelaj re i Líbano” ub'i. I ja le o lajuj juwinaq xik'ab' raqan, jo'lajuj xik'ab' uwach xaq b'elejeb' xik'ab' unajtil rij. I ja le kul puwi i kajib' cholaj raqan ja chi elsam che uche'lal chakalte', xki'eb'a et puwi i cholaj raqan ja le.

³ I et le, jo'ob' kawinaq ronojel, xki'an oxib' tzob'aj che chi xel jo'lajuj et pa taq tzob'ajil chi x-eb'ax puwi aqan. Puwi i et le xkikoj i tz'alam, chi lik re i che' chakalte'.

⁴ O oxib' cholaj wantana, yijb'am usuk' pa taq oxib' cholaj, chi lik kkitzub'ala kib' chkiwach.

⁵ Konojel uchija xaq i wantana is o kajib' uch'uk chi xaqjun uwach ru' i raqan, xaq kkitzub'ala kib' che oxib' cholaj.

⁶ Xaq xu'an jun tasaj chi xukoj aqan chupam chi jo'lajuj xik'ab' raqan xaq b'elejeb' xik'ab' uwach. Chwach i ja le xu'an jun chik ja chi xukoj aqan chupam xaq xukoj uwi.

⁷ Xaq xu'an jun upaja re atb'al tzij, man chila ku'at wi tzij pkiwi i winaq, xaq xuch'uq uwi ru' tz'alam chi elsam che chakalte', xumaj li puwi xeuk'isa k'a chuxe'.

⁸ Che i nim laj ja re i ajawinel ipa jeqel wi ma Salomón o jun chik uwaja chrij, che uwaja le xu'an jun chik upaja; laj xaqjun u'anik xu'an che ru' i re ire. Xaq i nim laj ja re i ajawinel chi xuyak che umi'al ma faraón, chi rixoqil, xaq laj xaqjun u'anik xu'an che ru' i re ire.

⁹ Ronojel i ja le, jeqannaq li k'a chuxe' k'isnaq k'a puwi, xaq jeqannaq li k'a chrij k'isnaq k'a che i nim laj uwaja, lik kojtal chomiq taq ab'aj che chi lik paqal rajil, ab'aj le je yijb'am, xaq k'atzim ru' k'atzb'al re chrij i kinimaqil, keje ile chupam xaq i chrij.

¹⁰ Xaq i ukub'ib'al i jalajuj taq ja, kojtal i ab'aj nimaq che chi lik paqal rajil. O jujun ab'aj chi o oxib' xik'ab' che i raqan xaq o jujun chi o keb' xik'ab' ru' juripaj ab'aj che i raqan.

¹¹ I ab'aj chi xkikoj puwi xaq are i paqal rajil, u'atik antalik keje pacha unimaqil kajwaxik, xaq xkikoj i che' che chi chakalte'.

¹² Che uwaja nim sutim rij ru' oxib' cholaj ab'aj, xaq xukoj jun cholaj et re chakalte'. Keje pacha u'onom uwaja chi o chupam i rachoch i Dios, xaq che i k'ijib'al re i okb'al re i ja.

Ma Salomón kuya uchak ma Hiram

¹³ I ajawinel ma Salomón xutaq uk'amik i ma Hiram chila pa tinimit Tiro.

¹⁴ I ma Hiram le ralab' jun ati malkan chi re utzob'ajil ma Neftalí, i uqajaw aj chila pa Tiro chi lik o uno'oj che i chak re i anch'ich'. I ma Hiram le lik b'iw laj winaq, lik reta'am u'ankil jalajuj taq chak ru' i anch'ich', rumali chi x-e ru' i ajawinel ma Salomón, xaq xu'an ronojel uchak che.

¹⁵ Ma Hiram xu'an keb' aqan anch'ich' re i ja, i aqan le o jo'ob' xik'ab' unajtil rij xaq oxib' xik'ab' o che unimal upam.

¹⁶ Xaq xu'an keb' ch'uqb'al uwi i aqan le ru' anch'ich'. Chkijujunal i ch'uqb'al le o jun xik'ab' ru' nik'aj che unajtil kij.

¹⁷ Xwi ta la ile, xaq xu'an keb' k'ark'ar ch'ich' chi pacha pach'um karena, re ch'uqb'al uwi i aqan, i k'ark'ar ch'ich' chi pacha pach'um karena, jujun re uwi i aqan.

¹⁸ Xaq xukoj keb' cholaj wonwaq chrij chwach i jujun k'ark'ar ch'ich' le, ch'uqb'al re i ch'uqb'al uwi i aqan. Keje ile xu'an che i keb' ch'uqb'al uwi i aqan.

