PRIMER LIBRO DE CR%D3NICAS 25 - Wuj Pa K'ubultzij

I aj-ojmanel xaq i ajb'ixanel

¹ Chrijil chik ile, ma David xaq i je aj-atzil che i patan prachoch i Dios, xkiya i patan chi lik atz u'ij chke i rak'al ma Asaf, ma Hemán xaq ma Jedutún, chi are keb'iw utzij i Dios chke i winaq wach kk'ulmax k-on panoq, ile kkib'ij ru' usonil i arpa, salterio xaq i chilchil. Are kib'i iri chi ke'anaw i patan le:

² Chke i rak'al ma Asaf o ma Zacur, ma José, ma Netanías, xaq ma Asarela. I ok'awnaq utzam chke ike le are ma Asaf chi kiqajaw, chi are kb'iw utzij i Dios chke i winaq wach kk'ulmax k-on panoq, are ktaq che rumal i ajawinel.

³ I je waqib' rak'al ma Jedutún je are iri: Ma Gedalías, ma Zeri, ma Jesaías, ma Simei, ma Hasabías, xaq ma Matatías, i ok'awnaq utzam chke ike le are ma Jedutún chi kiqajaw, chi are kb'iw utzij i Dios chke i winaq wach kk'ulmax k-on panoq ru' usonil i arpa tioxb'al re xaq kojb'al u'ij i Dios.

⁴ I je rak'al ma Hemán je are iri: Ma Buquías, ma Matanías, ma Uziel, ma Sebuel, ma Jeremot, ma Hananías, ma Hanani, ma Eliata, ma Gidalti, ma Romanti-ezer, ma Josbecasa, ma Maloti, ma Hotir xaq ma Mahaziot.

⁵ Konojel ike le je rak'al ma Hemán, chi kya' retamaxik che wach kuk'ulmaj i ajawinel chweq kab'ij, chrij pacha i sujunik chi xuya i Dios che chi kunimarsaj u'ij. I Dios xuya kajlajuj uk'ojol ma Hemán xaq oxib' umi'al.

⁶ Are kiqajaw ok'awnaq utzam chke ike le are keb'ixan prachoch i Dios i jalajuj taq b'ix chi kkib'ixaj, lik kkib'ixaj ru' usonil i chilchil, salterio xaq i cítara. I ajawinel are aj-atzil pkiwi ma Asaf, Ma Jedutún xaq ma Hemán.

⁷ I kik'iyal konojel aj-ojomab' chi lik kkiriq ojmanik, kachi'ilam i jub'an chik kachi'il chi je nawsam che i b'ix kojb'al u'ij i Ajwal, je wajxaqib' kajlajujwinaq (288) konojel.

⁸ Are uri xki'an pa taq tzob'ajil che kib' xaq xkisakij chkiwach pachike ij kechakunik, xkikoj pajil i je atzib' xaq i je cha'xelab', je tijonelab' xaq i je tijoxelab'.

^9-31 Chrij pacha i sakinik chi x-anik, keje utusik kib'i i achiyab' iri xkanajik: I nab'e are ma José, ukab' ma Gedalías, urox ma Zacur, ukaj ma Izri, ujo' ma Netanías, uwaq ma Buquías, uwuq ma Jesarela, uwajxaq ma Jesahías, ub'elej ma Matanías, ulajuj ma Simei, ujulajuj ma Azareel, ukab'lajuj ma Hasabías, uroxlajuj ma Subael, ukajlajuj ma Matatías, ujo'lajuj ma Jeremot, uwaqlajuj ma Hananías, uwuqlajuj ma Josbecasa, uwajxaqlajuj ma Hanani, ub'elejlajuj ma Maloti, ujuwinaq ma Eliata, nab'e juwinaq ma Hotir, ukab' juwinaq ma Gidalti, urox juwinaq ma Mahaziot, ukaj juwinaq ma Romanti-ezer. Chkijujunal i achiyab' chi tz'ib'tal kib'i le, is je kab'lajuj konojel, je kojom uri pajil i katz kicha' xaq i kak'al ku'.