PRIMER LIBRO DE CR%D3NICAS 20 - Wuj Pa K'ubultzij

Uk'amik kan i tinimit Rabá rumal ma David

¹ Chukab' junab', chi are i ij ke'el i ajawinelab' chu'anik ch'oj, i ma Joab xeuyijb'a jub'an achiyab' chi je yij che i ch'oj, xe'e chuchupik kiwach aj Amón. Te'uri x-e chusutixik rij i tinimit Rabá, xwiri ma David o chila Jerusalén. I ma Joab xok b'i pa tinimit Rabá xaq xuwulijsaj ronojel i tinimit le.

² Are uri ma David xuk'am i koron chi an-o'oj chi o te che ujolom i ajawinel chi o chomiq taq ab'aj che, chi o lajuj oxwinaq (70) pexu ralil, xaq xkikoj che ujolom ma David. Xwi ta la ile, xaq xuk'am b'i jalajuj taq b'iroxik paqal rajil chi o chila pa tinimit.

³ I ma David xeresaj i winaq chila chi xek'asi kanoq, xeutaq chrelsaxik tz'alam, chupa'ik uwach ulew xaq chu'anik i jalajuj taq chak ru' ikaj. Xaq keje ile xu'an chke konojel aj Amón; te'uri xtzalij b'i pa Jerusalén junam ku' uwinaq chi je yij che i ch'oj.

Ch'oj chkij i winaq chi lik naj kij

⁴ Chrijil chik ile, chila pa tinimit Gezer x-ani chik jun ch'oj chkij aj Filistea. Che i ij le ma Sibecai aj Husa xuqajsaj u'ij xaq xukamsaj ma Sipai, chi jun chke kimuq kixikin i winaq chi lik naj kij.

⁵ Che i jun chik ch'oj chi x-an chkij aj Filistea, ma Elhanán, chi uk'ojol ma Jair, xukamsaj ma Lahmi chi katz kicha' kib' ru' ma Goliat chi aj Gat, i uche' ch'ich' utzam lik nim upam.

⁶ Che chik jun ch'oj chi x-ani pa tinimit Gat, o jun achi chi lik naj rij chi o kab'lajuj uwi taq u'ab' xaq kab'lajuj uwi taq raqan, ke'eloq chi waqib' uwi jujun u'ab' xaq waqib' uwi jujun raqan. Xaq ire are jun chke kimuq kixikin i winaq chi naj kij.

⁷ Xwiri i achi le xeuyo'ya aj Israel, rumali xkamsax rumal ma Jonatán, chi uk'ojol ma Simea, chi ratz ma David.

⁸ I achiyab' le chi lik naj kij, je umuq uxikin ma Refa chi aj Gat, xwiri xekamsax rumal ma David xaq kumal i rajpatan.