PRIMER LIBRO DE CR%D3NICAS 19 - Wuj Pa K'ubultzij

Ma David keuch'ak aj Siria xaq i aj Amón

¹ X-on panoq, xkam ma Nahas chi ajawinel ke aj Amón, are uri xkanaj kan uk'ojol puk'exel.

² Are uri ma David xuch'ob'o chi lik utz rilik ma Hanún ku'ano, chi uk'ojol ma Nahas, man uqajaw utz rilik ma David xu'ano; rumali chi xutaq b'i jub'an rajpatan chuya'ik ukowil uk'ux rumal ukamik uqajaw. Xwiri are xeupon rajpatan ma David le chila pkitinimit aj Amón,

³ i kaj-atzil aj Amón xkib'ij che ma Hanún: “Nim laj winaq, ¿Kakoj b'ari yet ile chi ma David xutaq li achiyab' le chuya'ik ukowil ak'ux xa rumal uya'ik u'ij etz aqajaw? ¿Xek'un ti nawi chuk'ak'alixik qatinimit, man keje ile kkichupsaj uwach?”

⁴ Are uri ma Hanún xutaq kiminik i rajpatan ma David prexil, usolik nik'aj che kismachi' xaq uraqch'ixik ki'u' pa nik'aj k'a kupon che uwi ka'. Chrijil chik ile, te'uri xeutaq b'ik.

⁵ I ma David are xb'ix che wach xkik'ulmaj i achiyab' le, are uri xutaq b'i kik'ulaxik, man ike lik je o pa k'ixb'alil, xaq xutaq b'i ub'ixkil chke chi chekanaj kan pa Jericó k'a kk'iy ni kismachi', te'uri kepetik.

⁶ I aj Amón xkich'ob'o chi ma David lik xpe roywal chke, rumali chi ma Hanún xaq aj Amón xkitaq b'i oxlajujwinaq jumo' (660) tintal saq-o'oj pa tinimit Mesopotamia, Siria, Maaca xaq i Soba, tojb'al re k'iyal taq ch'ich' re anb'al ch'oj xaq achiyab' chi je yij che i ch'oj ajrij taq kaway.

⁷ Are uri chi xya' kajchiy (32,000) ch'ich' chke re anb'al ch'oj, xaq xkitoj i ajawinel re i tinimit Maaca junam ku' konojel achiyab' chi je yij che i ch'oj chi je re ire. Ike le xeuponik xaq xek'iji chila che jun k'ijib'al chwach i tinimit Medeba. Xwi ta la ile, xaq aj Amón xe'el li pa jalajuj taq kitinimit, man xkimol kib' chu'anik ch'oj tob'al re ma Hanún.

⁸ Xwiri ma David xretamaj ile, rumali xutaq b'i ma Joab junam ku' konojel achiyab' chi je yij che i ch'oj.

⁹ I aj Amón lik je yij chik che i ch'oj, xeupon k'a chila pa okb'al re i tinimit. Ni'pa i ajawinel chi je petnaq ku' xekanaj kan pa taq es.

¹⁰ I ma Joab, are xrilo chi je o ajch'oj chrij chwach, are uri xeu'ul i achiyab' aj Israel chi lik ko kiwach che i ch'oj xaq xkiyijb'a kib' chu'anik ch'oj chkij aj Siria.

¹¹ Te'uri xeuya kan jub'an chik achiyab' chi je yij che i ch'oj chuqul ucha', chi ma Abisai, chu'anik ch'oj chkij aj Amón.

¹² Are uri xub'ij che: “We i aj Siria mas ketiki chu'anik ch'oj chinwach yin, katpe uri chinto'ik, xaq we i aj Amón mas ketiki chu'anik ch'oj chawach yet, kin-e uri yin chato'ik.

¹³ Chakowij ak'ux, chqakoch'ij qib' rumal qatinimit xaq rumal utinimit i qa-Dios. ¡Chu'ana ni Ajwal pacha kumaj uwach Ire!”

¹⁴ Are uri ma Joab xumaj b'i ub'e junam ku' achiyab' chi je yij che i ch'oj, xe'e chu'anik ch'oj chkij aj Siria, xwiri aj Siria le xe'anmajik.

¹⁵ I aj Amón, are xkilo chi aj Siria xe'anmaj b'ik, xaq ike xe'anmaj chwach ma Abisai, chi ucha' ma Joab, xe'ok b'i pa tinimit. Rumali chi ma Joab xtzalij chub'i pa Jerusalén.

¹⁶ I aj Siria are xkinab'ej chi xech'ak kumal aj Israel, are uri xkitaq b'i ajb'il tzij ch'aqap che i raqana Éufrates, man kekisik'ij aj Siria chi je o chila. I aj-ok'al utzam chke ike le are ma Sofac, chi aj-atzil chke uwinaq ma Hadad-ezer chi je yij che i ch'oj.

¹⁷ Xwiri xkib'ij ronojel ile che ma David, rumali ma David xumol kichi' aj Israel chi je yij che i ch'oj, xki'axuj i raqana Jordán, chila xkitzukuj wi kik'ijib'al re anb'al ch'oj. I ma David xeuyijb'a uwinaq chu'anik ch'oj chkij aj Siria xaq aj Siria xki'an ch'oj chrij ire.

¹⁸ Xwiri, pa k'isb'al re, xe'anmaj b'i chkiwach aj Israel, man i ma David xeukamsaj jo'chiy (40,000) achiyab' chi je yij che i ch'oj ajchaqan xaq xeumutma lajujwinaq wuqlajujmo' (7,000) ch'ich' re anb'al ch'oj, xwi ta la ile, i ma David xukamsaj ma Sofac, chi aj-atzil chke achiyab' chi je yij che i ch'oj aj Siria.

¹⁹ I ni'pa kiya'om kiwach ru' ma Hadad-ezer, are xkilo chi aj Israel xech'akanik, are uri konojel xkichomaj kib' ku' aj Israel xaq xekanaj kan pki'ab' ike. Lik che i ij le konojel aj Siria xkixij kib' xaq xekito ti chik aj Amón.