1 Reyes 21 - Wuj Pa K'ubultzij

Ma Acab xaq i tikb'al uva re ma Nabot

¹ Are xik'aw keb' oxib' junab', o jun achi aj Jezreel, chi ma Nabot ub'i, o jub'an uva utikom chila pa tinimit, chutzal i nim laj rachoch i ajawinel ma Acab, chi ajawinel re i tinimit Samaria.

² Xuk'ulmaj jun ij chi ma Acab xub'ij che ma Nabot: —Chaya i atikb'al uva chwe man kwaj kintik ichaj chwach, man lik xa chutzal i nim laj wachoch o wi. Puk'exel i awulew le kinya chik jun awulew re katik wi a-uva lik mas utz; we kawaj, kinya mer chawe re tojb'al re.

³ Xwiri ma Nabot xub'ij che ma Acab: —Muya i Dios chawe we k-antajik pacha arayijb'al, man i ulew le kuxtab'al kan ke i inqajaw inchuch.

⁴ Are uri ma Acab kb'isonik xaq petnaq roywal, x-e chi rachoch rumal ile chi xb'ix che rumal ma Nabot, chi kya' ti ulew che, man i ulew le kuxtab'al kan ke uqajaw uchuch. Are xupon chi rachoch, x-e pa kotz'olem chwi uch'at, xxoti b'i xe xan, xaq xraj ti wa'im.

⁵ Are uri ati Jezabel, chi rixoqil, xtejeb' pan ru', xub'ij che: —¿B'uchak katb'isonik xaq kawaj ti utijawik awa?

⁶ I ma Acab xub'ij che i rixoqil: —Xinb'ij che ma Nabot, chi aj Jezreel, chi kuk'ayij rulew chwe o we ntaj kinya jun chik ulew puk'exel, man keje ile kutik u-uva chwach; xwiri ire xub'ij chwe chi lik kuya taj.

⁷ Are uri i rixoqil, chi ati Jezabel, xub'ij che: —¡Yet at ajawinel puwi Israel! Jat, chatija awa, matb'ison chik, man yin kinya ni utikonb'al uva i ma Nabot le chawe.

⁸ Are uri i ati Jezabel juntir xutz'ib'aj jalajuj taq wuj pub'i ma Acab xaq xukoj b'i uretal i ajawinel che; te'uri xutaq b'i chke i je uwi ujolom, xaq chke i je aj-atzil chi je o pa tinimit ipa o wi ma Nabot.

⁹ I jalajuj taq wuj chi xutaq b'i ati Jezabel, keje iri kub'ij: “Chiya utzijol chke i winaq, chi rajwaxik kimayij iwa'im, xaq kikub'a ma Nabot chkiwach i winaq re i tinimit.

¹⁰ Te'uri chikub'a chwach ma Nabot le, keb' ajtol uwi chi kkib'ij ti saq laj tzij, xaq lik chkib'ij ni i utz taj chrij i ma Nabot le; lik chkib'ij chi k'ax ch'awnaq chrij i Dios xaq chrij i ajawinel. Te'uri chiwesaj b'ik, su' chikamsaj che ab'aj.”

¹¹ I achiyab' re utinimit ma Nabot junam ku' i je uwi ujolom i tinimit xaq i je aj-atzil, xki'ano chrij pacha xutz'ib'aj b'i ati Jezabel chupam i jalajuj taq wuj chi xutaq b'i chke.

¹² Xkib'ij chke konojel i winaq chi rajwaxik kkimayij wa'im, xaq xkikub'a ma Nabot chkiwach konojel i winaq re i tinimit.

¹³ Juntir xeupon keb' ajtol uwi chi kkib'ij ti saq laj tzij, xkisaqij chke konojel i winaq chi ma Nabot k'ax ch'awnaq chrij i Dios xaq chrij i ajawinel. Are uri xkesaj b'i pa tinimit xkikamsaj che ab'aj.

¹⁴ Te'uri xkitaq ub'ixkil che ati Jezabel, chi xkamsax ma Nabot che ab'aj.

¹⁵ Are xretamaj ati Jezabel, xub'ij che ma Acab: —Jat chak'ama i ulew chi utikonb'al u-uva ma Nabot aj Jezreel chi xraj ti uk'ayixik chawe; man ma Nabot le k'as ti chik, ire kamnaq chik.

¹⁶ I ma Acab are xretamaj chi kamnaq chik ma Nabot, x-e chila ipa o wi ulew le xaq xu'an re che.

¹⁷ Are uri i Ajwal Dios xlapan ru' ma Elías, chi aj Tisbe, xub'ij che:

¹⁸ “Jat chrilik ma Acab chi ajawinel ke aj Israel chi jeqel pa tinimit Samaria. Wo'or o chila pa tikb'al uva prulew ma Nabot man x-e chu'anik re che.

¹⁹ Are katuponik kab'ij che: Keje iri kub'ij i Ajwal: Yet chi xakamsaj ma Nabot xaq xak'am ni'pa re ire, rumali chi chila ipa xkiri' wi i tz'i ukik'el ire, xaq lik che i k'ijib'al le kkiri' wi chik akik'el yet.”

²⁰ Are uri ma Acab xub'ij che ma Elías: —Yet chi at ajch'oj chwij, xinariqo ipa in o wi. Ma Elías xub'ij: —Qatzij lik xatinriqo; man lik xwi i utz taj ka'an chwach i Ajwal Dios.

²¹ Rumali i Ajwal xub'ij: “Kintaq b'i jun nim laj tojpen pawi, kinchup ni kiwach konojel amuq axikin, konojel awalk'uwal alab'om chi je o pa tinimit Israel kinchup kiwach.

²² Xwi ta la ile, kin-an ni chke awalk'uwal pacha xin-an chke i ralk'uwal ma Jeroboam chi uk'ojol ma Nabat, xaq i ralk'uwal ma Baasa chi uk'ojol ma Ahías, man ike le xkipetsaj woywal man xekitzaqsaj aj Israel chupam kimak.”

²³ Xaq chrij ati Jezabel keje iri ub'im i Ajwal: “I tz'i kkitij nu b'i ati Jezabel chila che i jyub' Jezreel.”

²⁴ Xapachin chke i awachalal yet chi kkam pa tinimit, ktijaw nu b'i kumal i tz'i, xaq pachin kkam pa taq es ktijaw nu b'i kumal i k'uch.

²⁵ Lik nti jun chik pacha ma Acab chi xtaq rumal rixoqil ati Jezabel chu'anik lik xwi i utz taj chwach i Ajwal Dios.

²⁶ I utz taj chi xu'ano are iri: Xu'an jun nim laj mak atzalal are xukoj ki'ij i jalajuj taq tiox chi xaril je antalik, pacha xki'an konojel aj Hamor chi i Ajwal xeresaj b'i chkiwach i aj Israel.

²⁷ I ma Acab are xuta ronojel ni'pa xb'ix che, xuraqch'ij u'u', xukoj u'u' as xaq xumayij uwa'im. Xaq ru' u'u' as le kwar wi xaq lik kb'isonik.

²⁸ Are uri i Ajwal xub'ij che ma Elías:

²⁹ “¿Awilom chik chi ma Acab lik xuqajsaj u'ij chinwach? Rumal uqajsaxik u'ij le chinwach, wo'or nti jun utz taj kik'ulmaj i ralk'uwal tz'aqat k'a k'as ire; xwiri kinya ni utojb'alil chke i ralk'uwal are kkanaj uk'ojol puk'exel.”