1 Reyes 16 - Wuj Pa K'ubultzij

¹ Are uri i Ajwal xub'ij che ma Jehú, chi uk'ojol ma Hanani, chi k-e chub'ixkil i tziji chrij ma Baasa:

² “Yin xatwesaj li chupam uk'aj ulew, man kat-ajawin ni puwi intinimit Israel, xwiri yet xa'an i mak atzalal pacha xu'an ma Jeroboam, man xaq xa'an chke konojel i winaq aj Israel chi xemakunik. Lik xapetsaj woywal ru' amak chi xa'ano le.

³ Rumali yet, ma Baasa, lik kinchup awach xaq kinchup ni kiwach konojel awalk'uwal; kin-an chke pacha xin-an chke konojel i ralk'uwal ma Jeroboam, chi uk'ojol ma Nabat.

⁴ Xapachin chke i awachalal chi kekam pa tinimit, ketijaw ni kumal i tz'i, xaq konojel ni'pa kekam pa taq es, ketijaw ni kumal i k'uch.”

⁵ I jub'an chik anoj re uk'aslemal ma Nadab xaq ronojel ni'pa xu'ano, tz'ib'tal chupam i wuj crónicas ke i ajawinelab' aj Israel.

⁶ Are xkam ma Baasa, xkimuq chila pa tinimit Tirsa, puk'exel xkanaj kan uk'ojol chi ma Ela pa ajawinel.

⁷ I Ajwal xutaq b'i ma Jehú chi profeta, chi uk'ojol ma Hanani, chub'ixkil che ma Baasa xaq chke i ralk'uwal chi xek'oqox rumal i Ajwal, man ronojel ni'pa xu'ano lik xumaj ti uwach i Ajwal. Ma Baasa lik xupetsaj roywal i Ajwal man ni'pa xu'ano lik keje pacha i mak atzalal chi xu'an ma Jeroboam junam ku' i ralk'uwal, chi xchup kiwach.

Rajawinik ma Ela xaq ma Zimri pa tinimit Israel

⁸ Che i waqib' juwinaq (26) junab' rajawinik ma Asa pa tinimit Judá, ma Ela, chi uk'ojol ma Baasa, xujeq ajawinik pkiwi konojel aj Israel chila pa tinimit Tirsa; keb' junab' xuch'ij pa ajawinel.

⁹ Xwiri ma Zimri, chi aj-atzil puwi nik'aj chke i ch'ich' re anb'al ch'oj, xuwalijsaj jun ch'oj chrij ma Ela. Xuk'ulmaj jun ij, chi ma Ela le xu'an jun nim laj ab'arik chila pa tinimit Tirsa, prachoch i raj-atzil chi rachoch i ajawinel chi ma Arsa ub'i.

¹⁰ Juntir xupon ma Zimri xaq xukamsaj, man kkanaj kan ire puk'exel pa ajawinel pkiwi aj Israel. Iri xuk'ulmaj che i wuqub' juwinaq (27) junab' che rajawinik ma Asa pa tinimit Judá.

¹¹ Are lik k'ate xkanaj ma Zimri pa kub'ib'al chi o u'ij, xeukamsaj konojel i ralk'uwal ma Baasa, lik mijun ala xuk'asb'a kanoq, mitene i je rak'al, rachalal, ramiy, man keje ile mijun ku'an uk'exel i kamsanik le che ire, pacha xu'an ire ma Zimri.

¹² Keje uri ile chi ma Zimri xuchup kiwach konojel i ralk'uwal ma Baasa, x-antajik chrij pacha xub'ij i Ajwal chi kuk'ulmaj ni ma Baasa chi xutzijoj ma Jehú chi profeta.

¹³ Keje utojik umak ma Baasa ile xu'ano xaq i rak'al chi ma Ela, rumal i mak atzalal chi xki'ano. Xaq rumal xekitzaqsaj aj Israel chupam kimak. I Dios ke aj Israel lik xpe roywal chke, man xaq xkikoj ki'ij i jalajuj taq tiox chi xaril je antalik.

¹⁴ I jub'an chik anoj re uk'aslemal ma Ela xaq i jalajuj taq anik chi xu'ano, tz'ib'tal chupam i wuj crónicas ke i ajawinelab' aj Israel.

¹⁵ Che i wuqub' juwinaq (27) junab' re rajawinik ma Asa pa tinimit Judá, i achiyab' aj Israel chi je yij che i ch'oj je uxlannaq man kkiyijb'a kib' chu'anik ch'oj chkij aj Filistea chi je o pa tinimit Gibetón, ma Zimri xujeq ajawinik pa tinimit Tirsa, xwiri xa wuqub' ij xuch'ij pa ajawinel,

¹⁶ man che i ij le are je uxlannaq i achiyab' chi je yij che i ch'oj xketamaj chi ma Zimri xwalij chu'anik ch'oj chrij i ajawinel chi xaq lik xukamsaj, rumali chi konojel i achiyab' chi je yij che i ch'oj le, xkiya kan ma Omri pa ajawinel pkiwi aj Israel. I ma Omri le are i kaj-atzil achiyab' chi je yij che i ch'oj.

