1 Reyes 14 - Wuj Pa K'ubultzij

Ma Ahías kutzijoj utzaqsaxik ma Jeroboam

¹ Che taq i ij le, i uk'ojol ma Jeroboam, chi ma Abías, xqaj che i yob'il.

² Are uri ma Jeroboam xub'ij che i rixoqil: —Chayojo b'i awib', jat chila pa Silo, man keje ile k-etamax ti awach chi yet at wixoqil. Chila pa Silo le jeqel wi ma Ahías, chi profeta, chi xub'ij chwe chi yin kinkanaj ni pa ajawinel puwi i nim laj tinimiti.

³ Chak'ama b'i lajuj wa re trigo, chok'ok' xaq jun xar uwa'al kab'; are katupon ru', ire kub'ij ni chawe wach kuk'ulmaj i qak'al.

⁴ I rixoqil ma Jeroboam le, lik keje ile xu'ano; xuyijb'a rib', te'uri x-e pa Silo, xupon chi rachoch ma Ahías. Xwiri ma Ahías le ktzun ti chik rumal urijal.

⁵ Xwiri i Ajwal ub'im chik che ma Ahías le, chi kupon i rixoqil ma Jeroboam ru' chutz'onoxik che wach o che i rak'al chi iwab'. Xaq ub'im chik che wach taq ula'ik uwach ku'an che i ixoq le, xaq xub'ij che chi uyojom b'i rib' are kuponik.

⁶ I ma Ahías are xuta chi xok b'i rixoqil i ma Jeroboam xol uchija, are uri xb'ix che: —Chatok loq at rixoqil ma Jeroboam, ¿B'uchak chi ayojom li awib'? Yin yatal chik utzijol chwe chi lik ko a'ijlaxik kin-ano,

⁷ rumali wo'or chattzalij b'ik, chab'ija che ma Jeroboam chi Ajwal Dios aj Israel, ub'im: “Yin xatwesaj li chkixol i winaq, xaq xatinya pa aj-atzil pkiwi intinimit Israel.

⁸ Yin xwesaj u'atik tzij pki'ab' i ralk'uwal mam David, man xinya pa'ab' yet, xwiri yet a'anom taj pacha xu'an mam David chi wajchak, man ire lik xu'ano chrij pacha kub'ij intzij inpixab'; xaq lik ru' ronojel uk'ux xu'an upatan chwij, ronojel ni'pa xu'ano lik suk'ulik chinwach yin.

⁹ Xwiri yet lik mas utz ti kattijin chu'anik chkiwach konojel ni'pa je ik'awnaq nab'e chawach; xwi ta la ile, xaq xapetsaj woywal, man xa'an jub'an tiox xaq jub'an chik k'exwachij re ch'ich', xwiri yin lik xinaxutuj.

¹⁰ Rumali kinpetsaj ni jalajuj taq utz taj pkiwi awalk'uwal: Kin-an na chi kekam konojel ni'pa amuq axikin chi je achiyab' chila pa Israel; lik mijun kk'asi kanoq, kinchup ni kiwach konojel, pacha taq umesik tz'il kin-an chke

¹¹ awachalal chi kekam pa tinimit, ketijaw ni kumal i tz'i, xaq konojel ni'pa i kekam pa taq es, ketijaw ni kumal i k'uch, man Yin chi in Ajwal keje ile kwaj chi k-antaj na.”

¹² I yet, ixoq, chatwalijoq, jat chi awachoch. Man are k'atene katok pan jub'i' patinimit, are uri awalab' lik kkam na.

¹³ Are uri konojel aj Israel, keb'ison na xaq lik ke'o' ni che, te'uri ke'e chumuqik. Man xwi ire le chke konojel i ralk'uwal ma Jeroboam chi utz umuqik k-anik, xaq xwi ire chkixol konojel i ralk'uwal ma Jeroboam, utz x-il uk'aslemal che rumal i Ajwal chi ki-Dios aj Israel.

¹⁴ I Ajwal kukoj ni jun chik ajawinel pkiwi aj Israel chi kuchup ni kiwach konojel i ralk'uwal ma Jeroboam che i iji, lik wo'or ku'an ni ile.

¹⁵ I Ajwal lik keuyikya ni aj Israel pacha ku'an jun nim laj raqana chi kuyikya ronojel i jalajuj taq che' chi o chuchi'. Keresaj nu b'i chwach i utz laj ulewi, chi xya' kan chke i katit kimam, keuk'aqa ni k'a jela chwach i raqana Éufrates rumal u'anik ati tiox Asera, man lik rumal ile xkipetsaj roywal i Ajwal.

