1 Reyes 4 - Wuj Pa K'ubultzij

Rajawinik ma Salomón

¹ I ma Salomón xk'iji pa ajawinel pkiwi konojel aj Israel.

² I aj-atol tzij chi xeuya pa taq atzil, je are iri: Ma Azarías, chi uk'ojol ma Sadoc, chi ajsujul sipon.

³ Ma Elihoref xaq ma Ahías, chi je uk'ojol ma Sisa, ike le je ajtz'ib'; ma Josafat, chi uk'ojol ma Ahilud, ajtz'ib' re i ajawinel.

⁴ Ma Benaía, chi uk'ojol ma Joiada, are ire aj-atzil chke achiyab' chi je yij che i ch'oj; ma Sadoc xaq ma Abiatar, je are ajsujul sipon;

⁵ Ma Azarías, chi uk'ojol ma Natán, are kok'aw utzam chke aj-atzil; ma Zabud, chi uk'ojol ma Natán, chi ajsujul sipon, are ajya'ol uno'oj i ajawinel puwach wi;

⁶ ma Ahisar are aj-atzil pa nim laj rachoch i ajawinel; ma Adoniram, chi uk'ojol ma Abda, are aj-atzil che i chak chi lik rajwaxik k-anik.

⁷ Ma Salomón xeukoj kab'lajuj ajtaqanel pkiwi konojel aj Israel; i kichak ike le are utzukuxik ronojel ni'pa i rajwaxik che i ajawinel xaq chke i ralk'uwal, chkijujunal jun ik' taq ke che jun junab' chi kkiya che i ajawinel ni'pa i rajwaxik.

⁸ Kib'i i kab'lajuj aj-atzil le, are iri: Ma Ben-hur are taqanel chwi taq jyub' chke utzob'ajil ma Efraín;

⁹ Ma Ben-decar are ajtaqanel puwi i tinimit Macaz, puwi i tinimit Saalbim, puwi i tinimit Bet-semes, puwi i tinimit Elón xaq puwi i tinimit Bet-hanán;

¹⁰ ma Ben-hesed are ajtaqanel puwi i tinimit Arubot, puwi i tinimit Soco xaq puwi ronojel i ulew Hefer;

¹¹ ma Ben-abinadab are ajtaqanel puwi i tinimit Dor; ub'i i rixoqil ati Tafat, chi umi'al ma Salomón;

¹² ma Baana, chi uk'ojol ma Ahilud, are ajtaqanel puwi tinimit Taanac, puwi i tinimit Meguido xaq puwi ronojel ulew Bet-seán chi o chuk'ulel i tinimit Saretán, chi o rekem i tinimit Jezreel, kjeqan b'i che i tinimit Bet-seán k'a chila che i tinimit Abel-mehola, lik k'a jela che i tinimit Jocmeam;

¹³ ma Ben-geber chi are ajtaqanel puwi i tinimit Ramot re i tinimit Galaad, chi xaq o pkiwi i jub'an chik komon aj Galaad; ile je ukomon ma Jair, chi uk'ojol ma Manasés; xaq o puwi i ulew Argob chi o chila pa Basán, chila o oxwinaq (60) nimaq tinimit chi sutim rij che i tapial chi nim uwach xaq o lawe anch'ich' che i okb'al;

¹⁴ ma Ahinadab, chi uk'ojol ma Iddo, are ajtaqanel pa tinimit Mahanaim;

¹⁵ ma Ahimaas chi xk'uli ru' al Basemat, chi umi'al ma Salomón, are ajtaqanel puwi i ulew chi ke utzob'ajil ma Neftalí;

¹⁶ Ma Baana, chi uk'ojol ma Husai, are ajtaqanel puwi ulew chi ke utzob'ajil ma Aser xaq puwi i tinimit Alot;

¹⁷ ma Josafat, chi uk'ojol ma Parúa, are ajtaqanel puwi ulew ke utzob'ajil ma Isacar;

¹⁸ i ma Simei, chi uk'ojol ma Ela, are ajtaqanel puwi ulew chi ke utzob'ajil ma Benjamín;

¹⁹ ma Geber, chi uk'ojol ma Uri, are ajtaqanel puwi ulew chi ke utzob'ajil ma Gad, xaq ajtaqanel puwi utinimit ma Sehón chi ajawinel ke aj Hamor, xaq puwi i ulew chi re ma Og chi ajawinel puwi i tinimit Basán. Xaq o jun aj-atzil puwi ronojel i jalajuj taq tinimit Israel.