¹⁷ Are uri ma Omri xaq konojel uwinaq chi je yij che i ch'oj je aj Israel, xkimayij ch'oj chkij aj Gibetón, xwiri xe'e chu'anik ch'oj chkij aj Tirsa.

¹⁸ Are xril ma Zimri chi xmaj i tinimit pu'ab', are uri xok b'i pa nim laj rachoch i ajawinel, are o chik pa ja xunak' a' che i nim laj ja re i ajawinel xaq chila xkam kan ire pa ja.

¹⁹ Xuk'ulmaj ile rumal umak atzalal xaq rumal ronojel i utz taj chi xu'an chwach i Ajwal; man xu'an i mak atzalal pacha xu'an i ma Jeroboam, chi lik xu'an chke aj Israel chi xemakun chwach i Dios.

²⁰ I jub'an chik anoj re uk'aslemal ma Zimri, xaq ni'pa uch'ob'onik chi utz taj chrij ma Ela chi ajawinel, tz'ib'tal chupam i wuj crónicas ke i ajawinelab' aj Israel.

Rajawinik ma Omri pa tinimit Israel

²¹ Are uri i tinimit Israel xki'an keb' tzob'aj che kib'. Jun tzob'aj kiya'om kiwach ru' ma Tibni, chi uk'ojol ma Ginat, ike kkaj chi ma Tibni kkanaj pa ajawinel, jun chik tzob'aj kiya'om kiwach ru' ma Omri.

²² Pa k'isb'al re, are utzob'aj ma Omri xch'akanik, man lik ko xkitak'b'a kib' man lik ko kiwach wach xkib'ij utzob'ajil ma Tibni, chi uk'ojol ma Ginat. Keje u'ankil uri chi ma Tibni xkamik, i ma Omri xkanaj pa ajawinel.

²³ Ma Omri xujeq ajawinik puwi i tinimit Israel che i julajuj juwinaq (31) junab' rajawinik ma Asa puwi i tinimit Judá; kab'lajuj junab' xrajawinik, che i ni'pa junab' le waqib' junab' xrajawin chila pa tinimit Tirsa.

²⁴ Xulo' jun jyub' che ma Semer chi are jyub' Samaria, xutoj jo'ob' wuqwinaq (145) pexu saq-o'oj. Chila xuyak wi jun tinimit chi sutim rij ru' tapial nim uwach. I tinimit le xuya pub'i Samaria, man ma Semer ub'i i rajaw te'eq ulew le.

²⁵ Ronojel ni'pa i xu'an ma Omri, lik utz taj xril i Ajwal, lik xik'aw ne i utz taj chwach ni'pa xki'an i jub'an chik ajawinelab' chuxe'el ire,

²⁶ man xu'an ronojel i mak atzalal pacha xu'an ma Jeroboam, chi uk'ojol ma Nabat, xaq xu'an chke aj Israel chi xemakunik ru' ukojik ki'ij i jalajuj taq tiox chi xaril je antalik, rumal ile lik xkipetsaj roywal i Ajwal chi ki-Dios aj Israel.

²⁷ I jub'an chik anoj re uk'aslemal ma Omri xaq ronojel ni'pa i anik chi xu'ano, tz'ib'tal chupam i wuj crónicas ke i ajawinelab' aj Israel.

²⁸ Are xkamik, xkimuq chila pa tinimit Samaria. Chrijil chik ire le xkanaj kan uk'ojol puk'exel pa ajawinik chi ma Acab.

Rajawinik ma Acab pa tinimit Israel

²⁹ Che i junab' wajxaqlajuj juwinaq (38) re rajawinik ma Asa puwi i tinimit Judá, ma Acab, chi uk'ojol ma Omri, xujeq ajawinik pkiwi aj Israel; keb' juwinaq (22) junab' xrajawin pkiwi aj Israel chila pa tinimit Samaria.

³⁰ Ronojel ni'pa i xu'an ma Acab lik utz taj xril i Ajwal, lik xik'aw ne i utz taj chwach ni'pa xki'an i jub'an chik ajawinelab' chi xe'ajawin nab'e chwach ire,

³¹ man lik xuxij ti rib' chu'anik ronojel ni'pa i mak atzalal pacha xu'an ma Jeroboam, chi uk'ojol ma Nabat. Xwi ta la ile xaq xk'uli ru' ati Jezabel chi umi'al ma Et-baal chi ajawinel pa tinimit Sidón, xaq pa k'isb'al re, x-e chukojik u'ij i tiox Baal.

³² Xu'an jun sujb'al sipon xaq jun rachoch i tiox Baal le chila pa tinimit Samaria.

³³ Xaq xu'an uk'exwach ati tiox Asera, rumali mas xupetsaj roywal i Ajwal chi ki-Dios aj Israel, lik utz ti xu'an ire chkiwach konojel ni'pa i ajawinelab' chi xe'ajawin nab'e pa tinimit Israel.

³⁴ Che taq i ij are krajawin ma Acab, ma Hiel chi aj Betel, xuyijb'a i tinimit Jericó. Are xujeq uyijb'axik i tinimit Jericó le, xkam ma Abiram chi uk'ojol atz; are xutzin chukojik i nimaq taq uchija, xkam ma Segub, chi uk'ojol cha'xel. X-antajik chrij pacha xub'ij i Ajwal rumal ma Josué, chi uk'ojol ma Nun.