¹⁶ I Ajwal, kero'taj ni aj Israel rumal i mak atzalal chi xu'an ma Jeroboam, xaq rumal xeumin aj Israel chupam i makunik.

¹⁷ Are uri i rixoqil ma Jeroboam, xwalijik xaq xumaj b'i ub'e, xtzalij chub'i putinimit chi Tirsa ub'i, are mer xok b'i xol uchija re i rachoch, are uri xkam i ralab'.

¹⁸ Konojel aj Israel xe'e chumuqik xaq lik xe'o' che, chrij pacha xutaq utzijoxik i Ajwal rumal i rajpatan chi ma Ahías, chi profeta.

¹⁹ I jub'an chik anoj re uk'aslemal ma Jeroboam, i ch'oj chi xu'ano xaq i jub'an chik b'iroxik chi xu'ano are xu'at tzij, tz'ib'tal chupam i wuj Crónicas ke i ajawinelab' aj Israel.

²⁰ Ma Jeroboam xuch'ij keb' juwinaq (22) junab' pa ajawinel, chrijil chik ukamik ire le, xkanaj uk'ojol puk'exel chi ma Nadab.

Rajawinik ma Roboam pa tinimit Judá

²¹ Chila pa tinimit Judá, are ma Roboam o pa ajawinel, chi uk'ojol ma Salomón. Ire jun kawinaq (41) junab' o chik che are xkanaj pa ajawinel, wuqlajuj junab' xk'iji pa ajawinel chila pa Jerusalén chi are i tinimit u'ulum i Ajwal chkixol i jub'an chik tinimit ke i jalajuj taq tzob'aj aj Israel re uk'ijib'al ub'i. I uchuch ma Roboam le ati Naama ub'i, chi aj pa tinimit Amón.

²² Xwiri ni'pa xu'an ma Roboam, lik utz taj xril i Ajwal, rumali lik mas xupetsaj roywal man i mak atzalal chi xu'ano, lik nim chwach i xki'an i ratit umam,

²³ man xaq ike xki'an lo'laj k'ijib'al ke i jub'an chik tiox tzam taq jyub', xkitak'b'a ab'aj, xaq pacha taq aqan chi lik o u'ij xki'an che, xaq xkiya puwi i jalajuj taq jyub', xaq chuxe' nimaq taq che' chi lik rojraq uxaq.

²⁴ Xaq konojel achiyab' chila pa tinimit Judá, lik pacha taq ukojik u'ij jun ki-dios ki'ano, man chwach kich'akul kkich'ak kimer. Xaq xki'an ronojel ni'pa i ch'am taj chi kki'an jub'an chik tinimit chi kekojon ti che i Dios, chi lik je resam b'i i Ajwal chkixol i aj Israel.

²⁵ Che i ujo' junab' re rajawinik ma Roboam, i ma Sisac, chi ajawinel re i tinimit Egipto, x-e chu'anik ch'oj chkij aj Jerusalén.

²⁶ Xuk'am ronojel ni'pa i jalajuj taq ub'itaq re i ajawinel chi o chupam i nim laj rachoch xaq ronojel ub'itaq re rachoch i Dios. Ronojel is xuk'am b'ik, xaq xuk'am b'i ronojel i tob'al ib' re i ch'oj chi lik an-o'oj chi u'anom ma Salomón.

²⁷ Are uri i ma Roboam chi ajawinel, xu'an chik uk'exel i tob'al ib' re i ch'oj ru' i anch'ich', xuya kan pki'ab' i aj-atzil chke i ajchajinel chi kkichajij i okb'al che i nim laj rachoch i ajawinel.

²⁸ Arewi are kupon i ajawinel chila prachoch i Ajwal, i ajchajinel kkik'am b'i tob'al ib' re i ch'oj le; te'uri kekiya chik pa ja ipa je o wi i ajchajinel.

²⁹ I jub'an chik anoj re uk'aslemal ma Roboam xaq ronojel ni'pa i xu'ano, tz'ib'tal chupam i wuj Crónicas ke i ajawinelab' aj Judá.

³⁰ Lik arewi xk'iji i ch'oj chkixol ma Roboam ru' ma Jeroboam.

³¹ I ma Roboam are xkamik, xmuq ku' i ratit umam chila putinimit mam David. I uchuch ma Roboam le, ati Naama ub'i, aj pa tinimit Amón. Chrijil chik ma Roboam le xkanaj kan uk'ojol ma Abiam puk'exel pa ajawinik.