¹⁹ I ch'uqb'al uwi i aqan chi o chija o jun xik'ab' ru' juripaj ab'aj che i raqan, xaq je keje ketzunik pacha i kotz'ij lirio.

²⁰ Chrij chwach li puwi i jujun ch'uqb'al uwi aqan, ipa o wi i mas nim uwach chi pacha jun ma wonwik ipa o wi i k'ark'ar ch'ich', lajujwinaq (200) wonwaq o che i keb' cholaj chi sutinnaq chrij.

²¹ I ma Hiram xeukoj aqan le prachoch i Dios. Are ya xeyataj i aqan pa kik'ijib'al; i aqan chi xkanaj pa wiqab'im xuya pub'i Jaquín, i jun chik aqan chi xkanaj pa moxim xuya pub'i Boaz.

²² I uwi i keb' aqan le keje u'anom pacha jun kotz'ij lirio. Keje rutzinik i chak ile re i keb' aqan le.

B'iroxik chi o uchak prachoch i Dios

²³ Te'uri ma Hiram xu'an jun nim laj pila re yab'al ya chi lik anch'ich'; ile sotsik xaq oxib' xik'ab' uwach, julajuj ripaj ab'aj unajtil rij, b'elejeb' xik'ab' o che upam i pila le.

²⁴ Chuxe' ronojel uchi' i pila le chi sutinnaq chrij, xu'an keb' rab'aj pacha taq uxaq che' chi o uwach, o lajuj echa' che i keb' ripaj ab'aj, pacha retz'b'alil chuchi' i pila.

²⁵ I pila le kub'am puwi kab'lajuj uk'exwach torib' chi je antal ru' anch'ich'. Oxib' torib' ketzun b'i pa moxab', oxib' ketzun b'i pa wiqab', oxib' ketzun b'i prelb'al ij xaq oxib' ketzun b'i puqajb'al ij. Konojel i torib' le kul i pila chel kij, rumali chi i kaqan chuxe' i pila o wi.

²⁶ Upimol uwach i pila o kajib' uwi ab'aj che; i uchi' lik'lik keje pacha yab'al kotz'ij lirio. Jo'lajujwinaq julajujmo' (4,700) kukub' ya kuch'ij i pila le.

²⁷ Xaq xu'an lajuj ukub'ib'al ru' anch'ich'; jujun xik'ab' ru' keb' ripaj ab'aj o che i unajtil raqan, xaq keje unimal uwach, jun xik'ab' o che unajtil rij.

²⁸ I ukub'ib'al le keje u'anik iri antal che: kojtal jub'an b'alul che chupam unimal uchi',

²⁹ puwi i b'alul le o kik'exwach koj, torib', xaq i querubín; pkiwi xaq chkixe' i kik'exwach i koj xaq i torib', o uk'exwach i kotz'ij chi pacha koron.

³⁰ Ronojel i kub'ib'al le is o kajkaj sotsaq che, re ub'inb'al chi lik anch'ich', xaq i b'alul chi chapawnaq i sotsaq, lik anch'ich'. I kajib' uch'uk i kub'ib'al le chuxe' i pila, o jub'an ukowib'al chi lik anch'ich' xaq o uk'exwach kotz'ij pacha koron pa taq utzal.

³¹ I uchi' i pila kojtal jun koral chrij chi ik'awnaq an keb' ripaj ab'aj puwi uchi' i pila. I uchi' i pila le sotsik, i aqan chi kul i pila le puwi, oxib' ripaj ab'aj o che unajtil rij. Xaq chuchi' i pila le antal jalajuj taq k'exwachij chi yatal chupam i koral, xwiri uchi' i kajib' utzal le, sotsaq taj.

³² I kajib' sotsaq chi ksururik o chuxe' i b'alul, chi chapawnaq i sotsaq le, je nak'al che i ukub'ib'al. Unajtil rij i jujun sotsaq, oxib' ripaj ab'aj o che.

³³ I sotsaq le je keje pacha i sotsaq re kib'inb'al i ch'ich'. I b'alul, ch'ich' chi ukub'ib'al i sotsaq, jisilaq ch'ich' chi kyaw ucho'ab' i ukub'ib'al i sotsik, xaq i chapb'al ke i sotsaq, ronojel is anch'ich'.

³⁴ I kajib' ukowib'al chi o pa taq kajib' uch'uk i jujun kub'ib'al, lik uchapom rib' ru' i kub'ib'al le.