Uno'oj i ma Salomón xaq i relik chisaq

²⁰ I aj Judá xaq i aj Israel lik je k'i pacha i seneb' chi o chuchi' i mar. Konojel lik kekikotik man lik o wach kkitijo xaq i kkitu'u.

²¹ Ma Salomón lik nim u'ij chkiwach konojel xaq lik are ire ajawinel pkiwi konojel i jalajuj taq tinimit chi je o chila che i raqana Éufrates k'a kupon che kulew aj Filistea, xaq kupon k'a chuchi' kulew i aj Egipto. Ike le lik xek'iji pu'ab' ma Salomón xaq xkitoj alkawal che tz'aqat k'a k'aslik.

²² Ronojel ni'pa i rajwaxik che ma Salomón ij ij, are oxwinaq (60) tintal rutzil jok'om trigo, waqwinaq (120) tintal jok'om trigo,

²³ lajuj torib' chi lik je ti'ojib', juwinaq torib' chi lik xwi es kkitijo, jo'winaq (100) chij, je ajlam ti uri i kej, xaq pacha i ral taq kej, xaq i tz'ikin chi lik je ti'ojib'.

²⁴ Man ma Salomón krajawin puwi ronojel ulew chi o puqajb'al ij chila pa Éufrates, kjeqan b'i che i tinimit Tifsa, kupon k'a che i tinimit Gaza, xaq o pkiwi konojel i ajawinelab' re i k'ijib'al le. Ma Salomón lik nti ch'oj xu'an ku' konojel i winaq chi je o chila.

²⁵ Ronojel i junab' chi xk'iji ma Salomón pa ajawinel, i winaq aj Judá xaq aj Israel, kjeqan b'i che i tinimit Dan xeupon k'a che i tinimit Beerseba, lik utz xek'iji'ik, lik xekikotik, chkijujunal xkiyijb'a i tikb'al kitikon, xkitik ki-uva xaq ki-higo.

²⁶ Xwi ta la ile, i ma Salomón je o lajujmo' (4,000) k'ijib'al ke i kaway xaq ch'ich' re anb'al ch'oj ru', xaq lajujmo' juchiy (12,000) achiyab' chi je yij che i ch'oj je ajrij taq kaway.

²⁷ Konojel i ajtaqon o chkiqul uya'ik uwa i ajawinel xaq konojel i rachi'il chi je o ru' chi mexa. Ile jujun ik' ke chkijujunal chrij pachike ik' yatal chkiqul.

²⁸ Xaq o chkiqul uk'amik li cebada xaq i k'im chi kkitij i kaway, xaq i kkitij i jub'an chik kaway chi je aj-eqan. Kkik'am b'i ile chila ipa o wi i ajawinel are kuriq i ik' chi o chkiqul kki'an i chak chkijujunal.

²⁹ I Dios lik xuya uno'oj ma Salomón, ub'iwil xaq jun nim laj utayik ub'e chi keje pacha uk'iyal i seneb' chi o chi taq mar.

³⁰ I uno'oj ma Salomón le lik xik'aw chwach kino'oj aj Egipto xaq chwach i kino'oj i winaq chi je o chila pusuk' i relb'al ij.

³¹ Nti chik jun achi chi lik o uno'oj chwach ire le, lik o uno'oj chwach ma Etán, chi umuq uxikin kan ma Zera, xaq lik o uno'oj chwach ma Hemán, chwach ma Calcol xaq chwach ma Darda, chi je uk'ojol ma Mahol. I ma Salomón lik xetamax ub'iwil kumal konojel i winaq pa jalajuj nimaq taq tinimit chrij chwach.

³² Ma Salomón xuyijb'a lajujwinaq wuqmo' (3,000) pixb'anik tzij xaq jo'ob' lajujwinaq kamo' (1,005) chomiq taq b'ix.

³³ Ire xch'aw chrij i jalajuj taq che' xaq chrij i jalajuj taq es; xujeq li ru' i che' chakalte' chi kk'iy li pa k'achelaj Líbano, xuk'isa k'a ru' i es chi kk'iy li chwach taq xan, xaq xch'aw chkij i jalajuj taq chikop, jalajuj taq tz'ikin, jalajuj taq chikop chi kejukmay chwach taq ulew, xaq chkij i jalajuj taq kar.

³⁴ Konojel i nimaq taq tinimit re uwach i jyub' ta'aj xaq i ajawinelab', chi lik kitom ub'iwil ma Salomón, xek'un chutayik utzij.