1 Reyes 5 - Wuj Pa K'ubultzij

Utrat ma Salomón ru' ma Hiram chi ajawinel re i tinimit Tiro

¹ Are xuta ma Hiram, chi ajawinel re i tinimit Tiro, chi xkanaj kan ma Salomón pa ajawinel puk'exel ma David, chi uqajaw, are uri xeutaq b'i jub'an uwinaq puk'exel ire, man ma Hiram le lik ramiy ma David.

² Are uri ma Salomón xutaq b'i ub'ixkil che i ma Hiram:

³ “Yet lik aweta'am chi inqajaw mam David xtiki ti chuyakik jun rachoch i Rajwal Dios, rumal ronojel i jalajuj taq ch'oj chi xpe chrij; k'a xejach ni ajch'oj chrij pu'ab' rumal i Ajwal.

⁴ Xwiri wo'or i Ajwal chi in-Dios, uya'om jun nim laj uxlanem pqak'ux chwach ronojel i jyub' ta'aj, man lik nti ajch'oj chqij, xaq nti yob'il.

⁵ Rumali inch'ob'om chi kin-an jun ja kojb'al u'ij i Wajwal in-Dios. Chrij pacha i sujunik chi xu'an Ire che ma David, chi inqajaw, man xub'ij chi are kuya kan uk'ojol pa ajawinel, are ni ire uri k-anaw i ja re kojb'al u'ij i Dios.

⁶ Chaya uri i taqanik chi chkik'atzij i che' chakalte' chi o chila che i jyub' Líbano. I wajchak yin kechakun ni ku' awajchak yet, lik kintoj ni kajil chrij ni'pa i kawaj yet ketojik. Man yet lik aweta'am chi mijun chqe yoj ktiki chuk'atzixik i che' pacha uk'atzixik kki'an i aj Sidón.”

⁷ I ma Iram are xuta wach xub'ij ma Salomón, lik xpe jun nim laj kikotemal che, rumali xub'ij: “Choksax ni u'ij i Dios man xuya jun uk'ojol ma David chi lik o uno'oj re ku'at ni tzij puwi i nim laj tinimit le.”

⁸ Are uri ma Hiram le xutaq b'i ub'ixkil i tziji che ma Salomón: “Ya xb'ix i tzij chwe chi xataq li ub'ixkil, kinya ni ronojel i che' chakalte' chawe xaq i chaj ni'pa i kawaj.

⁹ I wajchak yin kekiqajsaj na li chwi jyub' Líbano k'a chuchi' i mar; chila kkik'am chub'i puwi i ya k'a chila ipa kab'ij wi yet kya' wi. Chila kkitor wi kanoq chawe, lik yet chik uri kak'am b'i i che' le. Xwiri lik chaqul yet kkanaj wi ronojel i tzuqunik chi rajwaxik pa nim laj wachoch yin.”

¹⁰ Are uri ma Hiram xuya ronojel i che' chakalte' xaq ronojel i che' chaj, che ma Salomón chrij ni'pa rajwaxik che.

¹¹ I ma Salomón xuya ronojel che ma Hiram ni'pa i rajwaxik re ktijaw pa nim laj rachoch, jo'winaq kajmo' wajxaqchiy (65,700) tintal trigo, xaq lajuj b'elejwinaq (190) eqb'ala ya re aceite re oliva. I ma Salomón junab' junab' kuya ile che ma Hiram.

¹² Keje uri ile chi Ajwal xuya uno'oj ma Salomón chrij pacha usujum che. Xwi ta la ile, i ma Hiram xaq ma Salomón xki'an jun trat chkiwach xaq lik nti ch'oj xki'ano.

¹³ Are uri ma Salomón xuya jun taqanik chke konojel aj Israel chi o uchak kki'an i chak, xemoltaj jo'lajujmo' oxchiy (30,000) achiyab' chu'anik i chak le.

¹⁴ Ike le xetaq b'i chwi jyub' Líbano pa taq tzob'ajil chi o jo'mo' juchiy (10,000) chke, jujun ik' ke'e pa chak chwi jyub' le xaq kakab' ik' kolki'ana chikachoch man oxib' tzob'aj x-ani chke i jo'lajujmo' oxchiy (30,000) achiyab' le. I aj-ok'al utzam i chak are ma Adoniram.

¹⁵ Xwi ta la ile, i ma Salomón xaq je o jo'lajujmo' wajxaqchiy (70,000) achiyab' ru' chi je aj-eqan xaq lajujchiy (80,000) achiyab' je ajpaxil ab'aj chwi taq jyub'.

¹⁶ Je ajlam ti uri i jo'winaq wajxaqmo' (3, 300) ajtaqanel ke konojel ajchakib', chi o chkiqul rok'axik utzam i chak.

¹⁷ I ajawinel xutaq relsaxik nim taq ab'aj, xaq ko laj taq ab'aj re ukub'ib'al i rachoch i Dios, xaq i ab'aj chi yijb'am uwach.

¹⁸ I je aj-anol ja re ma Salomón, xaq aj-anol ja re ma Iram xaq i jub'an chik winaq aj pa tinimit Gebal, xekiyijb'a i che' xaq xekiyijb'a i ab'aj re i rachoch i Dios.