³⁵ Chuchi' an i kub'ib'al, xkisutij jun retz'b'alil chi o juripaj ab'aj che unajtil rij; te'uri puwi i kub'ib'al le o tan chik retz'b'alil xaq i b'alul, ronojel ile lik uchapom rib' ru' i ukub'ib'al.

³⁶ Ma Hiram xu'an kik'exwach i querubín, xaq uk'exwach i koj xaq i palma puwi i k'ijib'al ipa o wi ukowib'al, che i k'ijib'al re chkijujunal. Xu'an uk'exwach i kotz'ij koron, te'uri xukoj che ronojel uchi'.

³⁷ Keje u'anik ile xu'an che i lajuj kub'ib'al, konojel is xaqjun u'anik xaq ktzunik, xaq lik xaqjun unimal.

³⁸ Xaq xu'an lajuj k'olb'al ya che i anch'ich'. Jujun k'olb'al ya o jun xik'ab' ru' jun ripaj ab'aj che, xaq kajwinaq (80) kukub' ya kuch'ijo; jujun pila xya' puwi i jujun lajuj kub'ib'al.

³⁹ Jo'ob' kub'ib'al o pa wiqab'im che i rachoch i Dios xaq jo'ob' o pa moxim. Xaq i nim laj pila le xya' pa wiqab'im che i rachoch i Dios, chuxol i relb'al ij ru' wiqab'.

⁴⁰ Ma Hiram xaq xu'an i b'oj, lochb'al xaq nimaq taq laq. Keje uri ile chi ma Hiram xutzin ru' ronojel i chak chi xya' chuqul rumal ma Salomón re rachoch i Ajwal,

⁴¹ ronojel i chak chi x-anik are iri: Keb' aqan re uchija xaq ch'uqb'al uwi aqan chi sotsaq, keb' k'ark'ar ch'ich' ch'uqb'al re uwi i aqan,

⁴² I jumo' (400) wonwaq re i keb' k'ark'ar ch'ich' ch'uqb'al re i ch'uqb'al uwi i aqan, keb' cholaj wonwaq o che i jujun k'ark'ar ch'ich' chi kch'uquw rij i keb' ch'uqb'al uwi i aqan,

⁴³ lajuj kub'ib'al xaq lajuj pila, chi k-e puwi i kub'ib'al le;

⁴⁴ nim laj pila re i ya xaq i kab'lajuj torib' chi keqam i nim laj pila le;

⁴⁵ xwi ta la ile, xaq xu'an b'oj, lochb'al xaq nimaq taq laq. Ni'pa i yab'al le chi xu'an ma Hiram, man xtaq che rumal ma Salomón re i rachoch i Dios, ronojel is x-an che i anch'ich' chi lik xu'an ch'uch'uj che.

⁴⁶ I ajawinel xutaq u'anik chupam molte re seneb', chila che ulew Jordán chuxol i tinimit Sucot xaq i tinimit Saretán.

⁴⁷ Lik k'i i jalajuj taq chapb'al olik chi lik ch'am xaq lik re anch'ich', rumali ma Salomón xutaq ti upajik man lik k'i olik.

⁴⁸ Ma Salomón xaq xutaq u'anik ronojel ni'pa i jalajuj taq yab'al chi kajwax chila prachoch i Dios: I sujb'al sipon chi an-o'oj, i mexa an-o'oj chi kya' i wa re trigo puwi chi kjach chwach i Ajwal,

⁴⁹ i tzuk'b'al chi lik an-o'oj chi o chwach i lik Lo'laj k'ijib'al re i Dios, jo'ob' o pa wiqab'im xaq jo'ob' o pa moxim, o uk'exwach kotz'ij chwach, i wuqub' u'ab' i tzuk'b'al xaq i chapb'al lik an-o'oj,

⁵⁰ i tu'b'al ya, k'upb'al utzam chij re i tzunb'al, i nimaq taq lochb'al, i nimaq taq laq xaq i sib'al; ronojel ni'pa ile lik an-o'oj. Ronojel i ch'ich' chapb'al re uchija re i okb'al che i lik Lo'laj k'ijib'al re i Dios, xaq che i okb'al che i rachoch i Dios, ronojel is antal che i an-o'oj.

⁵¹ Are xutzin ronojel i chak chi xutaq u'anik ma Salomón prachoch i Dios, are uri xuk'am b'i jalajuj taq yab'al chi an-o'oj xaq i saq-o'oj chi uya'om pu'ab' i Ajwal etz uqajaw, chi mam David, xuya chuxol ub'itaq re i lo'laj rachoch i Dios.